Apocalipsis 7

1Ta patil la quil chantul ch'ul abatetic. Tey tec'ajtic juju-jtul ta bay xchanjejch'elul te balumilale. Scomojic te chanchajp ic' te ya xbeenic ta balumilale, swenta yu'un xujt' ma xbeen ic' ta sba te lum q'uinale soc ta sba te mare, te jich ma stij sba pejt'uc a te te'etique. 2Soc la quil yan ch'ul abat te moj tel ta bay sloq'uib c'aal. Yich'oj tel ta sc'ab te sello yu'un te cuxul Diose. Ja' in ch'ul abat to tulan awun ta yawtayel te chantul ch'ul abatetic te yich'oj yat'elic ta lajinwanej ta bay lum q'uinal soc ta bay te mare. 3Jich la yal: “Ma to me x'alajinic te lum q'uinale soc te mare soc ni pejt'uc te te'etique. Ja' to teme la cac'beytic sello ta stibaic te abatetic yu'un te Dios cu'untique”, xiic. 4Soc la caiy stojol te jayeb yajtalul ta spisilic te la yich' selloilique. Ay waxaclajunwinic ta jbajc' (144,000) te la yich' selloilic ta spisil ta jchajp te israeletique. 5Ay lajuneb xcha'winic ta bajc' (12,000) ta jtul te sts'umbal Judá te la yich' selloilique, soc ay lajuneb xcha'winic ta jbajc' (12,000) ta jtul te sts'umbal Rubén, soc ay lajuneb xcha'winic ta jbajc' (12,000) ta jtul te sts'umbal Gad, 6soc ay lajuneb xcha'winic ta jbajc' (12,000) ta jtul te sts'umbal Aser, soc ay lajuneb xcha'winic ta jbajc' (12,000) ta jtul te sts'umbal Neftalí, soc ay lajuneb xcha'winic ta jbajc' (12,000) ta jtul te sts'umbal Manasés, 7soc ay lajuneb xcha'winic ta bajc' (12,000) ta jtul te sts'umbal Simeón, soc ay lajuneb xcha'winic ta bajc' (12,000) ta jtul te sts'umbal Leví, soc ay lajuneb xcha'winic ta bajc' (12,000) ta jtul te sts'umbal Isacar, 8soc ay lajuneb xcha'winic ta jbajc' (12,000) ta jtul te sts'umbal Zabulón, soc ay lajuneb xcha'winic ta jbajc' (12,000) ta jtul te sts'umbal José, soc ay lajuneb xcha'winic ta jbajc' (12,000) ta jtul te sts'umbal Benjamín, te yich'oj selloilic ta spisilique. 9Ta patil la quil ay bayal mach'atic talemic ta bay yanyantic nacionetic soc ta bay chajbalchajp sts'umbalic soc ta bay yanyantic slumalic soc ta bay yanyantic te sc'opique. Spisil tec'ajtic ta stojol te muc'ul nactijibale soc ta stojol te Alalchije. Bayalic ta c'axem to xan te ma xju' ta ajtayele. Sac te sc'u'-spac' slapojique, soc stuchojic palma ta sc'abic juju-jtul. 10Spisilic tulan yacalic ta aw. Jich yacalic ta yalel: “Te colele ay ta swenta te Dios cu'untic te nacal ta smuc'ul nactijibe soc ta swenta te Alalchije”, xiic. 11Spisil te ch'ul abatetique, tec'ajtic ta bay sjoylejal te muc'ul nactijibale soc te chaneb xcha'winic (24) ta jtul mamaletique soc te chancojt' te bitic cuxajtique, la spajc'an sbaic ta lum ta stojol te muc'ul nactijibale. Jich la yich'ic ta muc' te Diose. 12Jich la yalic: “¡Jichuc! Te bendicione, te ich'el ta muq'ue, te p'ijilile, te yalel wocole, te yutsilale, te yu'ele, soc te yipe, ja' ay ta swenta te Dios cu'untic sbajt'el q'uinale”, xiic. 13Ay jtul te mamaletic te la sjojc'obone, te jich la yalbone: —¿Mach'atic a in to te slapojic saquil sc'u'ique soc banti talemic? —xi'. 14La calbey: —Tatic, ja'at ya ana' —la cut. Jich la yalbon: —Ja'ic in to te mach'atic c'axix yu'unic te bayal uts'inele. Sac'ojiquix sc'u'-spaq'uic. Ja' la sacubtesic a te xch'ich'el te Alalchije. 15Ja' swentail te tec'ajtic ta stojol smuc'ul snactijib te Diose. C'aal ajc'ubal ayic ta abatinel yu'un ta bay te templo yu'une. Te mach'a nacal ta muc'ul nactijibal, ya me scanantay soc ya me sjoin spisil ora. 16Ma ba ya xc'axix swocolic ta wi'nal soc ta taquinti'il. Soc ma ba ya yaiybeyiquix xc'uxul te c'aale, soc ma ba ya xwoclajiquix yu'un te xq'uixnale. 17Melel te Alalchij te ay ta bay yolilal te muc'ul nactijibale, ja' me jcanan yu'unic. Ya me x'ic'otic bael yu'un ta bay sloc'ja' te ya xcuxinic yu'une. Soc ya scusbot ya'lel sitic yu'un te Diose —xi' ta c'op.


Copyright
Learn More

will be added

X\