San Mateo 21

1Nopol xc'otiquix ta Jerusalén a, c'otic ta ch'in lum Betfagé te ay ta bay te Wits Olivailtique. Te Jesús la sticun bael cha'tul te jnopojeletic yu'une: 2Jich la yalbey: —Baanic ta bay in ch'in lum to te chican ta ilele. Tey me chucul ya xc'o ataic cojt' me' burra soc te yale. Tilaic, nitbonic tel. 3Teme ay mach'a ay bi ya yalbeyexe, albeya: “Ja' ya xtuun yu'un te Cajwaltique,” utaic. Jich me ora nax ya yac'beyex tel a —xi' te Jesuse. 4Jich c'ot ta pasel te bila yaloj jilel te j'alwanej yu'un te Diose: 5“Albeya te lum yu'un Sión: ‘Ilawilic, talix te muc' ajwalil awu'unique. Peq'uel yac'oj sba. Scajtibinej tel te yal me' burra soc te alal burro te yal te cuch-ijc'atsil’, xaat me”, te xie. 6Jich a bajt'ic te cha'tul jnopojeletique. Jich nix la spasic te bila albotic bael yu'un te Jesuse. 7La yiq'uic tel te me' burra soc te yale. La slimbey sc'u'ic ta spatic. Jich mo scajtibin te Jesuse. 8Ta spisil te ants-winiquetic la slim sc'u'ic ta be, soc ay la sbojic tel sc'ab te' te la slimic ta bee. 9Te ants-winiquetique te neel yacalic ta beel soc te patil ayique, la yawtayic: —¡Jelawen yutsil te sts'umbal David! ¡Bin nax yutsil te mach'a talem ta swenta te Cajwaltique! ¡Jelawen yutsil te Mach'a ay ta ch'ulchane! —xiic ta aw. 10C'alal och bael Jesús ta lum Jerusalén, xch'inch'on nax jajch'el spisil te lume. La sjojc'oyic: —¿Mach'a a me to? —xiic. 11Ta spisil te ants-winiquetique jich la yalic: —Ja' te j'alwanej yu'un Dios te Jesús sbiil te talem ta lum Nazaret ta sq'uinal Galilea —xiic. 12Te Jesús och bael ta templo. La sten loq'uel spisil te mach'atic yacalic ta chonbajel, manbajel tey a. La sbot'q'uinbey smesaic te jel-taq'uinetique, soc snactijib te mach'atic yacalic ta xchonel te stsumute. 13Jich la yalbey: —Jich ts'ibubil jilel ta Sjun te Diose: “Te jnae snail sc'oponel Dios sbiil”, te xie. Ja'uc me to, te ja'exe la ac'atp'uniquix ta xch'en j'eleq'uetic —la yut. 14Tey ta templo noptsajic tel ta stojol Jesús te ma'sitetic soc coxoetic. Jich la scoltay. 15Te jwolwanej-sacerdoteetic soc te jts'ibojometique, ilin yo'tanic yu'un te c'alal la yilic te jchajp at'elil te la spas te Jesuse soc te la yaiyic stojol te jich yacalic ta aw ta stojol Jesús ta bay templo te alaletique: “¡Jelawen awutsil te sts'umbalat David!”, te xiique. 16Jich la yalbeyic te Jesuse: —¿Ya bal awaiy stojol te bila yacalic ta yalel in alaletic to? —xiic. Te Jesús la yalbey: —Yac. ¿Yu'un bal ma'yuc awilojic ta Sjun Dios te ja'exe? te bit'il jich ts'ibubile: “Ta swenta ye alaletic soc ta swenta sti' chu'ul-alaletic te bit'il jelawen yutsil ya yich' c'ajintayel te abiile”, te xie —xi' te Jesuse. 17Te Jesús la yijq'uitay jilel te muc'ul lume. Bajt' ta lum Betania. Tey c'ax ajc'ubal yu'un a. 18Ta sacubel q'uinal sujt' xan bael ta muc'ul lum te Jesuse, ay ta wi'nal. 19La yil pejt' higo-te' ta ti' be. Jich noptsaj bael tey a, ja'uc me to, ma'yuc sit c'o stabey. Puro yabenal nax ay. Te Jesús jich la yalbey te higo-te': —Ma'yuc bi ora ya awac' xan asit —la yut. Ora nax taquej te higo-te'e. 20Te c'alal jich la yilic te jnopojeletique, jchajp nax la yilic. La sjojc'obeyic te Jesuse: —¿Bit'il ay a te taquej ta ora nax te higo-te'e? —xiic. 21Te Jesús la yalbey yaiyic: —Jamal ya calbeyex, teme ay xch'uunjel awo'tanique soc teme ma xawal ta awo'tanic te ma jichuc ya xc'ote, ya me xju' ta pasel awu'unic uuc jich te bit'il la jpasbey te higo-te'e. Teme ya awalbey in wits to: “Loc'an bael li'to. Ch'oja aba ochel ta mar”, teme ya awute, jich ya xc'ot ta pasel. 22Spisil te bila ya ac'anic ta sc'oponel te Diose, ya x'ac'botex teme jich ach'uunejique —xi' te Jesuse. 23C'alal tal ta templo te Jesuse. Jajch'emix ta p'ijubteswanej a te tal ta c'oponel yu'un te jwolwanej-sacerdoteetique soc te principaletic yu'un te lume. La sjojc'obeyic: —¿Banti la awich' awat'el ta spasel spisil in to? ¿Mach'a la yac'bat awat'el? —xiic. 24La yal te Jesuse: —Jichon uuc, ay bila ya jojc'obeyex. Teme ya awalbonique, jo'on uuc ya me calbeyex te bi cat'el quich'oj ta spasel in to. 25¿Mach'a la yac'bey yat'el ta yaq'uel ich'ja' te Juane? ¿Ja' bal te Diose, o ja' bal te winiquetique? —xi'. Jich jajch' yaanic stuquelic: —Teme ya caltic te ja' ac'bot yat'el yu'un te Diose, ya me yalbotic: “¿Bistuc ma la ach'uunic te bila la yale?”, ya me yutotic. 