San Mateo 7

1“Ma me xalebey smul te yane, swenta yu'un jich ma ba ya yich'beyex ac'opic te Diose. 2Melel te jich yipal ya alebey smul te yane, ja' nix jich yipal ya x'albotat amul uuc. Te bi yilel sp'isol ya awac'bey te yane, jich nix yilel sp'isol ya x'ac'botat uuc. 3¿Bistuc ja' ya awil te ch'in ac te ochem ta sit te awermanoe? Yan te muc'ul ts'amte' te c'atal ta asite, ma ba ya awil stuquel. 4¿Bit'il c'an awalbey te awermanoe: “Ac'bon jloq'uesbat te ch'in ac te ochem ta asite”, teme ya awute? Melel ay muc'ul ts'amte' c'atal ta asit atuquel. 5Te ja'exe cha'lam awo'tanic. Loq'uesa neeluc te muc'ul ts'amte' te c'atal ta asite. Jich ya xju' awu'un sloq'uesel te ch'in ac te ochem ta sit te awermanoe. 6“Te bila ch'ultesbile, ma me xawac'bey te ts'i'etique. Patil ya me sujt'ic tel, ya me stujt'anex ta ti'el uuc. Ma me xawac'bey yixlan perlaetic te chitametique. Patil ya me spech'anic ta teq'uel. 7“C'anbeya te Diose, jich me ya yac'bat. Lea te bila ya ac'ane, jich me ya ata ta leel. C'opojan ta ti'nail, jich me ya sjambat te Diose. 8Melel te mach'a ay bila ya sc'anbey te Diose, jich ya x'ac'bot yu'un; soc te mach'a ya sle te bila ya sc'ane, jich me ya sta ta leel; soc te mach'a ya xc'opoj ta ti'naile, jich me ya xjambot. 9“Teme waj la sc'anbat te anich'ane, ¿ay bal jtuluc te ja'exe te ya awac'bey ton swe'elin? 10Soc teme chay la sc'anbate, ¿chan bal ya awac'bey sti'? 11Melel te ja'exe, manchuc teme amen awo'tanique, ja'uc me to, ya nax ana'ic yaq'uel te bila lec ta stojol te awal-anich'anique. ¿Ja'uc to bal a te Jtatic te ay ta ch'ulchane? Ya me yac'bey bila lec te mach'a ya sc'anbeye. 12“Jich yu'un spisil te bila ya sc'an awo'tanic ya spasbotex yu'un te yane, jich me xapasbeyic uuc. Yu'un jich ya yal te mandalile soc te j'alwanejetic yu'un te Diose. 13“Ochanic ta bay tsail nax yochibal te ti'naile. Yan te sbelal ch'ayele, muc' sjamalul te yochibale soc muc' sjamlejal bael te sbelale. Tsobol mach'atic ya x'ochic bael tey a. 14Yan te sbelal cuxinele, tsail nax te sti'il yochibale soc biq'uit nax sjamlejal bael te sbelale. Ajtaybil nax te mach'atic ya staic c'oele. 15“Tsajtaya me abaic yu'un te mach'atic lotil j'alwanejetique. Scuyoj sbaic ta chijetic yilel, ja'uc me to, pajalic soc jti'awal ja'mal ts'i'etic. 16Ya me ana'beyic sba ta swenta yat'elic, jich bit'il ya jna'beytic sba ta swenta sit te te'e. Jich bit'il ma sitin ts'usub ta bay te ch'ixe, soc ma sitin higo ta bay te chicch'ixe. 17Melel te lequil te'e, lec ya yac' sit stuquel. Yan te te' amene, amen sit stuquel. 18Te lequil te'e ma xju' te amen ya yac' site. Ja' nanix jich te te' amene, ma xju' te lec site. 19Spisil te' te ma lecuc site, ya yich' ts'etel. Ya me yich' chiq'uel ta c'ajc'. 20Ja' nix me jich ya ana'beyic sba ta swenta yat'el ya spasic te mach'atic lotil j'alwanejetique. 21“Te mach'atic: “Cajwal, Cajwal”, ya yutonique, ma spisiluc ya x'ochic ta banti ay ta ajwalinel te Dios te ay ta ch'ulchane. Ja' nax ya x'ochic tey a te mach'atic ya spasbey sc'anjel yo'tan te Jtat te ay ta ch'ulchane. 22Ta slajibal c'aal ay me tsobol ya yalbonic: “Cajwal, Cajwal, ¿yu'un bal ma ba la caiytic j'alwanej ta swenta abiil? Soc ta swenta abiil la jloq'uestic pucujetic, soc ta swenta abiil, la jpastic bayal jchajp at'eliletic”, xiic me ta jtojol. 23Jich me ya calbey ta jamal: “Xujt' ma jna'beyex abaic. Q'ueja abaic ta jtojol, ja'ex te la apasic te bila ma lecuque”, ya me cut. 24“Jich yu'un te mach'a ya yaiybon stojol te jc'ope soc teme ya spas te bila caloje, jich c'oem te bit'il jtul winic te ay sp'ijil yo'tane. Te c'alal la spas sna, la sle p'ijom ton te banti la sjaches ta pasel te snae. 25Tal bayal ja'al ta patil. Mal c'axel snojel ja' ta banti loq'uem te snae, soc tal bayal ic'. Ja'uc me to, ma ba bot'q'uej te snae yu'un ipajem ta p'ijom ton. 26Yan te mach'a ya yaiybon stojol te jc'ope, soc teme ma jichuc ya spas te bit'il caloje, ja' ya jpaj soc te jtul winic te ma'yuc sp'ijil te la spas sna ta bay puro ji'leltic te lume. 27Te c'alal tal bayal te ja'ale, mal c'axel snojel ja' ta banti loq'uem te snae, soc tal bayal ic'. Jc'axel jin jilel te snae —xi' te Jesuse. 28Te c'alal laj yo'tan ta c'op te Jesuse, te ants-winiquetic jchajp nax la yaiyic yu'un te bila la yac' ta nopele. 29Melel jich la yaiy p'ijubteswanej ta stojolic te bit'il mach'a yich'oj tulan yat'el. Ma jichuc te bit'il te jts'ibojometique.


Copyright
Learn More

will be added

X\