Apocalipsis 12

1Soc chicnaj muc'ul seña ta yolil ch'ulchan, ja' bi jtul ants te sc'u'inej te c'aale soc stejc'abinej te ue, soc scoronainej lajchayeb ec' ta sjol. 2Te antse ay yic'oj alal ta xch'ujt'. Yac ta aw yu'un xc'uxul te alajele. Ay bayal swocol yu'un te ya x'ayine. 3Soc chicnaj yan seña ta yolil ch'ulchan, ja' te muc'ul tsajal chan te xi'bantic sbae. Ay juqueb te sjole soc lajunch'ix xulub, soc ay scorona juju-jp'ij te sjole. 4Ta sne la smes coel jteb ma oliluc te eq'uetic ta ch'ulchane, soc la xch'oj coel ta balumilal. Te muc'ul chane la stejc'an sba ta stojol te ants te ya x'ayinix te yale, swenta yu'un ya me sbic'bey ta ora te c'alal ya x'ayine. 5Ayin squerem-al te antse, te ja' tulan ya xmandalaj soc sbastón-taq'uin ta stojol spisil ta jchajp te nacionetique. Ic'ot moel yu'un Dios ta ch'ulchan ta ora nax te yale, ta bay te smuc'ul nactijib te Diose. 6Yan te antse, an bael c'alal jochol taquin q'uinal ta banti ay yawil te chajbanbil yu'un te Diose, swenta yu'un tey ya yich' mac'linel oxbajc' soc oxwinic (1260) c'aal a. 7Patil la quil te ay guerra ta yolil ch'ulchan. Te wolwanej ch'ul abat Miguele soc te ch'ul abatetique la stsal sbaic soc te muc'ul chan te xi'bantic sbae. Te chane soc te abatetic yu'une la yaq'uic puersa ta guerra, 8ja'uc me to, ma ju' yu'unic te tsalawe. Jich ma la staiquix te banti ya x'ainic ta bay te ch'ulchane. 9Jich la yich' ch'ojel loq'uel ta fuera te muc'ul chan te xi'bantic sbae. Ja' te namey q'uinal muc'ul chan te Pucuj sbiil soc Satanás sbiil te ya slo'lay spisil te mach'atic ainemic ta balumilale. Te Pucuje soc te abatetic yu'une, la yich'ic ch'ojel coel ta balumilal. 10Soc la caiy stojol te ay mach'a tulan yac ta c'op ta ch'ulchan te jich la yale: “Talix yorail te colele. Te Cajwaltic Diose ay yu'el soc ja' ay ta ajwalinel stuquele, soc yac'ojbeyix yat'el te Cristo yu'une. Yu'un la yich'ix ch'ojel loq'uel ta fuera te mach'a la sleulaybey smul te quermanotactic, te c'aal ajc'ubal la sleulaybey smulic ta stojol te Dios cu'untique. 11Te quermanotactique la stsaliquix ta swenta xch'ich'el te Alalchije soc ta swenta te sc'op Dios te la stejc'an sbaic ta testigo yu'une. Melel ma la xc'uxtay sbaic soc te xcuxlejalique. Jun nax yo'tanic la yac' sbaic ta lajel yu'un. 12Jich yu'un bayaluc me sbujts' awo'tanic, ja'ex te ainemex ta ch'ulchane. ¡Ay, ja'ex te nainemex ta balumilal soc ta bay te mare ya me awil awocolic! Yu'un coix tel ta banti ayex te Pucuje. Bayal lijq'uem sjol, yu'un sna'ojix stojol te ma'yuquix bayal c'aale”, xi'. 13Te muc'ul chan te xi'bantic sbae la sna' te ch'ojbilix coel ta balumilale. Jich ba snuts te ants te ayinemix squerem-ale. 14Te antse ac'bot xiq'uin xchebal xic' te muc'ul águila, swenta yu'un ya xju' ya xwil bael c'alal ta bay yawil ta jochol taquin q'uinal te c'ubul ya yil sba soc te chane. Tey ya yich' mac'linel olil xchaneb ja'wil a. 15Te chane la smal loq'uel ja' ta ye. Jich c'ot te bit'il muc'ja', yu'un ya me xlicot bael yu'un te antse. 16Ja'uc me to, te antse la yich' coltayel yu'un te lumq'uinale. Melel te lumq'uinale la sjam sba ta yuch'el te muc'ja' te mal loq'uel ta ye te muc'ul chan te xi'bantic sbae. 17Jich te muc'ul chane c'axem to xan ilin yo'tan ta stojol te antse. Jich ba yaiy guerra soc te jich yipal te sts'umbal xane, ja' bi, ja' te mach'atic yat'elinejic xch'uunel smandal te Diose soc te jun yo'tan yich'ojic ta muc' te testigo-c'op yaloj te Jesucristoe.


Copyrighted Material
Learn More

will be added

X\