Apocalipsis 18

1Patil la quil yan ch'ul abat te yac ta coel tel ta ch'ulchane. Chican te tulan yat'el yich'oje. Sacub q'uinal ta balumilal yu'un te yutsil xojobile. 2Tulan awun ta c'op la caiy. Jich la yal: “Jinemix. Jinemix te muc'ul lum Babiloniae. Nainbilix yu'un te pucujetique. Ja' yawiliquix spisil ta jchajp te pucujetic te ilaybile. Xluchtijib c'otix spisil ta jchajp mutetic te ilaybile. 3Yu'un yuch'ojbeyic svino spisil ta jchajp te nacionetique, ja' bi, sboltesej sbaic soc ta swenta te smulweje. Te muc' ajwaliletic ta balumilale yaiyojiquix mulwej soc. Te jp'olmaletic ta balumilale staojiquix bayal sc'ulejalic ta swenta spisil te bila mulanbil yu'un sbaq'uetal te muc'ul lume”, xi' ta aw. 4Ay yan mach'a c'opoj tel ta ch'ulchan la caiy te jich la yale: “Ja'ex te lumex cu'un, loc'anic tel tey a ta bay te muc'ul lume, swenta yu'un jich ma ba ya ajoinic ta sleel te smulique soc ma ba ya staex te castigo ya yich'e. 5Yu'un c'otix c'alal ta ch'ulchan te smulique. Te Diose yiloj spisil te bila amen la spase. 6Jich ac'a yich' ac'bel spacol te bila la yac'beyix te yantique. Ac'a stoj cheb buelta te bila spasoje. Cheb buelta ac'a esmajuc yip swocol te ya yich'e jich te bit'il la yac'bey yich' swocol te yantique. 7Te jich yipal la stoy sba soc te jich yipal la slajin sc'ulejal ta spasel te bila smulanej te sbaq'uetale, jich nix yipal ac'a c'axuc swocol ta uts'inel soc ta oq'uel. Melel jich ya yal ta yo'tan te muc'ul lume: ‘Jo'on muc' antsil-ajwalilon. Ma'yuc bi ora te ya xjilon ta me'ba antse. Ma xquil jwocol ta oq'uel jtuquel’, te xi' ta yo'tane. 8Ja' swentail te jun nax c'aal ya xtal castigo ta stojole. Ya xtal lajel, oq'uel soc wi'nal, soc ya me yich' chiq'uel ta c'ajc'. Melel ay bayal yip te Cajwaltic Dios te ya yac'bey castigoe”, xi' la caiy. 9Te muc' ajwaliletic ta balumilal te la yaiyic mulwej soque soc te la sjoinic ta slajinel sc'ulejalic ta spasel te bila smulanej te sbaq'uetalique, ya me x'oq'uic soc ya me smel yo'tanic yu'un te c'alal ya yilic te yac ta moel xch'ailel ta c'ajq'uele. 10Q'uejel to me ya stejc'an sbaic ta yilel ta scaj xiwel yu'un te castigo yac ta yich'ele. Jich ya yalic yu'un: “Obol nax aba, ja'at muc'ul lum Babilonia, te bayal awipe. Yu'un ora nax c'ot castigo ta atojol”, xiic ta smelel yo'tanic. 11Soc te jp'olmaletic ta balumilale ya me x'oq'uic yu'un te muc'ul lume soc bayal me ya smel yo'tanic yu'un. Melel ma'yuc mach'a ya xmanbotix yu'un te sp'olmalique. 12Ja' sp'olmalic te oro, plata, t'ujbil lequil tonetic, perlaetic, lequil lino-pac', seda-pac', tsaj'aman pac', te tsajal pac', soc spisil ta jchajp te'etic te ay sbujts' yiq'ue, soc te bila pasbil ta sbaquel ye te elefantee, t'ujbil te'etic, bronce, hierro, marmol-ton, 13canela, poxil te ay sbujts' yiq'ue, pom, mirra, perfumeetic, vino, aceite, lequil harina, trigo, wacaxetic, chijetic, caballoetic, carretaetic, mosoetic, soc yantic ants-winiquetic. 