San Mateo 18

1Jich yorail te noptsajic tel ta stojol Jesús te jnopojeletique. La sjojc'obey yaiyic: —¿Mach'a a te muc' sc'oplal ya xc'ot ta banti ay ta ajwalinel te Dios te ay ta ch'ulchane? —xiic. 2Jesús la yic' tel jtul alal, la stejc'an ta yolilic. Soc jich la yal: 3—Jamal ya calbeyex, teme ma xyanaj te acuxlejale soc teme ma pajaluc awo'tanic ya xc'ot soc te alaletique, ma xju' awu'unic te ya awajwalinic te Dios te ay ta ch'ulchane. 4Jich yu'un te mach'a peq'uel ya yac' sba jich bit'il in alal to, ja' me muc' ya xc'ot tey a ta banti ay ta ajwalinel te Dios te ay ta ch'ulchane. 5Soc te mach'a jo'on ta jwenta te ya yic' ta stojol jtul alal jich bit'il in to, jo'on la yic'onix abi. 6“Mach'auc a te ya yac' yaluc ta mulil jtuluc te mach'atic peq'uel ayic te xch'uunejonique, ja' lec te lajuc yich' chuquel muc'ul cha' ta snuc' te la yich' ch'ojel ochel ta sna'bilal te mare. 7¡Ya me yil swocolic te mach'atic ayic ta balumilal ta scaj te ay yalesel ta mulile! Puersa ay mach'atic ya syaleswan ta mulil, ja'uc me to, ya me yil swocol te mach'a jich ya spase. 8“Jich yu'un teme ja' ya syalesat ta mulil te ac'abe, o ja' te awacane, boja loq'uel. Ch'oja bael, yu'un ja' lec te yacuc x'ochat ta cuxinel, manchuc me coxoat soc c'ojc'ol-c'abat. Ja' wocol teme xchebal ac'ab soc xchebal awacan te ya xch'ojotat ochel ta c'ajc' te ma xtup' sbajt'el q'uinale. 9Soc teme ja' ya syalesat ta mulil te asite, loq'uesa. Ch'oja bael, yu'un ja' lec te yacuc x'ochat ta cuxinel manchuc teme jp'ij nax asite. Ja' wocol teme xchebal asit ya xch'ojotat ochel ta infierno ta c'ajc' te ma xtup' sbajt'el q'uinale. 10“Tsajtaya me abaic. Ma me ayuc jtuluc te ma'yuc sc'oplal ta awo'tanic te mach'atic peq'uel ayique. Ya calbeyex te spisil ora ayic ta canantayel yu'un ch'ul abatetic yu'un te Jtat te ay ta ch'ulchane. [ 11Melel te Nich'anile tal scoltay te mach'a ch'ayeme.] 12“¿Ma bal jichuc ay ta pasel? Teme ay jtul winic te ay jo'winic ta cojt' te xchije, teme ch'ay jilel ta be cojt'uc, ¿ma bal yacuc yijq'uitay jilel ta wits te balunlajuneb yo'winic (99) ta jcojt'e, yu'un ya xba sle tel te cojt' xchij te ch'ayeme? 13Teme la sta tel ta leele, jamal ya calbeyex, bin nax me yo'tan yu'un. C'ax jich bin nax yo'tan yu'un a te bit'il balunlajuneb yo'winic (99) ta cojt' te ma ba jowejique. 14Ja' nanix jich ma sc'an yo'tan te Jtatic te ay ta ch'ulchan teme ya xch'ay jtuluc in to te mach'a peq'uel ayique. 15“Soc teme ay bila amen la spasbat te awermanoe, baan, chapa soc. Ac'beya sna' te bila amen spasoje. Teme la yaiybat stojol te ac'ope, jich lec ayatix soc awermano abi. 16Ja'uc me to, teme ma la yaiybat te ac'ope, ic'a bael jtul chebuc testigo, swenta yu'un ay me cha'oxtul testigoetic yu'un spisil te bila ya awalic tey ae. 17Teme ma la sc'an yaiybey stojol sc'opic uuc, albeya yaiyic stsojbol te jch'uunjeletique. Teme ma la sc'an yaiybey stojol sc'opic uuc te jch'uunjeletique, jich me ac'a c'otuc awu'unic te bit'il mach'a ma ba xch'uunej te Diose soc jich te bit'il jc'an-patane. 