Filipenses 2

1Jich yu'un teme muc'uben q'uinal ya awaiyic yu'un te Cristoe, soc teme muc'uben q'uinal ya awaiyic yu'un te bit'il c'uxex ta yo'tane, soc teme sjoinejex te Espíritu yu'une, soc teme bayal c'ux ya awaiy abaique, 2jich yu'un nojesbonic sbujts' co'tan. Jun nax me xawac' abaic ta swenta te xc'uxul awo'tanique. Pajaluc me te ac'opique soc junuc nax me te bila anopojique. 3Ma me xale atuquelic te bila ya awac' abaic ta ich'el ta muc' yu'un ta swenta atoybaelic te juju-jtulexe. Peq'uel me xawac' abaic. Ja'uc me cajal sc'oplal ta awo'tanic te mach'atic jun ayex soque. 4Ma me ayuc jtuluquex te atuquel nax ya ale te awutsilale; ya me sc'an ya alebeyic yutsilalic uuc te yantique. 5Ja' me xanopic te bit'il ay yo'tan stuquel te Cristo Jesuse: 6Te bit'il stalel Dios stuquel, ja'uc me to, ma ja'uc tulan sc'oplal bajt' ta yo'tan te bit'il pajal ay soc te Diose. 7Jich la yijq'uitay jilel ta yo'tan te bila ay yu'une. Mero abat la yac' sba. Pajal soc ants-winiquetic ain ta balumilal. 8In te bit'il pajal c'ot soc te ants-winiquetique, c'ax peq'uel la yac' sba. Jun yo'tan la xch'uun te ya xbajt' ta lajele, soc la xch'uun milel ta cruz. 9Ja' swentail te Dios toyesbot sc'oplal ta ich'el ta muc' yu'un. Ac'bot sbiil c'ax to jich ay ta ich'el ta muc' a te bit'il yantic biililetique. 10Jich yu'un ta swenta sbiil te Jesuse, ya me squejan sbaic te mach'atic ayic ta ch'ulchane, soc te mach'atic ayic ta balumilale, soc te mach'atic ayic ta yanil te balumilale. 11Spisilic ya me yalic ta jamal te ja' Ajwalil stuquel te Jesucristoe. Jich me jelawen yutsil sc'oplal ya xc'ot te Jtatic Dios yu'une. 12Jich yu'un, quermanotac te bayal c'uxex ta co'tane, jich te bit'il la ach'uunbonic jmandal spisil ora te c'alal joinejex to ae, c'axem to xan ch'uunbonic me jmandal te bit'il q'uejel ayonixe. Ayuc me sc'oplal ta awo'tanic te acolelique. Xiwanic me, soc nijc'uc me awo'tanic. 13Melel yac ta at'el ta awo'tanic te Diose. Ja' me ya yac' ta awo'tanic sna'el te bila lec yo'tan yu'une, soc ya me scoltayex ta spasel. 14Spisil te bila ya apasique, ma me xamuquen ayantay abaic yu'un, soc ma me xjajch' c'op awu'unic a. 15Jich ma x'ata amulic a, soc ma me ayuc bila quechel ta awentaic. Jich me lequil alnich'anex yu'un Dios ta yolil te ants-winiquetique te amen yo'tanique soc te ixta yo'tanique. Jich me xojobajemex ta yolilic te bit'il eq'uetic te ya xojobaj ta ijc' q'uinale. 16Jich yu'un q'ueja me ta awo'tan te sc'op Dios swenta cuxinele. Jich me bin nax co'tan awu'unic ta stojol Cristo te c'alal ya xtale, melel jna'oj te ma tojoluc te beenone soc ma tojoluc te la cac' jwocol ta at'el ta atojolique. 17Manchuc teme ya jmal jch'ich'el jbaq'uetal ta swenta sts'actijib te smajt'an Dios awu'unique, ya me xbujts'naj co'tan ta lec yu'un, soc ya me xbujts'naj awo'tanic yu'un uuc te ja'exe. 18Bujts'najuc me awo'tanic jiche. Pajaluc me ayuc sbujts' co'tantic ya caiytic yu'un ta jpisiltic. 19Teme jich ya sc'an te Cajwaltic Jesuse, jnopoj te ya me jticunbeyex tel ta ora te ya xtal yilex te Timoteoe. Jich me ya xbujts'naj xan co'tan teme la caiy stojol te bi awilelique. 20Melel ma'yuc yan mach'a jich pajal yo'tan soc, te bit'il bayal sc'oplal ta yo'tan te lecuc ya xc'oex ta loq'uele. 21Yan te yantique spisilic baem nax yo'tanic ta sleel te bila ya sc'an yo'tan stuquelique. Xujt' ma'yuc sc'oplal ta yo'tanic te bila ya sc'an yo'tan te Cristo Jesuse. 22Te ja'exe awilojiquix te bi yilel yutsil yo'tan te Timoteoe. Jich bit'il jnich'an c'oem te la scoltayon ta at'el soc la sjoinon bael ta xcholel te lec yach'il c'ope. 23Jich jnopoj te ja' to me ya jticunbeyex tel a teme la caiyix stojol te bit'il ya xc'oon ta chajbanele. 24Ja'uc me to, jich xch'uunej co'tan ta swenta te Cajwaltique te ya xtal quilex ta ora uuc te jo'one. 25Soc la jnop te puersa la jticunbeyex tel te quermanotic Epafrodito, te joy ta at'el soc ta tsalwaneje, te ja' la aticunic tel yu'un te ya yac'bon te bila ya xtuun cu'une. 26Soc toyol yo'tan te ya yilbeyex xan asitique, melel la smel yo'tan yu'un te awaiyojic stojol te ay ta chamele. 27Melel nix a te tsacot ta chamele soc jc'axel c'an lajuc, ja'uc me to, Dios la yich' c'uxtayel yu'un. Ma ja'uc nax stuquel te la yich' c'uxtayele. Jo'on la quich' c'uxtayel uuc, swenta yu'un ma me ayuc bi yan xan te ya jmel co'tan yu'une. 28Jich yu'un bin nax co'tan la jticunbeyex tel, swenta yu'un teme ya awilbeyic xan site, jich me ya xbujts'naj awo'tanic yu'un. Jich me ma c'axemuc to xan ya jmel co'tan uuc te jo'one. 29Bayaluc me sbujts' awo'tanic ya awic' ta atojolic ta swenta te Cajwaltique. Soc ich'aic me ta muc' uuc spisil te mach'a pajal yo'tan soque. 30Melel jteb ma laj yu'un te bit'il la yac' sba ta abatinel ta stojol te Cristoe. Ja' te bit'il ma la xc'uxtay sba te la yac' sba ta abatinel cu'une. Ja' la ajelolinic te bit'il ma ju' awu'unic te tal awac' abaic ta abatinel cu'une.


Copyright
Learn More

will be added

X\