San Mateo 9

1Jich cha'och xan ta barco te Jesuse. Cha'c'ax bael ta mar. Cha'c'ot xan te banti slumal. 2Ay jtul winic tey a te chamen xchial yoc-sc'ab te la sq'uechic tel ta cajcante' ta stojol te Jesuse. C'alal la yil Jesús te bit'il ay xch'uunjel yo'tanique, jich la yalbey te jchamele: —Jnich'an, ac'a bujts'najuc awo'tan. Pasbilatix perdón yu'un te amule —xi'. 3Ay jts'ibojometic tey a te jich la yal ta yo'tanique: “La stoybac'optay te Diose”, xiic. 4Te Jesús la sna' stojol te bila ay ta yo'tanique. Jich la yalbey: —¿Bi yu'un te amen te bila la yaan awo'tanique? 5¿Bila wocol ta alel? ¿Ja' bal wocol te “Pasbilatix perdón yu'un amul”, te la cute? ¿O ja' bal wocol ya awaiy te “Jajch'an, beenan”, teme ya cute? 6Swenta yu'un ya me ana'ic te Nich'anil yich'oj tulan yat'el ta balumilal ta spasel perdón yu'un mulil —xi' te Jesuse. Soc jich la yalbey te winic te chamen xchial yoc-sc'abe: —Ya calbat te ja'ate, jajch'an. Q'uecha bael te acajcante'e. Baan ta ana —la yut. 7Te winic te chamen xchial yoc-sc'abe jajch' bael. Bajt' ta sna. 8C'alal la yilic te ants-winiquetique, xiw yo'tanic yu'un. Jajch' yalbeyic wocol Dios yu'un te bit'il yich'oj tulan yat'el ta scoltayel te ants-winiquetique. 9Loc' bael Jesús tey a ta bay te lume. Tey la yil jtul winic te Mateo sbiile, nacal ta banti ya yich' tojel spatanul te biluque. Te Jesús la sc'opon: —La', ts'aclinawon —la yut. Jich a jajch' te Mateoe. La sts'aclin bael. 10Te c'alal yac ta we'el ta na soc te jnopojeletic yu'un te Jesuse, ay jc'an-patanetic soc jmulawiletic te tal sjoinic ta we'el te Jesuse. 11Te c'alal la yilic te fariseoetic te jich yac ta pasele, la sjojc'obeyic te jnopojeletic yu'une: —¿Bistuc te ya sjoin ta we'el jc'an-patanetic soc jmulawiletic te maestro awu'unique? —xiic. 12Te c'alal la yaiy stojol te Jesuse, jich la yal: —Te mach'atic bujts'an q'uinal ya yaiyique, ma xtuun yu'unic te jpoxtaywaneje. Ja' nax ya xtuun yu'unic jpoxtaywanej te mach'atic ayic ta chamele. 13Baan, nopaic te bi ya yal te Sjun Diose: “Ja' ya jc'an te ya awaiyic c'uxtaywaneje. Ma ja'uc ya jc'an te milbil majt'anile”, te xie. Melel ma ja'uc tal quic' te mach'atic tojique. Ja' tal quic' te jmulawiletic te ya sujt'es yo'tanic ta stojol te Diose —xi' te Jesuse. 14Talic ta stojol Jesús te jnopojeletic yu'un te Juan J'ac'-ich'ja'e. Jich tal sjojc'oyic: —Bayal buelta ya jpastic ayuno, jich bit'il ya spasic uuc te fariseoetique. Yan te jnopojeletic awu'une, ¿bi yu'un te ma spasic ayuno stuquelic? —xiic. 15La yal te Jesuse: —¿Ya bal xju' ya smel yo'tan te mach'atic ic'bilic ta il-nujbinel teme sjoinej to sbaic soc a te winic ya xnujbine? Ja'uc me to, ya me sta yorail te ya x'ic'ot loq'uel ta yolilic te winic te nujbinixe. Ja' to me ya xjajch' spasic ayuno abi. 16“Ma'yuc mach'a ya spac'antay ta ach' pac' te pocol c'u'ile, melel te ach' paq'ue ya x'ojts'. Jich ya xch'i' yu'un te pocol c'u'ile. Jich c'ax muc' ya xc'ot xan a te xch'i'benale. 17Ja' nanix jich ma'yuc mach'a ya spul yach'il vino ta pocol snujc'ulel chambalam te ts'isbile. Teme jich ya yich' pasele, ya me xt'om te nujc'ule. Jich me tojol ya xch'ay te vino soc te pocol nujc'ule. Jich yu'un ya sc'an te yach'il nujc'ul ya yich' pulel te yach'il vinoe. Jich ay stuul ta xchebalic ya xc'ot —xi' te Jesuse. 