Apocalipsis 10

1Soc la quil coj tel ta ch'ulchan yan ch'ul abat te bayal yipe. Potsol tel ta tocal soc ay arco iris joyol ta sjol. Te sit yelawe xlememet nax xojobil jich bit'il te c'aale. Te yacane jich yilel te bit'il muc'ul oy te tsajxojan nax sc'aale. 2Sjamoj ta sc'ab ch'in balbil jun te slechoje. Jich la stec' ta swa'el yacan te mare soc la stec' ta xq'uexen yacan te lum q'uinale. 3Tulan awun ta c'op jich bit'il ya x'awun te león-choje. Te c'alal awune, ay juqueb chawuc te awunic ta sjac'bel te sc'ope. 4Te c'alal laj yo'tanic ta c'op te juqueb chawuque, c'an jts'ibuy te bila la yalique. Ja'uc me to, ay mach'a c'opoj tel ta ch'ulchan la caiy te jich la yalbone: —Muca me ta awo'tan te bila la yalic te juqueb chawuque. Ma me xats'ibuy ta jun —la yuton. 5Te ch'ul abat te teq'uel la quil ta mar soc ta lum q'uinale, la stoy moel swa'el sc'ab ta ch'ulchan. 6Jich la yac' ta testigo te Mach'a stalel cuxul sbajt'el q'uinal te la spas te ch'ulchane soc spisil te bitic tey ae, te balumilale soc spisil te bitic tey ae, te mare soc spisil te bitic ay tey ae, jich la yal: “Ma ba jalix c'aal. 7Melel te c'alal ya xc'ot yorail te ya xc'opoj te sjuquebal ch'ul abate, ya me xcaj yoq'uesin te oq'uese. Tey c'otix ta pasel a te bila muquen ay ta yo'tan Dios te la yalbey yaiyic te abatetic yu'une, ja' bi, ja' te j'alwanejetic yu'une”, xi' la caiy. 8Te mach'a c'opoj tel ta ch'ulchan la caiye, la sc'oponon xan. Jich la yalbon: —Baan tsaca te ch'in balbil jun te jamal slechoj ta sc'ab te ch'ul abat te teq'uel ta mar soc ta lum q'uinale —la yuton. 9Jich noptsajon ta bay te ch'ul abate. La jc'anbey te yacuc yac'bon te ch'in june. Te ch'ul abate jich la yalbon: —Ila, bic'a coel. Te awee chi' ya yaiy jich bit'il xchi'il te chabe. Yan te ach'ujt'e, ya xch'aub yu'un stuquel —xi'. 10Jich la jtsac te ch'in jun te ay ta sc'ab te ch'ul abate soc la jbic' coel. Te quee chi' la yaiy jich bit'il xchi'il te chabe. Yan te c'alal lajix ta biq'uel cu'un ae, ch'aub ta jch'ujt' la caiy. 11Jich la yalbon xan: —Puersa me ya awaiy xan j'alwanej yan buelta te bit'il ay sc'oplal yu'un Dios bayal ta pam lumetic soc bayal ta jchajp nacionetic, te yanyantic sc'opique soc te yanyantic muc' ajwaliletic yu'unique —la yuton.


Copyright
Learn More

will be added

X\