Apocalipsis 3

1Soc la yalbon: —Ts'ibubeya te ch'ul abat yu'un te jchajp jch'uunjeletic te ay ta lum Sardis: Te mach'a yic'oj juqueb Espirituetic yu'un te Diose soc te yich'oj juqueb eq'uetique, jich la yal: Jo'on quilojbat spisil te awat'ele. “Cuxul”, xi' ac'oplal, ja'uc me to, lajemat ya quil jtuquel. 2Wic'a me asit. Ac'beya xan yip te bila cuxul to awu'une, te melel jlajelix ta jc'axel. Yu'un quiloj te ma lecuc te awat'el ta stojol te Diose. 3Na'a me xan te bila la awaiy stojol te la ach'uune. Canantaya me, soc sujt'esa me awo'tan. Teme ma x'awic' asite, ya me xtalon ta atojol jich te bit'il ya xtal te j'eleq'ue, yu'un ma na'biluc awu'un te bi ora ya xtalone. 4Ja'uc me to, ay nax cha'oxtuluc te ay ta bay Sardis te ma ba ts'ilajem te sc'u'-spaq'uique. Ja'ic me te ya sjoinonic ta beel te slapoj saquil sc'u'-spaq'uique, yu'un jich me ya sc'an te bit'il ayique. 5Te mach'atic ya xju' yu'unic tsalawe, ya me x'ac'bot slapic saquil sc'u'-spaq'uic, soc ma ba ya jtup'bey sbiilic ta bay te libro swenta cuxinele. Soc ya me calbey ta jamal sbiilic ta stojol te Jtate soc ta stojol uuc te ch'ul abatetic yu'une. 6Te mach'a ay xchiquine, ac'a me yaiy stojol te bila ya yal te Espíritu ta stojol te jch'uunjeletique —xi'. 7Soc la yalbon: —Ts'ibubeya te ch'ul abat yu'un te jchajp jch'uunjeletic te ay ta lum Filadelfia: Jich me la yal te ch'ul Dios te ma'yuc lot ta yo'tane, ja' te Mach'a yich'oj te llave yu'un te muc' ajwalil Davide, ja' te Mach'a ya sjam te ma'yuc jtuluc ya xju' yu'un smaquele. Te bila ya smaque, ma'yuc jtuluc mach'a ya xju' yu'un sjamel. 8Jo'on quilojbat spisil te awat'ele. Soc ta ora to jamojbatix ti'nail ta atojol te ma'yuc mach'a ya xju' yu'un te ya smaque. Manchuc teme jteb nax te awipe, ja'uc me to, awat'elinej spasel te bila la cale, soc ma ba amucoj ta awo'tan te jbiile. 9Jich me ya cac' te ya xtal squejan sbaic ta atojol te mach'atic nainem ta yo'tanic te Satanase soc te mach'atic scuyoj sbaic ta judioe, ja'uc me to, ma ja'uquic, ja' nax jpas-lotetic. Jo'on me ya cac' taluc te ya squejan sbaic ta atojol, jich me ya sna'ic te bit'il c'uxat ta co'tane. 10Scaj te ach'uunejbon te bila la calbat te jun me awo'tan ya ats'ic awocole, jo'on me ya jcanantayat te c'alal ya xtal prueba ta spamal balumilal, swenta yu'un ya me x'ilbot yo'tanic spisil te mach'atic ainemic ta balumilale. 11Ya me xtalon ta ora nax. Canantaya me te bila ay awu'une, swenta yu'un ma'yuc mach'a yan ya yich'bat te acoronae. 12Te mach'atic ya xju' yu'unic tsalawe, ja' me yoyalic ya xc'ot cu'un ta templo yu'un te Dios cu'une. Xujt' ma xloq'uic sbajt'el q'uinal tey a. Soc ya me jts'ibubey ta bay spatic te sbiil te Dios cu'une soc te sbiil te muc'ul lum yu'un te Dios cu'une, ja' te yach'il Jerusalén te ya xcoj tel ta ch'ulchan ta bay stojol te Dios cu'une. Soc ya me jts'ibubey ta bay spatic uuc te yach'il jbiile. 13Te mach'a ay xchiquine, ac'a me yaiy stojol te bila ya yal te Espíritu ta stojol te jch'uunjeletique —xi'. 14Soc la yalbon: —Ts'ibubeya te ch'ul abat yu'un te jchajp jch'uunjeletic te ay ta lum Laodicea: Te Mach'a Jichuc, te xie, te stalel ma'yuc lot ta yo'tane, jun nax yo'tan ya yal ta testigo te bila smelelile, te ja' ta swenta te chicnantesbil yu'un Dios spisil te bitic aye, jich la yal: 15Jo'on quilojbat te awat'ele. La caiyix te ma sicucate soc te ma q'uixinucate. Co'tanuc te q'uixinate o te mero sicate. 16Ja'uc me to, samalat ya caiy. Ma sicucat soc ma q'uixinucat. Ya me jxejtayat loq'uel ta que. 17Melel te ja'ate jich ya awal: “C'ulejon te jo'one. Ju'ix cu'un tsobel bayal te jc'ulejale. Xujt' ma'yuquix jwocol”, te xaate. Ja'uc me to, ma x'ana' te ay bayal awocol soc te bayal yo'bolil aba ta q'uinale, xujt' ma'yuc bila ay awu'un te ma'sitate soc te t'analate. 18Jich yu'un ya calbat te ya amanbon te oro cu'un te lecubtesbil ta c'ajq'ue, swenta yu'un ay me ac'ulejal ta mero melel. Soc ya calbat te ya amanbon uuc te saquil c'u'ul ya alape, swenta yu'un ma ba ya xq'uexawat te bit'il t'analate. Soc ya me amanbon uuc spoxil asit swenta yu'un jich me ya apoxtay asit a. Yu'un jich ya xju' awu'un te ya awil q'uinale. 19Te jo'one ya jp'ijubtes soc ya jtac'uy spisil te mach'a c'ux ya caiy ta co'tane. Junajuc me awo'tan ta jtojol, sujt'esa me awo'tan. 20Aiya me awaiy stojol, teq'uelon ta c'op ta sti' ana. Teme ay mach'a ya yaiybon stojol te jc'ope soc teme ya sjambon te ti'naile, jich ya x'ochon ta sna soc ya me join ta we'el tey a. 21Te mach'atic ya xju' yu'unic tsalawe, ya me sjoinon ta naclej ta banti te muc'ul nactijibal cu'une, jich nix te bit'il caiyoj tsalaw te jo'one soc te joinejix ta naclej ta bay smuc'ul nactijib te Jtate. 22Te mach'a ay xchiquine, ac'a me yaiy stojol te bila ya yal te Espíritu ta stojol te jch'uunjeletique —xi'.


Copyright
Learn More

will be added

X\