San Mateo 5

1Jesús la yil te ay bayal te ants-winiquetique. Jich mo bael ta wits. Tey c'o najc'ajuc a. Jich la stsob sbaic tel ta stojol te jnopojeletic yu'une. 2Jajch' ta p'ijubteswanej: 3—Bin nax me yutsil te mach'atic me'ba ya yaiy sba ta yo'tanic, te melel ja' me ya x'ochic ta banti ay ta ajwalinel te Diose. 4“Bin nax me yutsil te mach'atic ayic ta oq'uel, te melel ya me xmuc'tesbot q'uinal yaiyic yu'un te Diose. 5“Bin nax me yutsil te mach'atic peq'uel ya yac' sbaique, te melel ya me x'ac'bot sq'uinalinic te balumilale. 6“Bin nax me yutsil te mach'atic ayic ta wi'nal soc te taquin yo'tanic yu'un te bila toj ta pasele, te melel ya me xnojesbot ta yo'tanic te bila leque. 7“Bin nax me yutsil te mach'atic ya yaiyic c'uxtaywaneje, te melel ya me staic c'uxtayel yu'un uuc te Diose. 8“Bin nax me yutsil te mach'atic utstesbil te yo'tanique, te melel ya me yilbeyic sit te Diose. 9“Bin nax me yutsil te mach'atic ya yac' lamajuc te c'ope, te melel yal-snich'an Dios sbiil ya xc'otic yu'un. 10“Bin nax me yutsil te mach'atic ya xc'ax swocolic ta uts'inel ta scaj te yat'elinejic spasel te bila toj ta pasele, te melel ja' me ya x'ochic ta banti ay ta ajwalinel te Dios ta ch'ulchane. 11“Bin nax me awutsilic teme ya sbolc'optayex, soc teme ya yuts'inex, soc teme ya slotbeyex ac'oplalic te ants-winiquetic ta jo'on jwenta. 12Binuc nax me awo'tanic yu'un, soc ayuc sbujts' awo'tanic yu'un, te melel ya me x'ac'botex muc' amajt'anic ta ch'ulchan yu'un. Melel jich nix lajic ta uts'inel uuc te j'alwanejetic yu'un Dios te neel c'axemic ta q'uinale. 13“Te ja'exe, yats'amilex te balumilale. Teme ch'ay xchi'il te ats'ame, ¿ya bal xchi'ub xan? Te bit'il ma xtuunixe ya yich' ch'ojel bael, soc ya xlaj ta pech'anel ta teq'uel yu'un te ants-winiquetique. 14“Te ja'exe, luz c'oemex yu'un te balumilale, jich bit'il teme ay muc'ul lum ta sba te witse, ma xju' ta naq'uel. 15Soc teme ya atsum c'ajc' awilique, ma ba ya amac ta cajon. Ya atujch'anic ta yawil, swenta yu'un ya xchicnaj q'uinal yilic spisil a te mach'atic ayic ta nae. 16Ja' nanix jich te ja'exe tilemex jichuc luz ta stojol te ants-winiquetique, melel teme ya yilic te lequil at'elil ya apasique, jich me ya yalbeyic yutsilal te Jtatic te ay ta ch'ulchane. 17“Ma me xacuyic te tal jlajinbey sc'oplal te mandalile soc te bila ts'ibubil jilel yu'un te j'alwanejetic yu'un te Diose. Ma ba tal jlajinbey sc'oplal, melel tal cac' c'otuc ta pasel. 18Jamal ya calbeyex, manchuc teme ya xlaj te ch'ulchan balumilale, xujt' ma xch'ay sc'oplal junuc jota ni junuc tilde te mandalile. Ya me xc'ot ta pasel spisil. 19Jich yu'un te mach'a ya xc'axintay jp'aluc te mandalile, manchuc teme ch'in jteb nax sc'oplale, soc teme jich ya yac'bey snop te ants-winiquetique, ch'in jxujt' me ya x'ilot ta banti ay ta ajwalinel te Dios ta ch'ulchane. Ja'uc me to, te mach'a ya xch'uun spasel soc teme jich ya yac' ta nopele, muc' me ya x'ilot ta banti ay ta ajwalinel te Dios ta ch'ulchane. 20Jich yu'un ya me calbeyex te ja'exe, teme ma c'axemuc to xan toj awat'el te bit'il ya spasic te jts'ibojometic soc te fariseoetique, ma xju' ya x'ochex tey a ta banti ay ta ajwalinel te Dios ta ch'ulchane. 21“Awaiyojic stojol te bila albot jilel te namey q'uinal jme'-jtatique: “Ma me x'awaiy milaw, melel te mach'a ya yaiy milawe ya me x'ac'bot stoj ta castigo yu'un”, te xie. 22Ja'uc me to, jo'on ya calbeyex: Spisil mach'a ya yilintay te yermanoe, ay me smul ya xc'ot ta stojol te chajbanwanejetique. Spisil mach'a “Bolat”, ya yut te yermanoe, ay me smul ya xc'ot ta stojol te muc'ul tsobleje. Soc spisil mach'a ya slaban te yermanoe, ya me xch'ojot ochel ta yawil c'ajc' ta bay ma xtup' sbajt'el q'uinal. 23“Jich yu'un teme ya awich' tel te smajt'an Dios ta scajtijib smajt'an te Diose, soc teme la ana' te amen yo'tan awu'un te awermanoe, 24te majt'anil awu'une, ijq'uitaya jilel tey a ta banti nopol te scajtijibe. Neel xba achajban soc te awermanoe. Patil sujt'an bael ta yaq'uel te smajt'an Dios awu'une. 25“Chajbana aba soc ta ora te acontroe, swenta yu'un ma ba ya yac'at ta sc'ab te juez. Melel te juez ya me yac'at ta sc'ab te comandante. Jich ya x'ochat ta chucjibal. 