Apocalipsis 19

1Patil la caiy stojol te ay tsobol ants-winiquetic te tulan yacalic ta c'op ta bay te ch'ulchane, te jich la yalique: “¡Ay yutsilal! Stuquel nax ay colel ta swenta te Dios cu'untique. Ay bayal yu'el soc jelawen yutsilal. 2Yu'un toj awo'tan ya awac' castigo ta swenta te bila smelelile, melel la awac'beyix castigo te mero jmulawil ants te la sboltes ta smulwej spamal te balumilale. Dios la yac'beyix stoj te la smilbey te abatetic yu'une”, xiic. 3La yalic xan: “¡Ay yutsilal! Sbajt'el q'uinal yac ta moel xch'ailel te muc'ul lume”, xiic ta aw. 4Te chaneb xcha'winic (24) ta jtul mamaletic soc te chancojt' bitic cuxajtique la slajin sbaic ta stojol Dios te nacal ta smuc'ul nactijibe. Jich la yalic: “Jichuc ac'a c'otuc ta pasel. ¡Ay yutsilal!”, xiic. 5Soc la caiy stojol te ay mach'a c'opoj tey a ta bay te muc'ul nactijibale. Jich la yal: “Ja'ex ta apisilic te muc' biq'uitex te abatex yu'un te Diose te awich'ojic ta muq'ue, albeyaic jelawen yutsil sc'oplal te Dios cu'untique”, xi'. 6Soc la caiy stojol yan c'op te pajal yaiyel soc sc'op tsobol ants-winiquetic soc sc'op bayal snojel ja'etic soc sc'op tulan chawuc. Jich la yal: “¡Ay yutsilal! Melel jajch'ix ta mandal te Cajwaltique, te ja' Dios cu'untic te Spisil ya xju' yu'une. 7Ac'a me bujts'najuc co'tantic yu'un soc yacuc me ta tse'ej te co'tantique, soc ac'a calbeytic yutsilal te Diose, melel c'otix yorail te nujbinel yu'un te Alalchije. Xchajbanejix sba te yiname. 8Ac'botix ta swenta slapel te lequil lino-pac' te sacleman naxe”, xiic ta c'op la caiy. Te lequil lino-paq'ue, ja' seña te bila lec spasojic ta q'uinal te mach'atic ch'ul lum yu'un te Diose. 9Soc la yalbon te ch'ul abate: —Ts'ibuya ta jun in to: Bin nax me yutsilic te mach'atic ic'bilic ta we'el yu'un te q'uin swenta nujbinel yu'un te Alalchije —la yuton. Soc jich la yalbon xan: —Ja' in to, ja' smelelil sc'op te Diose —xi'. 10La jpajc'an jba ta yacan te ch'ul abate, yu'un c'an jlajin jba ta stojol. Ja'uc me to, jich la yalbon: —Ma me xapas jich. Melel te jo'one, yabaton uuc te Diose, jich te bit'ilate soc spisil awermanotac te jun yo'tanic ta xch'uunel te testigo-c'op la yal te Jesuse. Ja' me x'alajin aba ta stojol te Diose —la yuton. Melel te testigo-c'op la yal te Jesuse, ja'ix te ya x'at'ej ta yo'tanic te mach'atic j'alwanejetic yu'un te Diose. 11Soc la quil jamal te ch'ulchane. Chicnaj cojt' saquil caballo. Te mach'a cajal ta spate “Jun yo'tan”, soc “Smelelil”, xi' te sbiile. Yu'un toj ya yaiy chajbanwanej soc toj ya yaiy tsalaw. 12Te site jich yac ta tilel te bit'il yat c'ajc'. Ay bayal coronaetic ta sjol. Soc ay ts'ibubil sbiil te ma'yuc mach'a ya sna'e, te ja' nax ya sna' stojol stuquele. 13Te sc'u'e ts'ajbil ta ch'ich'. “Sc'op Dios”, xi' te sbiile. 14Ts'aclinot yu'un tsobol soldadoetic te ayic ta ch'ulchan. Slapojic lequil lino-pac' te buen saque, soc cajalic ta saquil caballoetic. 15Ta ye yac ta loq'uel puñal te ay ye te ya yejch'entes a te nacionetique, soc tulan me ya xmandalaj soc sbastón-taq'uin ta stojolic. Ya me stec' ta pits'el loq'uel te ya'lel ts'usube, te ja' seña te mero tulan yilimba te Dios te Spisil ya xju' yu'une. 16Soc ay sbiil ts'ibubil ta bay te sc'u'e soc ta bay te ya'e: “Muc' Ajwalil yu'un te muc' ajwaliletique, Ajwalil yu'un te ajwaliletique”, xi' te sbiile. 17Soc la quil jtul ch'ul abat te stec'oj te c'aale. Tulan yac ta yawtayel spisil te mutetic te yacalic ta wilel ta sjamalul te ch'ulchane: “La' me, tsoba abaic tel ta we'el ta bay chajbanbil yu'un te Diose. 18Ya me ati'beyic sbaq'uetal te muc' ajwaliletique, soc sbaq'uetal te capitán-soldadoetique, soc sbaq'uetal te tulan winiquetique, soc sbaq'uetal te caballoetique, soc sbaq'uetal te mach'atic cajajtic tey a, soc sbaq'uetal spisil ta jchajp ants-winiquetic chican teme libre ayique o teme ayic ta mosoile, teme muc' biq'uite”, xi' ta aw. 19Soc la quil te muc'ul chambalam te xi'bantic sbae soc te muc' ajwaliletic te ayic ta balumilale soc te soldadoetic yu'unique. Spisilic stsoboj sbaic ta yaiyel guerra soc te mach'a cajal ta saquil caballo soc ta spisilic uuc te soldadoetic yu'une. 20Te muc'ul chambalam te xi'bantic sbae, la yich' tsaquel ta chuquel soc te lotil j'alwanej te la yac' ta ilel seña yu'el ta stojole. Ta swenta te señaetic la yac' ta ilel te lotil j'alwaneje, ju' yu'un slo'layel a spisil te mach'atic la xch'uunic yich'el smarca te chambalam te xi'bantic sbae soc te la slajin sbaic ta stojol te sloc'ombae. Cuxul la yich'ic ch'ojel ochel ta xchebalic ta bay muc' pamal c'ajc' te yac ta tilel soc azufre. 21Te yantique lajic ta milel spisilic yu'un spuñal te yac ta loq'uel ta ye te mach'a cajal ta caballoe. Te mutetique, spisilic noj xch'ujt'ic yu'un sti'el sbaq'uetalic te mach'atic lajemique.


Copyright
Learn More

will be added

X\