San Mateo 25

1Soc la yal xan te Jesuse: —Te bit'il ay ta ajwalinel te Dios te ay ta ch'ulchane, ja' pajal soc te ay lajuntul tec'tojom ach'ixetic te la yich'ic bael sc'ajq'uic te ba staic tel te winic ya xnujbine. 2Ay jo'tul tey a te ma p'ijuc yo'tanique, soc ay jo'tul te p'ij yo'tanique. 3Te mach'atic ma p'ijuc yo'tanique, la yich'ic bael te yawil sc'ajq'uique, ja'uc me to, ma la yich'ic bael yaceiteil te sc'ajq'uique. 4Yan te mach'atic p'ij yo'tanique, la yich'ic bael te yawil sc'ajq'uique, soc la to yich'ic xan bael aceite ta juju-jtul. 5“Ja'uc me to, te bit'il jalaj te winic ya xnujbine, tal swayel ta spisilic. Jich wayic. 6“Ta olil ajc'ubal la yaiyic stojol aw: “Talix te winic ya xnujbine. La'ic me ta stael bael”, xi' te awe. 7“Jajch'ic ta spisilic te tec'tojom ach'ixetique. Caj xchajbanic te yawil sc'ajq'uique. 8Te jo'tul te ma p'ijuc yo'tanique jich la yalbeyic te jo'tul te p'ij yo'tanique: “Ac'botic jtebuc te awaceiteique, yu'un ma xtil te jc'ajc'tique”, xiic. 9Te ach'ixetic te p'ij yo'tanique, la yalic ta spisilic, “Ma niwan. Ma tic'uc a te ya xtuun cu'un jo'otic soc te ja'exe. Ja' lec baan manaic tel te banti ya xchonote”, la yutic. 10“Te bit'il baemic ta smanel tel aceite a te jo'tul ach'ixetic te ma p'ijuc yo'tanique, tal ta ora te winic ya xnujbine. Te jo'tul ach'ixetic te chapalic soc sc'ajq'uique, la sjoinic ochel ta na ta bay q'uin swenta nujbinel, soc la yich' maquel te ti'naile. 11“Ta patil talic uuc te yantic tec'tojom ach'ixetique. Jich la yalic: “Cajwal, cajwal, jambotic te ti'naile”, xiic. 12Ja'uc me to, albotic yu'un: “Jamal ya calbeyex, ma jna'beyex abaic”, xi'. 13Jich yu'un te ja'exe, wiq'uiluc me asitic, yu'un ma na'biluc awu'unic bi c'aalil soc bi ora ya xtal te Nich'anile. 14“Te bit'il ay ta ajwalinel te Dios te ay ta ch'ulchane, ja' pajal soc te ay jtul winic te c'ubul bajt'e. Neel la yic' tel te abatetic yu'une. La yac'bey jilel te sbiluque. 15Te jtule la yac'bey jo'eb talento-taq'uin. Te yane la yac'bey cheb, soc te yane la yac'bey jun talento-taq'uin. Ja' chican te jich yilel ya xju' yu'un swentainel te juju-jtule. Bajt' ts'iin. 16“Jich te abat te la yich' jo'eb talento-taq'uine ba yaiy manbajel soc. Jolon jo'eb talento yu'un. 17Ja' nanix jich uuc te mach'a la yich' cheb talento-taq'uine, jolon cheb talento yu'un uuc. 18Yan te mach'a la yich' jun talento-taq'uine, ba smucbey ta lum, la snac'bey te staq'uin te yajwale. 19“Bayal c'aal ta patil sujt' tel te yajwalique. Caj yich'bey ta wenta te yat'elique. 20Tal te mach'a ac'bot te jo'eb talento-taq'uine. La yich' tel soc te jo'eb talento te jolon yu'une. Jich la yal: “Cajwal, la awac'bon jo'eb talento-taq'uin. Ilawil te yan jo'eb talento jolon cu'une”, xi'. 21“Te yajwale la yalbey: “Lec at'ejat, lequil abatat soc jun awo'tan ta jtojol. Te bit'il jun awo'tan la awentainbon te bila la cac'bat awentainbon jtebuque, ya me cac'bat awentainbon bayal. La' me, ochan, bujts'najuc awo'tan soc te awajwale”, xi'. 22“Tal uuc te mach'a ac'bot te cheb talento-taq'uine. Jich la yal: “Cajwal, la awac'bon cheb talento-taq'uin. Ilawil te yan cheb talento te jolon cu'une”, xi'. 23“Te yajwale la yal: “Lec at'ejat, lequil abatat, soc jun awo'tan ta jtojol. Te bit'il jun awo'tan la awentainbon te bila la cac'bat awentainbon jtebuque, ya me cac'bat awentainbon bayal. La' me, ochan, bujts'najuc awo'tan soc te awajwale”, xi'. 24“Soc tal uuc te abat te ac'bot te jun talento-taq'uine. Jich la yal: “Cajwal, la jna' te lom c'ajc'ate. Yu'un ja'at ya ac'aj te banti ma ja'ucat la ats'une, soc ya atsob te banti ma ja'ucat la awaiy awale. 25Ja' xiwon yu'un. Jich ba jnac' ta lum te ataq'uine. Ila, ich'a te bila ja'at awu'une”, xi'. 