Apocalipsis 15

1Ta ch'ulchan la quil yan muc'ul seña te yan sba ta ilele. Ja' bi, ay juctul ch'ul abatetic te yich'ojic te juqueb castigoetic te ya yac' ta patil, te ja' ya slajinbeyic yip yilimba a te Diose. 2Soc ay bi yan la quil te pamal jich bit'il mar te xlemet nax jich bit'il espejo te ay sc'aal yac ta tilel ta spamlejale. La quil tec'ajtic ta bay mar yilel spisil mach'atic te ju' yu'unic te ma ba la yich'ic ta muc' te muc'ul chambalam te xi'bantic sbae soc te sloc'ombae soc snumeroil te sbiile. Yich'ojic ta sc'abic yarpaic te ac'botic yu'un te Diose. 3Soc yacalic ta sc'ajintayel sc'ayoj Moisés te abat yu'un te Diose soc sc'ayoj te Alalchij te jich yacalic ta yalele: “Cajwaltic Dios te spisil ya xju' awu'un, c'ax muc' spisil te awat'ele soc jelawen yutsil spisil te bila ya apase. Ja'at Muc' Ajwalilat yu'un spisil ta jchajp te nacionetique. Toj awo'tan atuquel soc smelelil stuquel te be awu'une. 4¿Cajwal, ay bal mach'a te ma xi'ate? ¿Soc ay bal mach'a te ma xyalbat yutsil ac'oplale? Melel atuquel nax te ch'ul Diosate. Ya me xtalic ta atojol spisil ta jchajp te nacionetique soc ya me slajin sbaic ta atojol. Yu'un chican ta comonsitil te toj spisil te bila la apasixe”, xiic ta c'ayoj la caiy. 5Patil la quil jam te nailpac' templo yu'un Dios te ay ta ch'ulchane, te banti q'uejbil te trato yu'un te Diose. 6Tey loq'uic tel ta templo te juctul ch'ul abatetic te yich'ojic te juqueb castigoetique. Slapojic lino-pac' te xujt' ma ba ts'ilajem te xlemet nax ta ilele. Te xchujq'uil ch'ujt'ique pasbilic ta oro soc chucul c'alal ta yo'tanic. 7Soc ay cojt' ta xchancojt'ol te bitic cuxajtique la yac'bey ta sc'abic te juctul ch'ul abatetic te juqueb copaetic te pasbil ta oro te nojelic ta yilimba Dios te stalel cuxul sbajt'el q'uinale. 8Noj ta ch'ail te temploe. Ja' xch'ailel xojobil yutsilal soc yu'el te Diose. Jtul ma'yuc mach'a ya xju' yu'un te ya x'och tey a ja' to teme lajix ta pasel a te juqueb castigoetic yich'oj ta sc'abic te juctul ch'ul abatetique.


Copyright
Learn More

will be added

X\