San Mateo 23

1Te Jesús jich la yalbey yaiyic te ants-winiquetic soc uuc te jnopojeletic yu'une: 2—Te jts'ibojometic soc te fariseoetique sjelolinejic Moisés ta yaq'uel ta nopel te mandalil ts'ibubil jilel yu'une. 3Jich yu'un ch'uunaic spasel te bila ya yalbeyexe, ja'uc me to, ma me xac'ainic spasel te bila ya spasic stuquelique. Melel te bila ya yalic ta p'ijubteswaneje, ma xch'uunic spasel stuquelic. 4Ja' pajal c'oemic soc te mach'atic ya sts'alic ijc'atsil te c'ax al te ma xlijc' ta cuchele, te ja' ya yac'beyic xcuch te ants-winiquetique. Yan stuquelic ma xyac' jch'ixuc sbic'tal sc'abic ta sliquel. 5Spisil te bila ya spasique, ja' nax swentail yu'unic te ya x'ich'otic ta muc' yu'un te ants-winiquetique, melel ya smulanic smuc'tesel te ch'in xcaxail versículoetic te c'aemic ta xchuquel ta sc'abic soc ta stibaic ta spisilic soc te slumale, soc ya smulanic te c'ax najt' te stsits'mal sc'u' ya slapique. 6Soc ya smaquic ta ora te sbabial nactijibaletic ta bay te we'ibaletique soc te sbabial nactijibaletic swenta ich'el ta muc' ta bay te sinagogaetique. 7Soc ya smulanic te ya xpatbot yo'tanic ta comonsitil ta bay yolil ch'iwich, soc ya smulanic te “maestro” ya x'utotic yu'un te ants-winiquetique. 8“Yan te ja'exe, ma me x'ac'anic te “maestro” xi' ac'oplalique. Melel awermano abaic ta apisilic soc jtul nax maestro ay awu'unic. 9Ma me ayuc jtuluc ta balumilal te ya acuyic ta atatic, melel jtul nax te Atatique, ja' te mach'a ay ta ch'ulchane. 10Ma me xamulanic te “ajwalil” xi' ac'oplalique, melel jtul nax Ajwalil ay awu'unic, ja' bi, ja' te Cristoe. 11Te mach'a muc' ay ta atojolique, ac'a yac' sba ta abatinel awu'unique. 12Melel te mach'a cajal ya yac' sbae, peq'uel me ya xc'ot. Yan te mach'a peq'uel ya yac' sbae, ja' me cajal ya xc'ot stuquel. 13¡Ya me awil awocolic jts'ibojometic, fariseoetic te cha'lam awo'tanique! Melel amacojiquix ta llave c'oem te sti'il ta banti ay ta ajwalinel te Dios te ay ta ch'ulchane. Ma ba ya x'ochex tey a te ja'exe, soc ma xawaq'uic ochel te mach'atic ya sc'an ya x'ochic tey a. [ 14¡Ya me awil awocolic jts'ibojometic, fariseoetic te cha'lam awo'tanique! Melel te ja'exe ya apojbeyic sbiluquic te me'ba antsetique, soc jal ya ac'oponic Dios ta comonsitil, swenta yu'un jich me ya xcuyotex a te lec awo'tanique. Jich yu'un te ja'exe c'axem to xan castigo ya awich'ic atuquelic.] 15¡Ya me awil awocolic jts'ibojometic, fariseoetic te cha'lam awo'tanique! Melel te ja'exe bayuc nax ya xbeenex ta spamal balumilal, yu'un awo'tan ya awaq'uic ta judioil te jyanlumetique. Ja'uc me to, teme la xch'uun awu'unique, c'axem to xan jich castigo ya yich' a te bit'il te ja'exe. 16¡Ya me awil awocolic ma'sit jwolwanejetic! te jich ya awalique: “Teme ay mach'a ja' nax ya stabey ta alel sbiil te temploe, ma'yuc sc'oplal stuquel. Yan teme ja' la stabey ta alel sbiil te oro yu'un te temploe, puersa me ay bila ya xc'ot ta swenta stuquel”, te xaexe. 17¡Bolex, ma'sitex! ¿Bila a te muc' sc'oplal? ¿Ja' bal te oro, o ja' te templo te ya xch'ultes te oroe? 18Soc jich ya awalic xan te ja'exe: “Teme ay mach'a ya stabey ta alel sbiil te scajtijib xchic'jibal smajt'an te Diose, ma'yuc sc'oplal stuquel. Yan teme ja' ya stabey ta alel sbiil te smajt'an Diose, puersa me ay bila ya xc'ot ta swenta stuquel”, te xaexe. 19¡Ma'sitex, ma x'ana'ic q'uinal! ¿Bila a te muc' sc'oplale? ¿Ja' bal te smajt'an Diose, o ja' te xchic'jibal te ja' ch'ultesbil yu'un a te majt'anile? 