26Jamal ya calbat, ma xju' ya xloc'at tey a ja' to teme ts'acal la atoje. 27“Soc awaiyojic stojol te jich albil jilel ta nameye: “Ma me x'awaiyic mulwej”, te xie. 28Ja'uc me to, jo'on ya calbeyex: Spisil mach'a ya xbic'taj sit ta smulanel te antse, la yaiyix mulwej ta yo'tan soc abi. 29“Jich yu'un teme ja' ya syalesat ta mulil te swa'el asite, loq'uesa, ch'oja bael. Ja' lec ya xc'oat a te ya xch'ay jp'ijuc te asite. Ja' wocol teme scojt'ol abaq'uetal ya xch'ojotat ochel ta yawil c'ajc' ta bay ma xtup' sbajt'el q'uinal. 30Soc teme ja' ya syalesat ta mulil te swa'el ac'abe, boja loq'uel, ch'oja bael. Ja' lec ya xc'oat a te ya xch'ay jch'ixuc te ac'abe. Ja' wocol teme scojt'ol abaq'uetal ya xch'ojotat ochel ta yawil c'ajc' ta bay ma xtup' sbajt'el q'uinal. 31“Soc jich albil jilel uuc: “Spisil mach'a ya yijq'uitay sba soc te yiname, ac'a yich' najc'anel ta jun te bi swentailuque, ac'a yac'bey bael ta sc'ab”, te xie. 32Ja'uc me to, jo'on ya calbeyex: Teme ay mach'a ya yijq'uitay sba soc te yiname, teme ma ta scajuc yajmule, ya me yac' ta mulwej abi. Teme ay mach'a ya yic' yinamin te ants te ijq'uitaybilix yu'un te smamlale, mulwej ya xc'ot soc abi. 33“Soc awaiyojic stojol te bila albot jilel te namey q'uinal jme'-jtatique: “Ma me xawac' ch'ayuc te bila achapoj ta pasel te la awac' ta testigo yu'un te Cajwaltique”, te xie. 34Ja'uc me to, jo'on ya calbeyex: Ma me biluc nax xawaq'uic ta testigo. Ma me xawaq'uic ta testigo te ch'ulchane, te melel ja' smuc'ul nactijib te Diose. 35Soc ma me xawaq'uic ta testigo te balumilale, te melel ja' scajtijib te yacane. Soc ma me xawaq'uic ta testigo te Jerusalene, te melel ja' muc'ul lum yu'un te Muc' Ajwalile. 36Soc ma me xawac' ta testigo te ajole, te melel ma xju' awu'un sc'atp'unel ta sac lijc'uc te stsotsil ajole. Soc ta bay saque, ma xju' awu'un sc'atp'unel ta ijc'. 37Te c'alal ya awalic: “Yac”, teme xaexe, yu'unix jich abi. “Ju'u”, teme xaexe, yu'unix jich abi. Yan teme c'ax jich te bila ya awalique, ja' me mulil abi. 38“Soc awaiyojic stojol te jich albil jilel ta nameye: “Teme ay mach'a ya st'us sitil, ta sit nix ya yich' t'usel uuc. Teme ay mach'a ya sc'oc eal, ta ye nix ya yich' c'oquel uuc”, te xie. 39Ja'uc me to, jo'on ya calbeyex: Teme ay mach'a amen te bila ya spasbate, ma me xasujt'esbey spacol. Teme la smajbat te swa'el achoe, ac'a smajbat xan te yan mejch'e. 40Teme ay mach'a ya sleat ta c'op soc ya spojbat te ac'u'e, ijq'uitaybeya uuc te anajt'il c'u'e. 41Soc teme ay mach'a ya sujat ta xcuchel yijc'ats junuc lewa, cuchbeya bael chebuc lewa. 42Teme ay mach'a ay bila ya sc'anbate, ac'beya, soc ma me xamac ta c'op te mach'a ay bila ya smajanbate. 43“Soc awaiyojic stojol te jich albil jilel ta nameye: “C'ux me x'awaiy ta awo'tan te mach'a jun awo'tan aba soque. Yan te mach'a ya scontroinate, ilaya me stuquel”, te xie. 44Ja'uc me to, jo'on ya calbeyex: C'ux me x'awaiy te acontroe, c'anbeya bendición te mach'a ya sbolc'optayexe. Pasbeyaic bila lec te mach'atic ya yilayexe. C'oponbeyaic Dios ta stojol te mach'atic ya yixtac'optayexe soc te ya yuts'inexe. 45Jich me yal-snich'an ya xc'oex te Jtatic te ay ta ch'ulchane, melel pajal ya yac' tiluc c'aal ta stojol te mach'atic ma tojuque soc te mach'atic tojique. Soc pajal ya yac' taluc ja'al ta stojol mach'atic tojic soc te mach'atic ma tojuque. 46Melel teme jip nax c'ux ya awaiyic te mach'atic c'ux ya yaiyexe, ¿bila amajt'an ya x'ac'botex yu'un a te Diose? Melel jich ya spasbey sbaic uuc te jc'an-patanetique. 47Teme ja' nax ya apatbeyic yo'tan te awermanotaque, ¿banti lec xan a te bila ya apasique? ¿Yu'un bal ma jichuc ya spasic uuc te jyanlumetique? 48Jich yu'un te ja'exe ya sc'an te tojuc awo'tanic jich te bit'il toj yo'tan stuquel te Jtatic te ay ta ch'ulchane.


Copyright
Learn More

will be added

X\