San Mateo 2

1Ayin Jesús ta lum Belén te ay ta sq'uinal Judea te c'alal ay ta muc' ajwalil a te Herodese. Julic tel ta Jerusalén p'ijil winiquetic te talic ta stojol sloq'uib c'aal. 2Jul sjojc'oyic: —¿Banti ay te muc' ajwalil yu'un te judioetic te ayinemixe? La quilbeytic te ec' yu'un te banti talemotic ta stojol sloq'uib c'aale, jich yu'un tal quich'tic ta muc' —xiic. 3C'alal la yaiy stojol te muc' ajwalil Herodese, nijc' yo'tan yu'un soc spisil lum Jerusalén. 4Jich te ajwalile la yic' tel te jwolwanej-sacerdoteetic soc te jts'ibojometique. La sjojc'obey yaiy te banti lumiluc ya x'ayin te Cristoe. 5Jich la yalic: —Ta lum Belén te ay ta sq'uinal Judea, melel jich la sts'ibuy jilel te j'alwanej yu'un te Diose: 6“Te ja'at lum Belén, te ayat ta sq'uinal Judá, ma ch'in xujt'uc c'oemat ta stojol te ajwaliletic ta sq'uinal Judea. Melel tey ya xloc' tel a te jtul ajwalil te ya swentainbon te lum Israel cu'une”, te xie —xiic. 7Jich te Herodese muquen la yic' tel te p'ijil winiquetique. La sjojc'obey yaiy ta lec te bi ora chicnaj te eq'ue. 8Jich la sticun bael ta Belén. La yalbey bael: —Baanic ta Belén. Jojc'oyaic ta lec tey a te alale. Teme la ataique, ya me xc'ax awalbon caiy. Jich me ya xba calbey wocol ta stojol uuc te jo'one —la yut bael. 9Te c'alal la yaiybeyic stojol sc'op te ajwalile, jich bajt'ic te p'ijil winiquetique. Te ec' yilojic te banti talemique, neelaj bael yu'unic. Tey c'ot ta comel ta banti stojol ay te alale. 10Te c'alal la yilic te eq'ue, bayal bujts'naj yo'tanic yu'un. 11Jich ochic ta na ta banti ay te alale. La yilic soc te sme'e, ja' te Mariae. La squejan sbaic ta stojol, soc la sjam te yawil sbiluquique. Jich la yac'beyic smajt'anin oro, perfume soc mirra. 12Soc te c'alal sujt'ic bael ta slumalique, ma ba c'axic tey a ta ba ay te Herodese, yu'un albot yaiyic ta swaichic yu'un Dios te ma ba ya xc'axiquix tey a. Jich yan be la st'unic bael. 13Te c'alal sujt'iquix bael a te p'ijil winiquetique, te José chicnaj la yil ta swaich jtul ch'ul abat yu'un te Cajwaltique. Jich albot yu'un: —Jajch'an, ic'a bael te alale soc te sme'e. Anan bael ta sq'uinal Egipto. Tey me ya x'ainat a ja' to teme ya calbat xane, yu'un te Herodese ya xtal sle smil te alale —xi' te ch'ul abate. 14Jich jajch' te Joseje. La yic' bael ta ajc'ubal te alale soc te sme'e. Bajt'ic ta Egipto. 15Tey ainic a ja' to c'alal laj te Herodese. Ja' in to, ja' c'ot ta pasel te bila yaloj Cajwaltic ta swenta te j'alwanej yu'une: “Ta Egipto la quic' loq'uel tel te jnich'ane”, te xie. 16Te Herodese la sna' ta yo'tan te laj ta lo'layel yu'un te p'ijil winiquetique. C'axem to xan ilin yu'un. La yal mandal te ya xba yich' milel spisil te alalqueremetic te che'cheb ja'wil ya'wilalique soc uuc te ma to xloc' cheb ja'wil yu'unic te ayic ta spamal lum Belén soc ta sjoylejal. Ja' la sna' te bi ora chicnaj te ec' te la yalic te p'ijil winiquetique. 17Jich c'ot ta pasel te bila ts'ibubil jilel yu'un te j'alwanej yu'un Dios te Jeremías sbiile: 18“Ay chicnaj c'op ta lum Ramá, yac ta aw ta oq'uel soc yac ta ajc'an. Ja' te Raquel te ya yoq'uetay te yalataque. Ma sc'an te ya xmuc'tesbot q'uinal yaiye, melel lajemiquix te yalataque”, te xie. 19Te c'alal lajix a te Herodese, ay jtul ch'ul abat yu'un te Cajwaltique chicnaj la yil ta swaich te José te c'alal ay to ta sq'uinal Egipto. Jich la yalbey: 20—Jajch'an, ic'a bael te alale soc te sme'e. Sujt'an bael ta sq'uinal Israel, yu'un lajemiquix te mach'atic c'an smilic te alale —xi'. 21Jich jajch' te Joseje. La yic' bael te alale soc te sme'e, bajt' ta sq'uinal Israel. 22Ja'uc me to, te José, la yaiy stojol te bit'il ja' Arquelao te sjelolinej jilel ta ajwalil te state te Herodes sbiile. La xi' te ya xbajt' ta bay te smaquen-q'uinale. Soc te bit'il albot xan ta swaiche, jich bajt' ta sq'uinal Galilea. 23Jich c'o ainuc ta lum Nazaret te ay ta sq'uinal Galilea. Jich c'ot ta pasel te bila yaloj te j'alwanejetic yu'un Dios te ja' Nazaret sbiil ya xc'ot te Jesuse.


Copyrighted Material
Learn More

will be added

X\