San Mateo 22

1Te Jesús caj xan ta c'op ta stojolic ta swenta seña-c'op. Jich la yalbey yaiyic: 2—Te bit'il ya xc'ot ta ajwalinel te Dios te ay ta ch'ulchane, jich c'oem te bit'il ay jtul muc' ajwalil la spas q'uin yu'un te ya xnujbin te snich'ane. 3La sticun bael abatetic te ya xba yic' tel te mach'atic ic'bilic ta yilel te nujbinele, ja'uc me to, ma la sc'an talic. 4La sticun xan yan abatetic. Jich la spas bael ta mandal: “Albeya te mach'atic ic'bilique: ‘Chapalix cu'un te we'elile. La caq'uix ta milel te toroetic cu'une soc te jujp'en chambalametique. Spisil chapalix. Jich yu'un la'ic me ta yilel ta ora te nujbinele’, uta me”, xi' te ajwalile. 5“Te mach'atic ic'bilique ma'yuc sc'oplal c'ot ta yo'tanic te iq'uele. Te jtule bajt' ta at'el ta bay te sq'uinale. Te yane ba yaiy chonbajel. 6In te yantique la stsaquic te abatetic yu'un te muc' ajwalile. La yuts'inic soc la smilic. 7“Te c'alal la yaiy stojol te muc' ajwalile, bayal ilin yu'un. Jich la sticun bael te soldadoetic yu'une. Ba smilic te jmilawaletique, soc la xchic'beyic te slumalique. 8“Te muc' ajwalile la yalbey ts'iin te abatetic yu'une: “Chapalix spisil te q'uine, ja'uc me to, te mach'atic ic'bilique chican te ma nix ja'uc yu'unic a. 9Jich yu'un, baanic ta muc'ul beetic ta ti'lum. Ic'aic tel ta yilel nujbinel spisil te mach'a ya ata abaic soc tey a”, la yut bael. 10Jich a bajt'ic ta bebetic te abatetique. La stsobic tel spisil te mach'atic la sta sbaic soque. Capal talic soc te mach'atic lequique soc te mach'atic amenique. Jich noj ta ula' te snae. 11“C'alal och yil yula' te muc' ajwalile, la yil jtul winic tey a te ma ja'uc c'u'ul swenta il-nujbinel te slapoje. 12Jich la yalbey: “Joytic, ¿bit'il ay a te ochemat tel li'to, te ma ja'uc c'u'ul swenta il-nujbinel te alapoje?”, la yut. Te winique ma c'opoj yu'un. 13“Te muc' ajwalile la yalbey te abatetique: “Chucbeya sc'ab yacan. Ch'oja bael ta q'uejel ta ijc' q'uinal ta banti ya xc'o yoq'uetay sba soc tey ya xc'o sjets'ulay ye a”, la yut. 14“Melel tsobol te mach'atic ic'bilique, ja'uc me to, jteb nax te mach'atic tsabilique —xi' te Jesuse. 15Jich yu'un te fariseoetique ba xchap sc'opic te bi ya yut ya yac'beyic jelawuc sc'op te Jesuse. 16Jich la sticunic bael ta stojol cha'oxtul te jnopojeletic yu'un te fariseoetique soc cha'oxtul te mach'a jun yo'tan sbaic soc te Herodese. Jich tal yalbeyic te Jesuse: —Maestro, jna'ojtic stojol te bit'il puro smelelil te bila ya awale. Soc jna'ojtic te bit'il jamal ya awac' ta nopel te be yu'un te Diose. Ma'yuc mach'a te ya xiwat ta c'op ta stojol, te melel ma tsabiluc nax awu'un ta sit yelaw te mach'a ya awich' ta muq'ue. 17Ala caiytic te bit'il c'oem ta awo'tan. ¿Ya bal stac' te ya jtojtic jpatantic yu'un te Cesare o ma stac'? —xiic. 18Te Jesús la sna' stojol te bit'il ma lecuc te bila ay ta yo'tanique. Jich la yalbey: —Cha'lam te awo'tanique. ¿Bi yu'un ya awilbonic co'tan? 19Ac'bon quil jsejpuc te taq'uin ya atojic a te patane —la yut. Jich la yac'beyic yil jun denario-taq'uin. 20Te Jesús jich la yal: —¿Mach'a sloc'omba te ya awilic tey a, soc mach'a sbiil te nacal tey a? —xi'. 21La yalic: —Ja' te Cesare —xiic. Jesús la yalbey yaiyic: —Te bila ja' yu'un te Cesare, ac'beyaic me jiche, soc te bila ja' yu'un te Diose, ac'beyaic me uuc —xi' te Jesuse. 