Apocalipsis 11

1Soc ac'boton ta jc'ab ch'ix jalal swenta sp'isjibal soc jich alboton: —Jajch'an, p'isa te templo yu'un te Diose soc te scajtijib majt'anile, soc ajtaya te jayeb ta jtul te mach'atic ya slajin sbaic tey a. 2Ja'uc me to, ma me xap'is stuquel te yamac'ul te temploe, yu'un ac'botix ta swenta te jyanlumetique. Ya me xpajc'ub ta teq'uel yu'unic che'yoxwinic (42) u te muc'ul lume. 3Soc ya me jticun cheb testigoetic cu'un te ya xc'opojic ta j'alwanej cu'un oxbajc' soc oxwinic (1,260) c'aal te slapojic ch'ixal pac' swenta mel-o'tan —xi' la caiy. 4Te cheb testigoetique, ja' te cheb oliva-te' soc te cha'ch'ix yawil c'ajc' te tec'ajtic ta stojol te Cajwaltic te ja' Dios yu'un te balumilale. 5Teme ay mach'atic ya sc'an ya x'uts'inotic yu'un te cheb testigoetique, ya xloc' c'ajc' ta yeic te jc'axel ya xlaj ta ora yu'un te yajcontroique. Jich yu'un puersa me ya xlaj teme ay mach'a ya sc'an ya yuts'ine. 6Te testigoetique ay me yu'elic ta smaquel te ch'ulchane, swenta yu'un ma ba ya xtal ja'al te jayeb c'aal ya xc'opojic ta j'alwaneje. Soc ya xju' yu'unic te ya sc'atp'unic ta ch'ich' te ja'e, soc ya xju' yu'unic te ya yac' c'axuc spisil ta jchajp swocol te balumilale, chican jayeb buelta ya sc'an yo'tanic te ya spasique. 7Ja'uc me to, c'alal ju'ix yu'unic a te yat'elic ta testigoe, ya me xloc' tel ta xaab te muc'ul chambalam te xi'bantic sbae. Ya me spasic guerra soc ya me stsalotic yu'un, soc jc'axel ya xmilotic yu'un. 8Tixil me ya xjil sbaq'uetalic ta calle ta bay muc'ul lum te banti la yich' jijp'anel ta cruz te Cajwaltique, te muc'ul lum Sodoma sbiil soc Egipto sbiil ta alel sc'oplal. 9Te lumetic te yanyantic sts'umbalique soc te yanyantic sc'opique soc te yanyantic nacionetique, olil xchaneb c'aal ya me yilbeyic sbaq'uetalic te tixilic ta comonsitil. Ma xyac'beyic te ya yich' muquel te sbaq'uetalique. 10Te mach'atic nainemic ta balumilale, ya xbujts'naj yo'tanic ta lec yu'un te lajemic ya yilique, soc ya spasic q'uin yu'un, soc ya yac'bey sbaic smajt'anic yu'un. Melel bayal c'ax swocolic ta swenta te cheb j'alwanejetic yu'un te Diose. 11Ja'uc me to, te c'alal c'axix a te olil xchaneb c'aale, te Diose la xcha'cuxes te testigoetique. Jich tejc'aj jajch'el. Spisil te mach'atic la yilique, och bayal xiwel ta yo'tanic yu'un. 12Te cheb testigoetique la yaiyic stojol te ay mach'a tulan c'opoj tel ta ch'ulchan te jich albotic yu'une: “Moanic tel li'to”, xi' sc'oplalic. Jich potsolic moel ta tocal c'alal ta ch'ulchan ta sit te yajcontroique. 13Ora nax a tal tulan nijq'uel. Jin xejt' ta slajunxejt'el te muc'ul lume, soc jucmil (7,000) ta jtul ants-winiquetic laj yu'un te tulan nijq'uele. Jich te ants-winiquetic te cuxulic jilele, och xiwel ta yo'tanic yu'un. Caj yalbeyic yutsilal te Dios te ay ta ch'ulchane. 14C'axix te xcha'cumul woclajele. Ja' ya xtalix te yoxebal woclajele. 15Te sjuquebal ch'ul abat la yoq'uesin te oq'uese. Ay mach'atic tulan c'opojic ta ch'ulchan la caiy te jich la yalique: “Spisil te muc' ajwaliletic ta balumilal soc te bila ay ta swentaique, ayix ta swenta stuquel te Cajwaltique soc te Cristo yu'une. Ja' me ay ta ajwalinel sbajt'el q'uinal stuquel”, xiic la caiy. 16Jich te chaneb xcha'winic (24) ta jtul mamaletic te nacalic ta smuc'ul nactijibic ta stojol te Diose, la spajc'an sbaic ta lum ta yich'el ta muc' te Diose. 17Jich la yalic: “Ya me caltic wocol ta atojol, Cajwal, Diosat te Spisil ya xju' awu'une. Atalel ayat ta namey, ta ora to soc te nopol ya xtalatixe. Melel la awaq'uix ta ilel te smuc'ul awu'ele. Jich ayatix ta ajwalinel atuquel. 18Ilinix yo'tanic te nacionetique. Ja'uc me to, c'otix yorail te awilimbae, soc c'otix yorail te ya awilbey yat'elic te mach'atic lajemique, soc te ya awac'bey stojol sc'abic te abatetic awu'un te yacalic ta yaiyel j'alwaneje, soc te jayeb te mach'atic ch'ul lum yu'un te Diose, soc spisil mach'atic yich'oj ta muc' te abiile, chican teme muc' biq'uite, soc c'otix yorail te ya awac' ta lajel te mach'atic ya sboltesic te balumilale”, xiic ta yalel. 19Jich jam te templo yu'un Dios te ay ta ch'ulchane. Tey la quil a te xcaxail te trato te ay ta yutil te temploe. Soc chicnaj jajch'el tsantsewal soc ay bila yac ta bul ta c'op la caiy soc tal tulan chawuc, soc tulan nijq'uel, soc tal tulan bat.


Copyright
Learn More

will be added

X\