Filipenses 1

1Jo'on Pabloon soc te Timoteo te abatotic yu'un te Jesucristoe, ya jpatbeyex awo'tanic ja'ex te ch'ul lumex yu'un te Diose soc te jun ayex soc te Cristo Jesús, te ayex ta lum Filipos soc te jwentainwanejetic awu'unic soc te diaconoetique. 2Ac'a yac'beyex yutsil yo'tan soc lamal q'uinal te Jtatic Diose soc te Cajwaltic Jesucristoe. 3Jujun buelta te ya xjulex ta co'tane, ya calbey wocol Dios ta awentaic. 4Jich bayal sbujts' co'tan ya jc'oponbeyex Dios spisil ora ta apisilic. 5Yu'un ya jna' te bit'il jun nax ayotic ta spuquel te lec yach'il c'op ta xjajch'ibal ja' to ta ora to. 6Xch'uunej co'tan te Dios ya sju'tes te lequil at'elil te la sjajch'es ta pasel ta awo'tanic, ja' to te bi ora ya xtal te Jesucristoe. 7Ja' lec te jich ya jna'ex ta co'tan ta apisilic te melel ayex ta co'tan ya caiy. Melel pajal ay yutsil yo'tan Dios cu'untic ta jpisiltic. Manchuc teme chuculon li'to o teme ya quich' tejc'anel ta stojol te ajwaliletique, ya me xc'opojon yu'un te lec yach'il c'ope. Tey me ya cac' ta na'el a te ma lotil c'opuc stuquele. 8Ja' testigo cu'un te Diose te bayal c'uxex ta co'tan ta apisilique, jich nix te bit'il c'ax bayal c'uxotic ta yo'tan ta jpisiltic te Jesucristoe. 9Jich ya jc'an ta sc'oponel Dios te yacuc xtoy ta c'axem to xan te c'ux ya awaiy abaic ta awo'tanique, soc te yacuc ata bayal sp'ijil awo'tanic soc spisil te bila ay ta na'ele. 10Jich me ya xju' awu'unic stsael spisil ora te bila lec ta pasele, jich me ma'yuc amulic te cuxulex ta q'uinale, soc ma'yuc bi quechel ta awentaic a te c'alal ya xtal te Cristoe. 11Ta swenta me te Jesucristoe, te nojel sit te awat'elique. Jich me ya x'albot wocol ta awentaic te Diose, soc jich me lec sc'oplal ya xc'ot awu'unic ta bayuc te Diose. 12Quermanotac, ya jc'an te ya ana'ic stojol te bila pasbilon ta ora to. Ja'uc me to, ja' ya scoltayon xan ta yalel te lec yach'il c'ope. 13Te bit'il ayon ta chuquel ta swenta te Cristoe, jich sna'ojic stojol te soldadoetic yu'un te pretorioe, soc tsobol yantic ants-winiquetic. 14Jteb ma spisiluc quermanotactic te toyol yo'tanic ta yalel sc'op Dios yu'un te bit'il ayon ta chuquele. Ma xiwic ta yalel, soc ay stulanil yo'tanic ta swenta te Cajwaltique. 15Ja'uc me to, ay mach'atic ya spucbeyic sc'oplal Cristo ta swenta jex-o'tantaywanej soc swenta tsaltomba te ay ta yo'tanique. Yan te yantique ya spucbeyic sc'oplal ta swenta yutsil yo'tanic. 16Ay mach'atic ya spucbeyic sc'oplal Cristo ta swenta xc'uxul yo'tanic, yu'un sna'ojic stojol te ja' chuculon yu'un te ya xc'opojon yu'un te lec yach'il c'ope. 17Ja'uc me to, te yantic te ya yalbeyic sc'oplal Cristo, ja' nax ya stoyes sc'oplalic stuquelique, ma junuc yo'tanic te ya spucbeyic sc'oplal te Cristoe. Yu'un ya sc'an yo'tanic te ya yesmantesbonic xan jwocol a te bit'il ayon ta chuquele. 18¿Bi jwenta a? Chican bit'il ya yich' puquel sc'oplal te Cristoe. Manchuc teme ay mach'a ma junuc yo'tane, ja'uc me to, bayal sbujts' co'tan yu'un te bit'il ayix ta puquel sc'oplal te Cristoe. Soc ya to sbujts'naj xan co'tan yu'un. 19Te melel jna'oj stojol te ya xcolon ta libre yu'un te bit'il ya ac'oponbonic Dios, soc te bit'il ya scoltayon te Espíritu yu'un te Jesucristoe. 20Ja' nax bayal sc'oplal ta co'tan te manchuc ayuc bila ya jta q'uexlal yu'un, soc te jamaluc co'tan ya xc'opojon jich nix te bit'il ayon tel spisil orae. Jich me c'axem to xan ya x'ich'ot ta muc' ta jwenta te Cristoe. Chican teme ya to xcuxinone, o teme tey ya xlajonix ae. 21Melel te bit'il cuxulone, ja' ta swenta te Cristoe. Teme ya xlajone, ja' jganar ya xc'ot. 22Teme cuxulon xan bael ta q'uinal soc te jbaq'uetale, ya to xju' ya xmuc'ub xan yat'el Dios ta jwenta, jich ma xju' cu'un stsael ya caiy. 23Ta xchebal ma xju' cu'un ya caiy te ya jtsae. Jich co'tan te ya xlajonixe swenta jich ya xba joinix te Cristoe, yu'un ja' mero lec ya caiy te jichuc ya xc'otixe. 24Ja'uc me to, ay bayal sc'oplal ta awentaic ya caiy te ya to xcuxinon xan ta q'uinale. 25Jich xch'uunej co'tan, soc jich jna'oj stojol te ya to joinex xan ta q'uinale. Jich me ya xtal joinex xan ta apisilic, swenta yu'un jich me ya yich' xan yip te xch'uunjel awo'tanique, soc jich me ya x'esmaj xan sbujts' awo'tanic yu'un. 26Jich me c'axem to xan bayal sc'oplal ya xc'ot awu'unic ta jwenta te Cristoe, te c'alal ayonix ta awolilic yan buelta. 27Ja' bayal sc'oplal te toj ya x'ainex ta q'uinal, jich bit'il te ya yac'botic jnoptic te lec yach'il c'op yu'un te Cristoe. Chican ts'iin teme ya xtal quilexe, o teme q'uejel ayone, ja'uc me to, jich me ya caiy stojol te bit'il jc'axel jun awo'tan abaic soc jun awo'tan awac'ojic puersa ta xch'uunel te lec yach'il c'ope. 28Xujt' ma me x'axi'ic te mach'a ya scontrainexe. Ja' seña ya yilic te ch'ayel ya xbajt'ique; soc ja' seña ya awilic uuc te ja'ex te ya xcolex atuquelique, yu'un jich nix yaloj te Diose. 29Te melel ma ja'uc nax ac'botex ta awentaic xch'uunel te Cristoe, ja' ac'botex ta awentaic uuc te ya xc'ax awocolic ta swentae. 30Te ja'exe soc te jo'one pajal yac ta c'axel jwocoltic. La awilic ta neelal te ma ba xiwone, soc awaiyojic stojol ta ora to te bit'il ja' nix jich ma ba ya xiwone.


Copyright
Learn More

will be added

X\