20Melel te mach'a ya stabey ta alel sbiil te xchic'jibal smajt'an te Diose, ja' la stabey ta alel sbiil uuc te bila ay ta sbae. 21Soc te mach'a ya stabey ta alel sbiil te temploe, ja' la stabeyix ta alel sbiil a te Dios te nainem tey a. 22Melel te mach'a ya stabey ta alel sbiil te ch'ulchane, ja' la stabeyix ta alel sbiil uuc te smuc'ul nactijib te Diose soc te Dios te nacal tey a. 23¡Ya me awil awocolic jts'ibojometic, fariseoetic te cha'lam awo'tanique! Melel ja' nax ya awac'beyic smajt'anin Dios jun ta slajunebal te yerbabuena, soc te eneldo soc te comino. Yan te bila muc' sc'oplal ta pasel te ya yal te mandalile, ja' ma'yuc sc'oplal ta awo'tanic stuquel, jich bit'il in to: ja' te bila toj ta pasele, te c'uxul-o'tanile, soc te xch'uunjel-o'tanile. Ja' ya sc'an pasel awu'unic, soc uuc te yan te yacalex ta pasele. 24¡Ma'sit j'ic'wanejex! Ja' ma x'ac'an ya abiq'uic te ch'in use, yan te camelloe, ja' ya abiq'uic coel scojt'ol stuquel. 25¡Ya me awil awocolic jts'ibojometic, fariseoetic te cha'lam awo'tanique! Melel te ja'exe, ja' nax ya asapbeyic spat te vasoe soc te platoe, ja'uc me to, te yutile nojel tey a te eleq'ue soc te bila ma tojuc ta pasele. 26¡Ma'sit fariseo! Neel xasapbey yutil te vasoe soc te platoe. Jich me lec ya xc'ot uuc te spate. 27¡Ya me awil awocolic jts'ibojometic, fariseoetic te cha'lam awo'tanique! Melel ja' pajalex soc te muquenal te buen sac bonbilic te spate, ja'uc me to, nojel ta baquel anima te yutile soc spisil te bitic ilaybile. 28Jichex ta ilel te ja'exe. Ta mero melel tojex nax ta winiquil yilel ta stojol te ants-winiquetique, ja'uc me to, nojel ta awo'tanic te cha'lam-o'tanile soc te mulile. 29¡Ya me awil awocolic jts'ibojometic, fariseoetic te cha'lam awo'tanique! Melel te ja'exe ya ats'ajc'ubey smuquenal te namey q'uinal j'alwanejetic yu'un te Diose, soc ya ach'albeyic sts'ajc'ul smuquenal te mach'atic toj yo'tan lajique. 30Soc jich ya awalic: “Te ja'uc cuxulucotiquix ta q'uinal soc a te namey q'uinal jme'-jtatique, ma ba la cac' jbatic ta smilel te j'alwanejetic yu'un Dios te jichuque”, xaex. 31Jich ya awaq'uic ta na'el te bit'il ja' nix yal-snich'anex jilel te mach'atic la smilic te j'alwanejetic yu'un te Diose. 32Jich yu'un lajinaic sju'tesel ta pasel te yat'el te namey q'uinal ame'-atatic te jajch'em ta spasel yu'unique. 33“¡Ts'umbalex jti'awal chanetic! ¿Bit'il c'an acoltay abaic ta castigo ta infierno? ¿Bit'il c'an colanic loq'uel tey a? 34Jich yu'un ya me jticunbeyex tel te j'alwanejetic soc te mach'atic ay sp'ijilique soc te jp'ijubteswanejetique. Ja'uc me to, ay jtul te ya amilic ta cruz, soc ay yan ya amajic ta sinagogaetic, soc te ya anutsic loq'uel ta alumalique. 35Jich yu'un te ja'exe, ja' me ya xc'ot ta awentaic stojel te la yich' malel xch'ich'el spisil te mach'atic toj yo'tanic te lajemiquix tele, jich bit'il te Abel te la yich' malel xch'ich'el ta xjajch'ibal, ja' to c'alal ta Zacarías te snich'an Berequiase te la yich' malel xch'ich'el ta bay olilal ay yu'un te xchic'jibal smajt'an Dios soc te temploe. 36Jamal ya calbeyex, ja' me ya acuchic ta apisilic ja'ex te cuxulex ta q'uinal ta ora to. 37“¡Jerusalén, Jerusalén! Ya amilic te j'alwanejetic yu'un te Diose, soc ya ach'ojic ta ton te mach'atic ticunbilic ta c'op ta atojolique. Bayal buelta te c'an jtsobeyex te awal-anich'anique jich bit'il ya stsob yalatac ta yanil xic' te me'mute, ja'uc me to, ma la ac'anic. 38Aiya me awaiyic stojol, jochol me ya xjil te alumalique. 39Ya calbeyex ta ora bael to, ma ba ya awilbonic xan jsit ja' to teme ya awalic: “Bin nax yutsil te mach'a talem ta swenta te Cajwaltique”, teme xaexe —xi' te Jesuse.


Copyright
Learn More

will be added

X\