22Te c'alal la yaiyic stojol te jich la yale, bayal ayan yo'tanic yu'un, soc la yijq'uitayic jilel. Jich bajt'ic. 23Ja' nanix sc'aalelal a te tal sc'oponic Jesús te saduceoetic te ya yalic te ma'yuc cha'cuxele. Jich la sjojc'obeyic in aiyej to: 24—Maestro, la yal jilel te Moisese: “Teme ay laj jtul winic te cuxul jilel te yiname, teme ma'yuc jilel snich'ane, ja' ac'a yic' yinamin te yijts'ine. Jich me ay sts'umbal ya xc'ot te sbanquile”, te xie. 25Ay jich c'ot ta pasel ta coliltic. Ay juctul winiquetic te sjoy sbaic ta alatayele. Te banquilale nujbin. Ma'yuc snich'an jilel te laje. Te me'ba antse, ja' la yic' yinamin te ijts'inale. 26Jich c'ot ta swenta uuc te xchebale soc te yoxebale, xmelmon lajic ta sjuctululic te xmelmon la yinaminic te antse. 27Patil laj uuc te antse. 28Ta yorail te cha'cuxele, ¿mach'a yinam ya xc'ot ta sjuctululic? Melel xmelmon la yinaminic ta spisilic —xiic. 29Te Jesús la yalbey yaiyic: —Jowejemex ta c'op, yu'un ma ba c'oem ta awo'tanic te bila ts'ibubil jilel ta Sjun te Diose soc te bit'il ay yu'el te Diose. 30Melel ta yorail te cha'cuxele, ma ba ya xnujbiniquix, soc ma'yuquix nujbinel, yu'un jich ya xc'otic te bit'il ch'ul abatetic te ayic ta ch'ulchane. 31Te bit'il ya xcha'cux te animaetique, ¿yu'un bal ma ba awilojic te bila yaloj ta Sjun te Diose? Jich ts'ibubil jilel: 32“Jo'on Dioson yu'un te Abrahame te Isaaque te Jacobe”, te xie. Te Diose, ma ja'uc Dios yu'un te mach'atic lajemique. Ja' Dios yu'un te mach'atic cuxulique —xi' te Jesuse. 33Te c'alal la yaiyic stojol te ants-winiquetique, bayal ayan yo'tanic yu'un te bila la yac' ta nopele. 34C'alal la yaiyic stojol te fariseoetic te bit'il la yac' majc'uc sti' te saduceoetic te Jesuse, jich la stsob sbaic. 35Ay jtul jts'ibojom tey a, la sc'an te ya yilbey yo'tan uuc te Jesuse. Jich la sjojc'obey: 36—Maestro, ¿bi mandaliluc te muc' sc'oplal yu'un ta spisil te mandalile? —xi'. 37Jich la yal te Jesuse: —“C'ux me x'awaiy te Cajwaltic Dios soc spisil awo'tan, soc spisil ach'ulel, soc spisil ap'ijil”, te xie. 38Ja' in to, ja' sbabial mandalil te muc' sc'oplale. 39Te xchebal mandalil te pajal soque, ja' in to: “C'ux me x'awaiy ta awo'tan te apat-axujq'ue, jich nix te bit'il c'ux ya awaiy aba atuquel te ja'ate”, te xie. 40Ja' in cheb mandaliletic to, ja' slojp' spisil te mandalil soc te bila la yal te j'alwanejetic yu'un te Diose —xi' te Jesuse. 41Te bit'il tsoboj to sbaic a te fariseoetique, te Jesús caj sjojc'obey: 42—¿Bi ya awalic yu'un te Cristoe? ¿Mach'a sts'umbal ya awaiyic? —xi'. La yalic: —Ja' sts'umbal te muc' ajwalil David —xiic. 43Te Jesús la yalbey yaiyic: —¿Bit'il ay a jiche te “Cajwal”, xi' te Davide? Melel jich ac'bot yal yu'un te Ch'ul Espiritue: 44“Te Cajwaltic Dios jich la yalbey te Cajwale, ‘Naclan ta swa'el jc'ab, ja' to teme la cac'bat apech' ta teq'uel te acontrotaque’, xi' te Diose”, te xie. 45“Albon caiy jiche: ¿Bit'il ay te ja' sts'umbal David te Cristoe? Melel “Cajwal”, xi' te David yu'un te Cristoe —xi' te Jesuse. 46Ja'uc me to, jtul ma'yuc mach'a la sujt'es jp'aluc te sc'ope. Soc spisilic la xi'ic sjojc'oyel yan aiyejetic ta patil bael.


Copyright
Learn More

will be added

X\