18“Jamal ya calbeyex, te bila ya achuquic li'to ta balumilal, jich me chucul ya xc'ot ta ch'ulchan. Ja' nanix jich te bila ya achajbanic li'to ta balumilal, jich chajbanbil ya xc'ot ta ch'ulchan. 19“Soc ya calbeyex xan, teme ay chebuquex li'to ta balumilal te ya achap ac'opic te bila ya ac'anbey te Diose, ya me x'ac'botex yu'un te Jtat te ay ta ch'ulchane. 20Melel te banti stsoboj sbaic cha'oxtul ta swenta te jbiile, tey ayon a ta bay yolilic —xi' te Jesuse. 21Te Pedroe noptsaj tel soc jich la yal: —Cajwal, ¿jayeb buelta ya sc'an te ya jpasbey perdón te quermano teme ya sta smul ta jtojole? ¿Tic' bal a te juqueb bueltae? —xi'. 22La yal te Jesuse: —Ma xcalbat te tic' a te juqueb bueltae. Ja' to tic' a teme juqueb buelta ya x'esmaj ta lajuneb xchanwinique (70 x 7). 23“Jich yu'un, ta banti ay ta ajwalinel te Dios te ay ta ch'ulchane, jich c'oem te bit'il ay jtul muc' ajwalil la sc'an yich'bey ta wenta sbet te abatetic yu'une. 24C'alal jajch' yich'bey ta wenta sbet te juju-jtule, ic'ot ochel tel ta stojol jtul winic te ay lajunmil talento te sbete. 25Te bit'il ma ju' yu'un stojel te sbete, la yal mandal te muc' ajwalile te ya yich' chonel bael soc yinam snich'nab soc spisil te bila ay yu'une, swenta yu'un jich me ya xtojob a te sbete. 26“Jich yu'un te abate, la squejan sba ta yalel wocol ta stojol te yajwale: “Cajwal, wocoluc, maliybon xan. Ya jtojbat spisil ta c'unc'un”, xi' ta stojol. 27Te ajwalile la sna'bey yo'bolil sba. Jich la spasbey perdón yu'un spisil te sbete soc la scoltay bael. 28“Ja'uc me to, te abate loq'uel to bael a te la sta sba soc jtul sjoy ta abatil te ay sbet jo'winic denario yu'une. La stsac soc la spich'bey snuc': “Tojbon te abete”, la yut. 29“Te sjoy ta abatile la squejan sba ta yalel wocol ta stojol: “Wocoluc, maliybon xan. Ya jtojbat spisil ta c'unc'un”, xi' ta stojol. 30Ja'uc me to, ma la sc'an smaliybey. La yac' ta chucjibal ja' to teme ya stoj te sbete. 31“C'alal la yilic te yantic sjoy ta abatile, bayal la smel yo'tanic yu'un. Jich ba xcholbeyic yaiy te yajwalic spisil te bila c'ot ta pasele. 32Jich yu'un te ajwalile la sticun ta iq'uel tel te abate, soc la yalbey: “Mero amenat ta abatil. Jo'on la jpasbat perdón yu'un spisil te abete, scaj te la awalbon wocol yu'une. 33Jich nix la sc'an lajuc ac'uxtay uuc te ajoye, jich bit'il la jc'uxtayat te jo'one”, la yut. 34Te ajwalile ilin yo'tan yu'un. Jich la yac'bey ta sc'ab te jmajawaletic te ya yaq'uic castigo, ja' to teme ya stoj spisil uuc te sbete. 35“Ja' nanix jich uuc te Jtat te ay ta ch'ulchane. Jich me ya spasbeyex teme ma ba ya apasbey abaic perdón juju-jtul soc te awermanoe —xi' te Jesuse.


Copyright
Learn More

will be added

X\