Filipenses 3

1Jich yu'un quermanotac, ta ora to ayuc me sbujts' awo'tanic ta swenta te Cajwaltique. Ma wocoluc ya caiy te ya jcha'ts'ibubeyex xan te bila calojbeyexe, swenta yu'un ya me xtuun awu'unic. 2Tsajtaya me abaic yu'un te mach'atic ts'i'etique, tsajtaya me abaic yu'un te j'at'eletic te amenique, soc tsajtaya me abaic yu'un te mach'atic yat'elinejic sbojel te baq'uete. 3Yan te jo'otique quich'ojtic te mero circuncisione. Melel ta swenta nax te Espíritu te yacotic ta abatinel yu'un te Diose. Jich bayal sbujts' co'tantic ta swenta te Cristo Jesuse; ma ba ja' ya smuc'ulin co'tantic te bila ya yich' pasel ta jbaq'uetaltique. 4Teme ay mach'a ya smuc'ulin yo'tan te bit'il ay ta swenta te sbaq'uetale, c'axem to xan ya xju' ya quich' jba ta muc' uuc te jo'one. 5Melel te jo'one ta swaxaquebal c'aal cayinel a te la quich' ta jbaq'uetal te circuncisione, mero israel-winicon, sts'umbalon te Benjamine, mero hebreo-winicon, fariseoon yu'un te mandalile. 6Mero tulan sc'oplal ta co'tan te bila jnopoje, jich la jcontroin te jch'uunjeletique. Soc tojobenon ta jc'op ta swenta spasel te bi ya yal te mandalile. Ma'yuc falta cu'un tey a. 7Ta spisil in to, la jcuy te ay bayal te bila ya jta yu'une. Yan ta ora to, te bit'il ya jna'beyix sba te Cristoe, xujt' ma'yuquix sc'oplal cu'un ta spisil. 8Soc spisil te bitic ay ta q'uinale, mero ma'yuquix sc'oplal ta co'tan, ja' nax ay sc'oplal te ya jna'beyix sba ta lec te Cajwal Cristo Jesuse. Ja' ta swenta Cristo te la jch'ay jilel ta spisil. Jich c'oemix ta co'tan te bit'il c'a'pal, swenta yu'un ja' me ay sc'oplal cu'un ya xc'ot stuquel te Cristoe, 9soc jun me ya xc'oon soc te Cristoe. Jich ma ja'uc tojobenon yu'un spasel te mandalile, ja' nax ta swenta xch'uunjel co'tan ta stojol Cristo te bit'il lec ya x'iloton yu'un te Diose, ja' ta swenta te xch'uunjel co'tane. 10Ja' ya jc'an te yacuc jna'bey sba ta lec te Cristoe, soc te yacuc caiy ta co'tan te yu'el Dios te la yich' cuxesel tel ae, soc te yacuc cac' jba ta woclajel uuc jich te bit'il c'ax swocole, soc te yacuc jnopbey yo'tan te bit'il la yac' sba ta lajele. 11Ja' ya jmaliy te ya sta yorail te ya xcha'cuxon tel uuc ta banti te animaetique. 12Ma yu'unuc ju'emuquix cu'un spisil te bit'il jich ya cale, soc ma xju' ya cal te jc'axel toj ayonixe. Ja'uc me to, ya me cantay bael te lecuc ya xc'oone, melel ja' swentail te la staon te Cristo Jesuse. 13Quermanotac, ma xju' xjelawon ta yalel te jtaojix c'oele. Jun nax te bila ay sc'oplal ta co'tan te ya jpase: Ya jch'ay jilel ta co'tan te bila jilix cu'un ta jpate. Ja' nax me ya cantay te bila ay bael ta jtojole. 14Ya me cantay bael ta banti albil te ya xc'oone. Jich me ya quich' jmajt'an te muc' sc'oplal te bit'il ya yic'on moel ta ch'ulchan te Diose ta swenta Cristo Jesús. 15Jich yu'un, te jayebotic te ayix xch'uunjel co'tantic ta stojol te Diose, jich me ac'a jna'tic ta jpisiltic. Teme ay to ma jichuc anopojic te ja'exe, ja' me ya yac'beyex ana'ic te Diose. 16Ja'uc me to, ta bay c'alal c'oemix ta co'tantique, jich me ac'a jna'tic soc jich me ac'a jpastic. 17Quermanotac, nopbonic me te co'tane. Soc ja' me ejemplo awu'unic te mach'atic jich cuxulic ta q'uinal te bit'il ac'botex anopic cu'untique. 18Yu'un ayix bayal buelta te la calbeyex awaiyique, soc yacon ta oq'uel te ya calbeyex xane: Yu'un ay tsobol te scontroinejic te bit'il laj ta cruz te Cristoe. 19Te c'alal ya xlajique, ch'ayel me ya xbajt'ic. Melel ja' dios yu'unic te sbaal xch'ujt'ique, soc ja' yutsilal ya yaiyic te bila swenta q'uexlale, soc ja' baem ta yo'tanic te bitic swenta nax te balumilale. 20Yan te jo'otique ja' jlumaltic ya xc'ot te ch'ulchane. Ja' yacotic ta smaliyel te ya xtal te Jcoltaywaneje, ja' te Cajwaltic Jesucristoe. 21Ya me xtal sc'atp'unbotic jbaq'uetaltic te ma'yuc yutsile, swenta yu'un pajal ya xc'ot soc sbaq'uetal te ay yutsilal stuquele. Jich me ya spas ta swenta yu'el, te ja' nix ya spas ta mandal a spisil te bitic aye.


Copyright
Learn More

will be added

X\