Apocalipsis 13

1La stejc'an sba ta bay sji'al mar te muc'ul chane. La quil loc' tel ta mar muc'ul chambalam te xi'bantic sbae, ay juqueb sjol soc lajunch'ix xulub. Ta juju-jch'ix te xulube ay scorona, soc ta bay juju-jp'ij te sjole ts'ibubil sbiil swenta stoybac'optayel te Diose. 2Te muc'ul chambalam te xi'bantic sbae pajal yilel soc te leopardo-choje. Te yacane jich yilel te bit'il yacan te osoe. Te yee jich yilel te bit'il ye te león-choje. Te muc'ul chan te xi'bantic sbae la yac'bey yu'el soc la yac'bey snactijibin te smuc'ul nactijibe soc la yac'bey yich' tulan yat'el. 3Te muc'ul chambalam te xi'bantic sbae ay jun sjol te ay yejch'en te ya xlaj yu'un yilele, ja'uc me to, la yich' poxtayel te yejch'ene. Spisil te mach'atic nainemic ta balumilale bayal ayan yo'tanic yu'un. Jich la yich'ic ta muc' te muc'ul chambalam te xi'bantic sbae. 4La slajin sbaic ta stojol te muc'ul chan te xi'bantic sbae te yac'ojbey yich' yat'el te muc'ul chambalam te xi'bantic sbae. Soc la slajin sbaic ta stojol te muc'ul chambalam te xi'bantic sbae. Jich la yalic: “¿Mach'a me pajal soc te muc'ul chambalam te xi'bantic sbae? ¿Ay bal mach'a ya xju' yu'un te ya stsal sba soque?”, xiic la caiy. 5Te muc'ul chambalam te xi'bantic sbae, ac'bot permiso te ya yal te bila muc' ya xju' yu'un spasel, soc te ya stoybac'optay te Diose, soc ac'bot yich' yat'el te ya xjalaj ta at'el cheb yoxwinic (42) ue. 6Jich jajch' scontroc'optay te Diose, soc jajch' yixta-c'optaybey te sbiile soc te templo yu'une soc te mach'atic nainemic ta ch'ulchane. 7Soc ac'bot permiso te ya spas guerra soc te mach'atic ch'ul lum yu'un te Diose, ja' to teme la stsale. Soc ac'bot yich' yat'el ta stojol spisil ta jchajp sts'umbal te ants-winiquetique soc spisil ta jchajp lum te yanyantic sc'opique soc te yanyantic nacionetique. 8Spisil te mach'atic nainemic ta balumilale la slajin sbaic ta stojol te muc'ul chambalame, ja' te mach'atic ma nacaluc sbiilic ta lista swenta cuxinel te yich'oj te Alalchij te laje, te la yich' ts'ibuyel c'alal to te bi ora pastaj te ch'ulchan balumilale. 9Teme ay achiquine, aiya me awaiy stojol: 10Te mach'a jich sc'oplal ya yich' chuquel, ya me yich' chuquel. Soc te mach'a jich sc'oplal ya yich' milel ta puñal, ya me yich' milel ta puñal. Ja' in to ja' smuc'ul co'tantic te ya sts'ijc' cu'untic ta swenta xch'uunjel co'tantic soc te mach'atic ch'ul lum yu'un te Diose. 11Patil la quil yan muc'ul chambalam te xi'bantic sbae, te loc' tel ta lumq'uinale. Ay cha'ch'ix xulub jich bit'il xulub te alal chije, ja'uc me to, jich sc'op te bit'il muc'ul chan te xi'bantic sbae. 12Te bila ya spase, ja' ya spas ta swenta te bit'il ay yat'el yich'oj te sbabial muc'ul chambalam te xi'bantic sbae. Ja' ya x'at'ej ta stojol soc jich la yac'bey slajin sbaic spisil mach'atic ainemic ta balumilal ta stojol te muc'ul chambalam te xi'bantic sba te colemix yejch'ene. 13Soc la yac' ta ilel bayal ta jchajp smuc'ul seña yu'el, la yac' ch'ayuc tel c'ajc' ta ch'ulchan ta stojolic te mach'atic nainemic ta balumilale. 14Soc ta swenta seña yu'el te ac'bot spas yu'un te sbabial muc'ul chambalam te xi'bantic sbae, la slo'lay te mach'atic nainemic ta balumilal. Jich la yal mandal te ya me spasbeyic sloc'omba te muc'ul chambalam te xi'bantic sba te la yich' ejch'entesel ta puñal te ju' yu'un te cuxine. 15Soc ac'bot ta swenta te ya yac' cuxinuc sloc'omba te sbabial chambalam te xi'bantic sbae, swenta yu'un jich me ya xc'opoj te loc'ombae soc swenta yu'un jich ya yac' ta milel spisil te mach'a ma sc'an slajin sbaic ta stojole. 16Soc la yal te puersa me ya x'ac'bot yich'ic marca ta swa'el sc'abic o teme ta stibaic spisil ants-winiquetic manchuc teme muc' biq'uite, teme jc'uleje o teme ma'yuc bi ay yu'unique, teme ayic ta libre o teme ayic ta mosoile. 17Jtul ma'yuc mach'a ya yaiy manbajel soc chonbajel teme ma ba yich'oj te marcae o te sbiil te muc'ul chambalam te xi'bantic sbae, o te snumeroil te sbiile. 18Ja' in to, ya sc'an te ay sp'ijil co'tantic ta sna'el te snumeroile. Te mach'a ay sp'ijil yo'tane, ac'a yajtaybey snumero te muc'ul chambalam te xi'bantic sbae, te ja' snumeroil te winique. Te snumeroile seiscientos sesenta y seis (666) ja' bi olil xcha'bajc' soc waqueb xchanwinic.


Copyright
Learn More

will be added

X\