Apocalipsis 16

1La caiy stojol te ay mach'a tulan c'opoj loq'uel tel ta bay yutil templo te jich la yalbey te juctul ch'ul abatetique: “Baanic, malaic ta balumilal te juqueb copaetic te nojel ta yilimba te Diose”, utotic. 2Te sbabial ch'ul abate ba smal ta lumq'uinal te copa yich'oje. Chicnaj c'a'el-chamel te bayal stuile, c'ot ta swentaic te ants-winiquetic te yich'ojbeyic smarca te muc'ul chambalam te xi'bantic sbae soc te la slajin sbaic ta stojol te sloc'ombae. 3Te xchebal ch'ul abate ba smal ta mar te copa yich'oje. Te mare c'atp'uj ta ch'ich', jich bit'il xch'ich'el milbil winic yilel. Jich laj spisil te bitic cuxajtic ta bay te mare. 4Te yoxebal ch'ul abate ba smal ta muc' ja'etic soc ta sloc'ja'etic te copa yich'oje. Jich c'atp'uj ta ch'ich' spisil te ja'etique. 5La caiy stojol c'opoj te ch'ul abat te swentainej te ja'etique. Jich la yal: “Toj awo'tan atuquel, Cajwal te Ch'ul Diosate, te atalel ayat ta namey soc ta sbajt'el q'uinal, te melel la awaiyix chajbanwanej. 6Yu'un la smalbeyiquix xch'ich'el te mach'atic ch'ul lum awu'une soc te j'alwanejetic awu'une. Jich la awac'beyix yuch'ic ch'ich'. Jich ya sc'an pasbeyel yu'un te bit'il jich la spasique”, xi'. 7Soc la caiy stojol te ay mach'a c'opoj tey a ta bay xchic'jibal milbil smajt'an te Diose, te jich la yale: “Melel nix a Cajwal, te Diosat te Spisil ya xju' awu'une, toj awo'tan la awaq'uix castigo ta swenta te bila smelelile”, xi' ta yalel. 8Te xchanebal ch'ul abate ba smal ta bay c'aal te copa yich'oje. Jich ac'bot tulan yip sc'aal yu'un xchiq'uel ta c'axem to xan te ants-winiquetique. 9Ja'uc me to, ma ba la sujt'es yo'tanic yu'un te smulique, soc ma la yalbeyic yutsil sc'oplal te Diose. Ja' nax caj stoybac'optayic a te Dios te ya xju' yu'un yaq'uel te tulan castigoe. 10Te yo'ebal ch'ul abate ba smal te copa ta bay smuc'ul nactijib te muc'ul chambalam te xi'bantic sbae. Och ta ijc' q'uinal spamal te smaquen-q'uinale. Spisil la sti' yaq'uic yu'un xc'uxul te swocolique. 11Ja'uc me to, ma la sujt'es yo'tanic yu'un te bila amen la spasique. Ja' nax la stoybac'optayic a te Dios te ay ta ch'ulchane, ta scaj te toyol xc'uxul la yaiyic te sc'a'el-chamelique. 12Te swaquebal ch'ul abate ba smal ta bay muc'ja' Eufrates te copa yich'oje. Jich taquej te muc'ja'e, swenta yu'un jamal sbeic ya xc'otic a te muc' ajwaliletic te ya xtalic ta bay te sloq'uib c'aale. 13La quil chicnaj oxeb pucujetic te jich yilelic te bit'il xch'uch' te loc' tel ta ye te muc'ul chan te xi'bantic sba ta ilele soc ta ye te muc'ul chambalam te xi'bantic sbae, soc ta ye te lotil j'alwaneje. 14Ja' te espíritu yu'un te pucujetic te ya yaq'uic ta ilel jchajp at'eliletic soc ya stsobic spisil te muc' ajwaliletic te ayic ta balumilale. Yu'un ya me xtalic ta guerra te c'alal ya sta sc'aalelal te jun c'aal te mero muc' sc'oplal yu'un Dios te Spisil ya xju' yu'une. 15“Aiya awaiyic stojol, jich me ya xtalon te bit'il j'eleq'ue. Bin nax me yutsil te mach'a wiq'uil sit soc te slapoj sc'u' swenta yu'un ma me t'analuc ta comonsitil ya x'ilot yu'un ants-winiquetic te sbaq'uetale”, xi' te Cajwaltique. 16Jich te espíritu yu'un te pucujetique la stsobic tel spisil te muc' ajwaliletic ta bay te q'uinal te Armagedón sbiil ta hebreo-c'ope. 17Te sjuquebal ch'ul abate ba smal ta ic' ta bay sjamalul q'uinal te copa yich'oje. Ta bay templo ta ch'ulchan chicnaj tulan c'op te tey loc' tel a ta bay te muc'ul nactijibale, te jich la yale: “Ju'ix”, xi' la caiy. 18Jich xlemlajan nax jajch'el tsantsewal, soc ay bila bayal yac ta bul sc'op, soc tal tulan chawuc, soc nijc' te balumilale. C'ax jich nicot te bit'il yantic nijq'uel c'axemix tel te jayeb c'aal ayiquix tel ta balumilal te ants-winiquetique. 19Oxchajp loc' a te muc'ul lume, soc wuy coel ta spisil te muc'ul lumetic te ayic ta jujun nacione. Te muc'ul lum Babilonia sbiile, ma ba ch'ay ta yo'tan Dios te puersa la yac'bey yuch' te vino ja' te tulan yilimba te Diose. 20Spisil ch'ayic bael ta ilel te ch'in q'uinaletic te joytaybilic ta mare soc te witstiquile. 21Soc ch'ay coel ta ch'ulchan niwac bat te ay cha'winic (40) kilo yalal te juju-jp'ije. Te ants-winiquetique la stoybac'optayic Dios yu'un te muc'ul bate, te melel c'ax tulan te castigoe.


Copyrighted Material
Learn More

will be added

X\