18Te c'alal jich yac ta yalel a te Jesuse, tal jtul judio-winic te yich'oj yat'el ta jwolwanej yu'unique. La squejan sba ta stojol soc la yalbey wocol: —Te cantsil-nich'ane lajel to, ja'uc me to, teme ya xtal acajanbey ac'ab ta sjole, jich me ya xcha'cux xan —xi'. 19Jajch' te Jesuse. La sjoin bael te winique. Soc bajt' uuc te jnopojeletique. 20Ja'uc me to, ay jtul ants te ayix lajchayeb ja'wil ma xmajc' te xchamel ya yile. Noptsaj bael ta spat te Jesuse. La spicbey te sti'il sc'u'e. 21Yu'un jich la yal ta yo'tan: “Teme ja' nax ya jpicbey te sc'u'e, tic' ya xcolon a”, xi'. 22Te Jesús la sujt'es sba, la yil te antse. Jich la yalbey: —Me'tic, ac'a bujts'najuc awo'tan. Colematix ta swenta xch'uunjel awo'tan —xi'. Quejch'aj ta ora te xchamele. 23Te c'alal och Jesús ta sna te jwolwaneje, la yil te ay mach'atic chapalic soc yamayic ta spasel q'uin swenta te ya yich' muquele. Te ants-winiquetique tulan yacalic ta yoq'uetayel. 24La yal te Jesuse: —Loc'anic bael, melel te ach'ixe ma ba lajem. Wayal nax —la yut. Ja'uc me to, te ants-winiquetique la stse'layic te Jesuse. 25Te c'alal la sticunix loq'uel a, och bael te Jesuse. La stsacbey sc'ab te ach'ixe. Jich tejc'aj jajch'el. 26Ta spamal te q'uinale pujc' sc'oplal te bila c'ot ta pasel ta swenta te Jesuse. 27Te c'alal loq'uix bael tey a te Jesuse, ay cheb ma'sitetic te la sts'aclinic baele. Jajch' yawtayic: —Sts'umbal David, c'uxtayawotic —xiic. 28Te c'alal och ta na te Jesuse, noptsajic tel ta stojol. Te Jesús la sjojc'obey: —¿Ach'uunejic bal te ya xju' cu'un spasel in to? —xi'. La yalic: —Jch'uunejtic, Cajwal —xiic. 29Te Jesús la spicbey sitic, soc jich la yalbey: —Ta swenta te xch'uunjel awo'tanique, jich me ya xc'ot ta pasel —xi'. 30Jich jam te sitique. Te Jesús tulan sc'oplal la yalbey yaiyic: —Tsajtaya abaic, ma me mach'a xawalbey yaiyic —la yut. 31Ja'uc me to, loq'uelic to nax bael a te caj spucbeyic sc'oplal ta spamal q'uinal te bila pasbotic yu'un te Jesuse. 32Te c'alal loq'uic bael te cheb winiquetique, ay la yiq'uic tel ta stojol Jesús jtul uma' te ay pucuj ta yo'tane. 33Te c'alal la sloq'uesbey te pucuje, jajch' ta c'op ta ora te winique. Te ants-winiquetique bayal la yaan yo'tanic yu'un. Jich la yalic: —Xujt' ma'yuc bay quilojtic jich ta sq'uinal Israel in to —xiic yu'un. 34Yan te fariseoetique jich la yalic: —Ja' ta swenta te mero tatil yu'un pucuj te ya sloq'ues te pucujetique —xiic. 35Te Jesús la yocliy spisil te muc'ul lumetique soc te ch'in lumetique. La yaiy p'ijubteswanej ta sinagogaetic ta juju-jpam lum. La xcholbey yaiyic te lec yach'il c'op te bit'il ay ta ajwalinel te Dios te ay ta ch'ulchane. Soc la slamantesbey biluc nax chameliluc te ay ta sbaq'uetalique, soc spisil ta jchajp te bila ay xc'uxule. 36C'alal Jesús la yil te ants-winiquetique, la sna'bey yo'bolil sbaic, yu'un jich c'oemic la yil te bit'il chijetic te pujq'uemic te ma'yuc jcanantaywanej yu'unique. 37Jich la yalbey te jnopojeletic yu'une: —Ta mero melel bayal te c'ajoje. Yan te j'at'eletique ma'yuc bayalic. 38Jich yu'un albeyaic wocol te yajwal at'el te ya sticun te j'at'eletic yu'une —xi' te Jesuse.


Copyright
Learn More

will be added

X\