Apocalipsis 21

1Soc la quil yach'il ch'ulchan soc yach'il balumilal. Yu'un te sbabial ch'ulchane soc te sbabial balumilale ch'ayiquix bael soc ma'yuquix te mare. 2Jo'on Juanon la quil te ch'ul muc'ul lum te ja' te yach'il Jerusalén. La quil yac ta coel tel ta ch'ulchan te loc' tel ta stojol te Diose. Buen chapal jich te bit'il ya xch'al sba soc sc'u'-spac' te ach'ix ya xnujbine. 3Soc la caiy stojol te ay mach'a tulan c'opoj tel ta ch'ulchan te jich la yale: “Aiya awaiy stojol, Dios nainemix ta yolil te ants-winiquetique. Ayix sna ta yolilic. Ja' me lum yu'un Dios ya xc'otic, soc ja' nix Dios ya xc'ot yu'unic te Diose. 4Soc ya me scusbot ya'lel sitic yu'un te Diose. Soc ma'yuquix te lajele soc te oq'uele soc te mel-o'tane soc te bila ay xc'uxule. Yu'un te bila ay ta neelale, ch'ayix bael ta spisil”, xi' la caiy. 5Soc jich la yal te mach'a nacal ta muc'ul nactijibale: “Ila me awilic, ya jpasix ta yach'il spisil te bitic aye”, xi' la caiy. Soc jich la yalbon: —Ts'ibuya ta jun te bila la cale. Ja' in to, ja' te smelelil c'op te ya xju' ya xch'uun awo'tane —la yuton. 6Soc la yalbon xan: —Ju'ix cu'un. Jo'on Alfaon, jo'on Omegaon. Ayon ta xjajch'ibal soc ayon ta slajibal. Te mach'a taquin yo'tane, smajt'an me ya cac'bey yuch' te sloc'ja' te ya yac' cuxinele. 7Te mach'a ya xju' yu'un tsalawe, ya me cac'bey yu'unin spisil in to. Ja' Dios ya xc'oon yu'un, soc ja' jnich'an ya xc'ot stuquel. 8Yan te mach'atic ya xiwique, soc te ma sc'an xch'uunone, soc te mach'atic ilaybil sba te bila ya spasique, jmilawaletic, jmulwejetic, j'ac'chameletic, soc te mach'atic jch'uunej-loc'ombaetic, jpas-lotetic, ta spisilic in to, ja' me ya xbajt'ic ta bay muc' pamal c'ajc' te yac ta tilel soc azufre te ja' xchebal buelta lajele —la yuton. 9Tal jtul ta sjuctulul te ch'ul abatetic te yich'oj te juqueb copaetic te nojel tey a te juccum slajibal castigoetique. Jich la yalbon: —La' me, ya cac'bat awil te ach'ix te ya xnujbin soc te Alalchije —la yuton. 10Te Espíritu la yic'on bael ta bay te muc'ul toyol witse. Tey la yac'bon quil a te muc'ul ch'ul lum Jerusalén te yac ta coel tel ta ch'ulchan te loc' tel ta stojol te Diose. 11Te muc'ul lum, xlemet nax yutsil xojobil tey a te Diose. Te xojobile pajal yilel soc te bit'il xlemet nax t'ujbil saquil ton te jaspe sbiile, te ya xc'ax jsitic ta yilel q'uinal a jich bit'il te cristale. 12Joybil ta toyol ts'ajc' te lume. Ay lajchayjujt' sti' te ts'ajq'ue soc teq'uel jtul ch'ul abat ta bay jujun sti'. Soc ts'ibubil sbiilic tey a ta bay jujun sti' te lajchaychajp te israeletique. 13Ay oxjujt' sti' ta stojol sloq'uib c'aal, soc oxjujt' ta stojol norte, soc oxjujt' ta stojol sur, soc oxjujt' ta stojol smalib c'aal. 14Ay lajchayeb ton yiptajib te sts'ajc'ul te lume ta bay ts'ibubil sbiilic te lajchaytul jpuc-c'opetic yu'un te Alalchije. 15Te ch'ul abat te yacon ta c'op soque, stsacoj ta sc'ab te bila pajal soc jalal yilel te pasbil ta oro te ya sp'is a te muc'ul lume soc te juju-jujt' sti' soc te sts'ajc'ule. 16Te muc'ul lume pajal sjamalul ta juju-jejch' te xchiquine. Te snajt'ile pajal soc te sjamalule. Te ch'ul abate la sp'is ta jalal te muc'ul lume. Loc' cha'mil soc lajunwinic (2200) kilómetro ta p'isel yu'un. Pajal soc snajt'il te stoylejale soc uuc te sjamalule te loc' ta p'isel yu'une. 17Soc la sp'is te sts'ajc'ule. Loc' jo'eb xchanwinic (65) metro. Te ch'ul abate la sp'is te muc'ul lume te bila swenta p'isjibal yu'un te ants-winiquetique. 18Te sts'ajc'ul te lume pasbil ta jaspe-ton. Yan te lume, pasbil ta oro te xujt' ma'yuc scape, te pajal soc te espejo te xujt' ma'yuc bolobene. 19Te tonetic te yiptajib ts'ajq'ue, ch'albil ta spisil ta jchajp t'ujbil lequil tonetic. Te sbabiale jaspe-ton. Te xchebale zafiro. Te yoxebale ágata. Te xchanebale esmeralda. 20Te yo'ebale ónice. Te swaquebale cornalina. Te sjuquebale crisólito. Te swaxaquebale berilo. Te sbalunebale topacio. Te slajunebale crisopraso. Te sbuluchebale jacinto. Te slajchayebale amatista. 21Ta slajchayjujt'ul te sti' sts'ajq'ue, lajchayeb perlaetic pasbil a. Te jujun sti' jun perla pasbil a. Te smuc'ul calleil te lume pasbil ta oro te xujt' ma'yuc scape te pajal soc espejo te ya xc'ax jsitic ta yilel q'uinal a. 22Ma'yuc templo la quil tey a ta bay te muc'ul lume. Melel te Cajwaltic Dios te Spisil ya xju' yu'une soc te Alalchije, ja' templo yu'un te lume. 23Ma xtuun xojobil c'aal soc xojobil u tey a. Melel ja' sacuben q'uinal yu'un te yutsil xojobil te Diose soc te xojobil te Alalchije. 24Spisil ta jchajp nacionetic ya me x'ainic ta saquil q'uinal yu'un uuc. Soc spisil te muc' ajwaliletic te ayic ta balumilale ya me yich'ic tel yutsil sc'ulejalic te ya yich'ic bael tey a. 25Jujun c'aal jamal sti' spisil ora te muc'ul lume, soc ma'yuc ajc'ubal tey a. 26Soc spisil ta jchajp te nacionetic ya me yich'ic tel yutsilalic te ya yaq'uic ta ich'el ta muc' a te muc'ul lume. 27Ja'uc me to, ma xju' ya x'och xujt'uc tey a te bila ma lecuque, soc ma xju' ya x'och te mach'a ilaybil sba te bila ya spase, soc te mach'a ya spas lote. Ja' nax ya x'och tey a te mach'atic ts'ibubil sbiilic ta bay te lista yu'un cuxinel te yich'oj te Alalchije.


Copyright
Learn More

will be added

X\