Apocalipsis 6

1La quil te Alalchij te c'alal la sjam jun ta sjuquebal te selloetique. Soc la caiy stojol te c'opoj jcojt' te bitic cuxajtique. Jich c'opoj la caiy te bit'il sc'op chawuque: “La' me, ila awil”, xi' la caiy. 2Jich la quil cojt' saquil caballo. Te mach'a cajal ta spate yich'oj t'imalte' ta sc'ab, soc ac'bot scorona ta sjol. Ju' yu'un tsalaw, ta swenta tsalwanej. 3Te c'alal la sjam te xchebal sello te Alalchije, la caiy stojol c'opoj te xcha'cojt'ol te bitic cuxajtique: “La' me, ila awil”, xi'. 4Loc' tel yan tsajal caballo. Te mach'a cajal ta spate ac'bot yat'el ta xch'ayel te lamal q'uinal ta balumilale, swenta yu'un jich me talel c'axel ya smil sbaic. Soc ac'bot smuc'ul puñal. 5Te c'alal la sjam te yoxebal sello te Alalchije, la caiy stojol c'opoj te yoxcojt'ol te bitic cuxajtique, jich la yal: “La' me, ila awil”, xi'. Jich la quil jcojt' ijc'al caballo. Te mach'a cajal ta spate slicoj libra ta sc'ab. 6La caiy stojol te ay mach'a c'opoj ta yolilal te chancojt' te bitic cuxajtique, te jich la yale: “Cheb libra trigo ta jun denario stojol, soc waqueb libra cebada ta jun denario. Yan te aceite soc te vino ma me xawac' ch'ayuc stuquel”, xi'. 7Te c'alal la sjam te xchanebal sello te Alalchije, la caiy stojol c'opoj te xchancojt'ol te bitic cuxajtique, jich la yal: “La' me, ila awil”, xi'. 8Jich la quil cojt' c'anal caballo. Te mach'a cajal ta spate, Lajel xi' te sbiile, soc ts'acal ta spat te Stsobjibal-animaetique. Ac'bot ta swenta jxejt' ta xchanxejt'el te balumilal te ya smil ta puñal, ta wi'nal, ta chamel soc ta ti'el ta jti'awal chambalametic ta balumilal. 9Te c'alal la sjam te yo'ebal sello te Alalchije, la quil te ay xch'ulelic ta bay yanil te xchic'jibal milbil smajt'an Dios te jayeb mach'atic la yich'ic milel ta scaj te sc'op Dios soc te jun yo'tan la yalic ta testigo te bila xch'uunejique. 10Tulan yacalic ta aw, jich la yalic: “Cajwal, Ch'ul Diosat ta melel, ¿jayeb to xan c'aal sc'an te ya sta yorail te ya awaiy chajbanwanej te ya awac'bey stojic te bit'il la smalbotic jch'ich'eltic te mach'atic nainemic ta balumilale?”, xiic ta aw. 11Jich ac'bot slapic saquil c'u'il juju-jtul, soc albotic te junuc yo'tan ac'a smaliyic xan jtebuc, ja' to teme ts'acaj yajtalul te yermanotac te ayic ta abatinel yu'un te Cristoe, puersa ya yich'ic milel uuc, jich te bit'il la yich'ic milel stuquelique. 12La quil c'alal la sjam te swaquebal sello te Alalchije, tal tulan nijq'uel ta balumilal. Te c'aale ijc'ub. Jich c'ot ta ilel te bit'il ijc'al ch'ixal pac' swenta mel-o'tan. Te ue tsajub jich bit'il stsajal te ch'ich'e. 13Te eq'uetic te ayic ta ch'ulchane, ch'ayic coel tel ta balumilal, jich bit'il xbuquet nax ya xco xyaxal sit te higo-te' teme yuc'ot yu'un te tulan iq'ue. 14Te ch'ulchane ch'ay bael ta jsit jich bit'il ora nax ya yich' balel te june. Jeltaybot yawilic spisil te witstiquile soc te ch'in sejbelsejp q'uinaletic te joytaybilic ta mare. 15Te muc' ajwaliletic te ayic ta balumilale soc te mach'atic muc' sc'oplalique soc te jc'ulejetique soc te capitán-soldadoetique soc te mach'atic ay yipique soc te abatetique soc te mach'atic ayic ta libre, la snac' sbaic ta nailch'en soc ta toyol witstiquil. 16Soc jich caj yalbeyic te witstiquile soc te ch'entiquile: “La' net'awotic, macawotic ta sit te Mach'a nacal ta smuc'ul nactijibe. Ma me staotic te yilimba te Alalchije. 17Yu'un c'otix sc'aalelal te yilimbae. ¿Mach'a c'an cujch'uc yu'un?”, xiic ta aw.


Copyright
Learn More

will be added

X\