14Jich me ya yalbeyic te muc'ul lume: “Ma'yuquix awu'un spisil te sit awal-ts'unubil te mulanbil awu'un. Lajix yutsil spisil te ac'ulejal soc te bila bayal yutsilal te ay awu'une. Jc'axel me ma'yuc bi ya ataix”, xi' sc'oplal. 15Te mach'atic la yat'elinic xchonel in to soc te la sta sc'ulejalic ta swenta te muc'ul lume, q'uejel to me ya stejc'an sbaic ta yilel ta scaj xiwel yu'un te castigo yac ta yich'ele. Ya me x'oq'uic soc ya me smel yo'tanic yu'un, 16soc jich me ya yalic yu'un: “Mero obol sba te muc'ul lume, te slapoj lequil lino-pac' ta neelal, soc tsaj'aman pac' soc tsajal pac' soc xch'aloj sba ta oro soc ta t'ujbil lequil tonetic soc perlaetic. 17Ja'uc me to, ora nax laj ta spisil te jich yipal sc'ulejale”, xiic. Soc spisil te yajwal barcoetique soc te jbeometic te ayic ta barcoe soc te j'at'eletic te swentainejic te bit'il ya xbeen te barcoe soc spisil j'at'eletic te ya x'at'ejic ta bay te mare, q'uejel to la stejc'an sbaic. 18Te bit'il la yilic te yac ta moel xch'ailel ta c'ajq'uel te muc'ul lume, awunic yu'un. Jich la yalic ta aw: “Ma'yuc yan lum jich te bit'il in muc'ul lum to”, xiic yu'un. 19Soc la sjopic ts'ubilum, la sbusq'uin ta sjolic ta oq'uel yu'un te muc'ul lume. Bayal la smel yo'tanic soc la yoq'uetayic. Jich la yalic xan ta aw: “Mero obol sba te muc'ul lume. Ta swenta te sc'ulejale la sta sc'ulejalic spisil a te mach'atic ay sbarcoic ta mare. Ja'uc me to, ora nax laj ta spisil te lume”, xiic. 20Bujts'najuc me awo'tanic, ja'ex te ayex ta ch'ulchane soc te jpuc-c'opexe soc te j'alwanejex yu'un te Diose soc ja'ex te ch'ultesbilexe. Yu'un Dios la yac'beyix stoj te bila amen la spasbeyexe. 21Soc ay jtul ch'ul abat la quil te ay bayal yipe. La sq'uech muc'ul ton te pajal soc te muc'ul cha'. La xch'oj ochel ta mar. Jich la yal: “Jich me ya awich' ch'ojel coel, muc'ul lum Babilonia. Soc jc'axel me ya xch'ayat ta q'uinal. 22Xujt' ma xchicnaj xan ta aiyel stojol ta bay calleetic te sc'op arpae soc amay soc oq'ues ta atojol. Soc ma xchicnaj xan tey a te mach'atic ya sna'ic at'ele, soc ma x'aiyot xan stojol sc'op te molinoe. 23Soc ma xchicnaj xan xojobil c'ajc' ta atojol, soc ma'yuc bi ora xch'inch'on nax q'uinal yu'un spasel q'uin swenta nujbinel ta atojol. Melel te jp'olmaletic awu'une, buen ich'bilic ta muc' ta neelal ta balumilal. Soc la alo'lay spisil nacionetic a ta swenta te j'ac'chameletic awu'une”, xi' te ch'ul abate. 24Melel ta bay te muc'ul lume, chicnajix te tey malbil xch'ich'elic te j'alwanejetic yu'un te Diose soc te mach'atic ch'ul lum yu'un te Diose soc spisil yantic te lajemic ta milel ta balumilale.


Copyright
Learn More

will be added

X\