San Mateo 6

1“Tsajtaya me abaic, ma me xawaq'uic ta ilel ta comonsitil ta stojol ants-winiquetic te bila toj ta pasele. Teme ya awaq'uic ta ilele, ma me ayuc amajt'an ya x'ac'botex yu'un te Jtatic te ay ta ch'ulchane. 2Jich yu'un, te c'alal ay bila ya aq'uebanique, ma me xapucbeyic sc'oplal ta alel. Melel te mach'atic cha'lam yo'tanique ya spucbeyic sc'oplal ta sinagogaetic soc ta calleetic, swenta yu'un ya x'albot lec sc'oplalic yu'un te ants-winiquetique. Jamal ya calbeyex, la staix smajt'anic yu'un a. 3Yan te ja'exe, teme ay bila ya aq'uebanique, ma me xawac' ta na'el te c'alal ya awaq'uique. 4Ja' lec te muquen ya awaq'uique. Jich me ya x'ac'botex amajt'anic ta comonsitil yu'un a te Jtatic te ya yil te bila muquen ya apasique. 5“Te c'alal ya ac'oponic te Diose, ma me jichuc xapasic te bit'il ya spasic te mach'atic cha'lam yo'tanique. Ya smulanic te ya stejc'an sbaic ta sc'oponel Dios ta sinagogaetic soc ta xchiquin calleetic, swenta yu'un jich ya x'ilotic yu'un te ants-winiquetique. Jamal ya calbeyex, la staix smajt'anic yu'un a. 6Yan te c'alal ya ac'oponic Dios te ja'exe, ochanic ta yutil anaic. Maca te ti'naile. Tey me xac'oponic a te Jtatique te sjoinejat ta muquene. Jich me ya x'ac'botex amajt'anic ta comonsitil yu'un te bila muquen ya apasique. 7“Te c'alal ya ac'oponic Dios te ja'exe, ma me jp'aluc nax c'op te bayal buelta ya awalulayic te ma'yuc sc'oplale. Melel jich ya spasic te jyanlumetique. Yu'un scuyojic te jich ya stsacbot sc'opic teme bayal buelta ya yalulayique. 8Ma me xac'ainic te ja'exe, melel te Jtatique sna'oj te bi ya xtuun awu'unic te c'alal ma to c'anbiluc awu'unic a. 9Jich yu'un te ja'exe jich me xac'oponic te Diose: “Jtatic Dios te ayat ta ch'ulchane, ac'a ich'otuc ta muc' te ach'ulbiile. 10Ac'a c'otuquix yorail te ya awich' ajwalinele. Ac'a pasuc sc'anjel awo'tan ta balumilal, jich bit'il te yac ta pasel ta ch'ulchane. 11Ac'botic we'elil swenta in c'aal to. 12Pasbotic perdón yu'un te bila amen jpasojtique, jich te bit'il ya jpasbeytic perdón uuc te mach'atic amen bila spasojbotique. 13Ma me xawac' yalucotic yu'un te yiljibal co'tantique. Coltayawotic loq'uel ta bay te bila amene. [Melel te ja'ate muc' ajwalilat atuquel, soc ay awu'el, soc ay awutsilal sbajt'el q'uinal. Jichuc]”, xaex me ta sc'oponel te Diose. 14“Melel teme ya apasbeyic perdón te mach'a amen bila spasojbeyexe, ja' nanix jich te Jtatic te ay ta ch'ulchane, ya me spasbeyex perdón uuc. 15Yan teme ma xapasic perdone, ja' nanix jich ma ba ya spasbeyex perdón uuc te Jtatique. 16“Te c'alal ya apasic ayuno, ma me xawac' chicnajuc ta ilel ta asitic jich bit'il ya spasic te mach'atic cha'lam yo'tanique. Jich ya spasic swenta yu'un ya xna'ot stojol yu'un ants-winiquetic te bit'il ayic ta ayunoe. Jamal ya calbeyex, la staix smajt'anic yu'un a. 17Yan te ja'exe, te c'alal ya apasic ayunoe, tesa ajolic, poca asitic. 18Jich ma ba ya sna'ic stojol ants-winiquetic te bit'il apasojic ayuno. Ja' nax ya sna' stuquel te Tatil te bila muquen ya apasique soc ya me yac'beyex amajt'anic ta comonsitil. 