26“La yal te yajwale: “Amenat. Mero ch'ajil abatat. Te bit'il ya ana' te jo'on ya jc'aj te banti ma jo'ocon jts'unoje, soc te ya jtsob te banti ma jo'ocon la caiy awale, 27jich yu'un ja' lec te lajuc awac' ta majanel te jtaq'uine, swenta yu'un te c'alal talone, la quich'bey soc sjol te jichuque”, la yut. 28“Soc la yalbey te mach'atic tec'ajtic tey a: “Jich yu'un pojbeyaic te jun talento-taq'uin yich'oje. Ac'beya te mach'a yich'oj te lajuneb talentoe. 29Melel te mach'a ay bila yich'oje, ya me x'ac'bot xan. Jich me c'ax bayal bila yich'oj ya xc'ot. Yan te mach'a ma x'at'ej soque, ya me xpojbot te bila yich'oj jtebuque. 30In abat to te ma xtuune, ch'oja loq'uel ta ijc' q'uinal. Tey me ya xc'o yoq'uetay sba a, soc tey me ya xc'o sjets'ulay ye a”,, xi'. 31“Te c'alal ya xtal soc yutsilal te Nich'anile, ya me sjoin tel te ch'ul abatetique. Ya xjul snajc'an sba ta bay yutsilal te smuc'ul nactijibe. 32Spisil ta jchajp nacionetic ya me yich'ic tsobel tel ta stojol. Cha'q'uejp ya sloq'ues a jich bit'il te jcanan-chije te jq'uejp ya yac' te chijetique soc jq'uejp ya yac' te tentsunetique. 33Ya me yac' ta swa'el sc'ab te mach'a chijetique. Yan te mach'a tentsunetique ya yac' ta xq'uexen sc'ab stuquelic. 34“Jich yu'un te muc' ajwalile ya me yalbey te mach'a ayic ta swa'el sc'abe: “La'ic te ja'exe te bin nax awutsilic ta stojol te Jtate. Ochanic, u'uninaic te utsilal te chajbanbil ta awentaic ta xjajch'ibal to tel balumilal. 35Melel te c'alal ayon ta wi'nale, la amac'linon. Soc te c'alal ay taquinti'il la caiye, la awac'bon ja' cuch'. Soc te q'uejel talemon la awile, la awic'on ochel ta ana. 36Soc te ma'yuc lec jc'u'-jpac' la awile, la awac'bon jc'u'-jpac'. Soc te bit'il ayon ta chamel la awile, tal awilon. Soc te bit'il ayon ta chucjibale, tal ac'oponon tey a”, ya me yut. 37“Jich ya yalic te mach'atic lec yat'elic la spasique: “Cajwal, ¿bi ora la quilticat te ayat ta wi'nal te la jmac'linticate? ¿Soc bi ora te taquin ati' la quilticat te la cac'tic ja' awuch'e? 38¿Soc bi ora la quilticat te q'uejel talemat te la quic'ticat ochel ta nae? ¿Soc te ma'yuc ac'u'-apac' la quilticat te la cac'tic ac'u'-apaq'ue? 39¿Soc bi ora la quilticat te ayat ta chamel soc te ayat ta chucjibal te ba quilticate?”, ya me yut. 40“Jich me ya yal te muc' ajwalile: “Jamal ya calbeyex, te bit'il jich la apasbeyic jtuluc in to te quermanotaque, manchuc teme peq'uel ayique, jo'on la apasbonic c'oem abi”, ya me yut. 41“Te muc' ajwalile ya yalbey ts'iin te mach'atic ayic ta xq'uexen sc'abe: “Q'ueja abaic ta jtojol ja'ex te mero amenexe. Baanic ta bay c'ajc' te ma xtup' sbajt'el q'uinal ta bay chajbanbil te ya x'ac'ot tey a te pucuje soc spisil te abatetic yu'une. 42Melel te bit'il ayon ta wi'nal la awile, ma la awac'bon jwe'el. Soc te bit'il ayon ta taquinti'il la awile, ma la awac'bon ja' cuch'. 43Soc te bit'il q'uejel talemon la awile, ma la awic'on ochel ta ana. Soc te bit'il ma'yuc jc'u'-jpac' la awile, ma la awac'bon. Soc te bit'il ayon ta chamele, soc te bit'il ayon ta chucjibal la awile, ma ba tal awilon tey a”, ya me yut. 44“Jich me ya yalic: “Cajwal, ¿banti la quilticat te ayat ta wi'nal soc te ayat ta taquinti'il, soc te q'uejel talemat, soc te ma'yuc ac'u'-apaq'ue, soc te ayat ta chamele, soc te ayat ta chucjibal te ma la jc'uxtayticate?”, ya me yutic. 45“Ja'uc me to, jich me ya yalbey: “Jamal ya calbeyex, te bit'il ma jichuc la apasbeyic jtuluc te mach'atic peq'uel ayique, jo'on te ma la apasbonic ta jtojole”, ya me yut. 46“Jich me ya xbajt'ic ta castigo sbajt'el q'uinal. Yan te mach'atic lec yat'elique ya me xbajt'ic ta cuxinel sbajt'el q'uinal stuquelic —xi' te Jesuse.


Copyright
Learn More

will be added

X\