26Soc teme ya caltic te ja' ac'bot yat'el yu'un winiquetic, ya me jxi'tic te lume, yu'un ay ta yo'tanic te ja' j'alwanej yu'un Dios te Juane —xiic ta yaanel. 27La yalbeyic ts'iin te Jesuse: —Ma jna'tic —xiic. La yal uuc te Jesuse: —Jichon uuc, ma xcalbeyex te mach'a la yac'bon cat'el ta spasel spisil in to —xi'. 28Soc la yal te Jesuse: —¿Bi xi' awo'tanic yu'un in to? Ay jtul winic te ay cheb snich'nab. Jich la yalbey te jtule: “Jnich'an, ya me xbaat ta at'el ta ora to ta bay te ts'usubiltique”, la yut. 29La yal te snich'ane, “Ma jc'an”, xi'. Ja'uc me to, patil la sujt'es yo'tan yu'un te bila la yalbey te state. Jich bajt' ta at'el. 30“Te winique la sc'opon te yan snich'ane. Jich nix la yalbey uuc. La yal te quereme: “Yacuc, jtat. Ya xboon”, xi'. Ja'uc me to, ma bajt'. 31¿Mach'a ta xchebalic awaiy te la spasbey te bila la sc'an yo'tan te state? —xi' te Jesuse. La yalic: —Ja' te sbabiale —xiic. Te Jesús jich la yal: —Jamal ya calbeyex, te jc'an-patanetic soc te jmulawil-antsetique, ya me xneelajic ochel awu'unic tey a ta banti ay ta ajwalinel te Diose. 32Melel tal te Juane. La yac'beyex at'unic sbelal te bila toj ta pasele, ja'uc me to, ma la ach'uunic te bi la yalbeyexe. Yan te jc'an-patanetique soc te jmulawil-antsetique la xch'uunic stuquelic. Yan te ja'exe manchuc teme la awilic te jich yac ta c'oel ta pasele, ma ba la asujt'es awo'tanic soc ma ba la ach'uunic. 33“Aiya awaiyic stojol yan seña-c'op: Ay jtul winic te la sts'un ts'usubiltic ta sq'uinal, soc la sjoy ta ts'ajc'. La sjoc'bey xch'enal te spits'jibal sit te sts'usube, soc la sts'ac'uy moel iljibal-q'uinal na, swenta yu'un ya yich' canantayel tey a te ts'usubiltique. La yac' jilel ta wentainel yu'un j'at'eletic te ts'usubiltic yu'une, soc bajt' ta c'ubul q'uinal. 34“C'alal la staix yorail ta tulel sit te sts'usube, la sticun abatetic ta c'anel tel te jayeb ya xc'ot ta swenta te sts'usube. 35In te j'at'eletique la stsaquic te abatetique. Jtul la smajic, jtul la smilic, soc jtul la xch'ojic ta ton. 36Te yajwal q'uinale la sticun xan tsobol yan abatetic. C'ax jich te bit'il la sticun ta neelale. Te j'at'eletique jich nix la spasbeyic te bit'il la spasbeyic te yantique. 37“Ta slajibal, la sticun bael te snich'ane. Yu'un la yal ta yo'tan: “Te jnich'ane ya me yich'bonic ta muc'”, xi' ta yo'tan. 38“Yan te j'at'eletique, la yilic te ja' snich'an yajwal q'uinal te taleme, soc la sna'ic te ja' ya xjil ta swenta te q'uinale. Jich yu'un la yalbey sbaic: “Ja' lec jmiltic, yu'un jo'otic me ya xjil ta jwentatic te q'uinale”, xiic. 39Jich la stsaquic. La sloq'uesic bael ta spat ts'usubiltic soc la smilic. 40C'alal ya xtal te yajwal ts'usubiltique, ¿Bi ya spasbey awaiy te j'at'eletic yu'une? —xi' te Jesuse. 41La yalic: —Ya me xtal slajin ta jc'axel te mach'atic amenique, ya me yac'bey ta swenta yan j'at'eletic te ts'usubiltic yu'une, ja' te ya sna'ic yaq'uel jujun buelta te jayeb ya sitin te ts'usube —xiic. 42Te Jesús jich la yal: —¿Ma bal awilojuc te jich ya yal ta Sjun Dios: “Te ton te ma lecuc la yilic te jpas-naetique, ja' yiptajib chiquin-na c'otix stuquel. Ja' spasoj te Cajwaltique, jchajp nax q'uinal ya caiytic yu'un”, te xie? 43Jich yu'un ya calbeyex, ya me xpojbotex loq'uel ta awolilic te bit'il ay ta ajwalinel te Dios te ay ta ch'ulchane. Ja' me ya xc'ot ta swentaic te mach'atic ya sitin yu'unic ta leque. [ 44In te ton ya cale, teme ay mach'a ya syales sba a, ya me xlilaj tey a. Soc teme ya xnet'ot yu'un te tone, jc'axel me tan ya xjil yu'un] —xi' te Jesuse. 45Te jwolwanej-sacerdoteetic soc te fariseoetique, te c'alal la yaiyic stojol te seña-c'opetic la yal te Jesuse, la sna'ic stojol te ja' sc'oplalique. 46Yo'tan c'an stsaquic, ja'uc me to, la xi'ic te lume. Yu'un c'oem ta yo'tanic ta ja' j'alwanej yu'un Dios te Jesuse.


Copyright
Learn More

will be added

X\