19“Ma me x'atsob ac'ulejalic ta balumilal te banti ya xlaj ta joch' soc ta tsa'ec', soc ta banti ya stob na j'eleq'uetic. 20Ja' lec tsoba ac'ulejalic ta ch'ulchan ta banti ma xlaj ta joch' soc ta tsa'ec', soc ta banti ma stob na j'eleq'uetic. 21Melel ta banti ay te ac'ulejalique, tey ay a te awo'tanique. 22“Te asitique jich c'oem te bit'il c'ajc' te ya yil q'uinal a te abaq'uetale. Jich yu'un teme lec ay te asite, scojt'ol abaq'uetal sacubenix q'uinal ta stojol. 23Yan teme amen te asite, scojt'ol abaq'uetal ayat ta ijc' q'uinal yu'un. Teme acuyojic ta saquil q'uinal te ijc' q'uinale, jc'axel ayex ta ijc' q'uinal abi. 24“Ma'yuc jtuluc abat te ya xju' yu'un te ya yac' sba ta abatinel yu'un te cheb yajwale. Teme jiche, ja' ya sp'aj te jtule; yan te yane, c'ux ya yaiy ta yo'tan stuquel. Jun yo'tan ta stojol te jtule; ja'uc me to, te yane ma'yuc sc'oplal ta yo'tan ya xc'ot. Ja' nanix jich te ja'exe, ma xju' awu'unic te ya awac' abaic ta abatinel yu'un Dios, teme ja' baem ta awo'tanic te ac'ulejalique. 25“Ja' swentail te ya calbeyex, ma me ja'uc ya xbajt' ta awo'tanic te bit'il ya xcuxinex ta balumilale, jich bit'il te ya xwe'exe soc te ya ata ac'u'-apaq'uique. Melel ma ja'uc bayal sc'oplal te awe'elique. Ja' cajal sc'oplal te acuxlejalique. Soc ma ja'uc bayal sc'oplal te ac'u'-apaq'uique. Ja' cajal sc'oplal te abaq'uetalique. 26Ilawil bit'il cuxulic te ja'mal mutetique. Ma xyaiyic awal, soc ma xyaiyic c'ajoj, soc ma'yuc snail yiximic. Ja'uc me to, te Jtatic te ay ta ch'ulchane ya smac'lin spisil. Te ja'exe ¿ma bal c'axuc jich ay ac'oplalic a te bit'il te ja'mal mutetique? 27Manchuc me bayal ya x'ayan awo'tan yu'un te bit'il comol winicate, ¿ay bal ya xju' awu'un te ya anajt'ubtes aba junuc xujc'ubil? 28“¿Bistuc te ya amel awo'tanic yu'un te ac'u'-apaq'uique? Ila awilic te bit'il ya xch'iic te ja'mal nichimetique, melel ma x'at'ejic soc ma sjal sc'u'-spaq'uic. 29Ja'uc me to, ya calbeyex te ma la spajbey yutsilal junuc nichim te sc'u'-spac' te muc' ajwalil Salomone, manchuc teme jelawen yutsilale. 30Melel teme Dios la yac' te jich ay yutsilal te ja'mal nichimetique, te jun nax c'aal cuxule soc te pajel ya yich' chiq'uel ta yawil c'ajq'ue, ¿yu'un bal ma c'axemuc to xan jich ya sc'u'ultesex te ja'exe? ¿Bi yu'un te ma'yuc xch'uunjel awo'tanique? 31Jich yu'un ma me ja'uc ya xbajt' ta awo'tanic sna'el. “¿Bit'il ya jta ta leel jwe'el-cuch'el soc te jc'u'-jpaq'ue?”, ma me xauquex. 32Melel te mach'atic ma sna'beyic sba te Diose, ja' nax baem ta yo'tanic sleel stuquel. Yan te ja'exe ay Atatic ta ch'ulchan te sna'oj spisil te bila ya xtuun awu'unique. 33Ja' me xaleic neeluc te bit'il ay ta ajwalinel te Diose soc te bila toj ta pasel yu'une. Jich me ya yesmantesbeyex spisil te bila ya xtuun awu'unique. 34Ma me ja'uc xbajt' ta awo'tanic yu'un te bit'il ayex te pajele. Stuqueluc ac'a yil sba te pajele, melel stalel ay awocolic te jujun c'aale.


Copyright
Learn More

will be added

X\