San Mateo 17

1Waqueb c'aal ta patil te Jesús la yic' bael te Pedro, te Jacobo, soc te yijts'ine ja' te Juane. Stuquelic nax ic'otic moel yu'un Jesús ta bay muc' toyol wits. 2C'atp'uj ta sitic tey a te Jesuse. Te sit yelawe xlemet nax jich bit'il te c'aale, soc buen sac c'ot te sc'u'-spaq'ue. 3Soc chicnaj tey a te Moisés soc Elías, yacalic ta c'op soc te Jesuse. 4Jich te Pedroe la yalbey te Jesuse: —Cajwal, ¡buen lec te li' ayotic to! Teme ya ac'ane, ya jpastic oxwol nailwamal. Jun awu'un te ja'ate, jun yu'un te Moisese, soc jun yu'un te Eliase —xi'. 5Te c'alal yac to ta c'op a te Pedroe, ora potsotic yu'un tocal te xlemet nax xojobile. Ay mach'a c'opoj tel ta yolil te tocale: —Ja' in to ja' te Jnich'an te bayal c'ux ta co'tane. Bin nax co'tan yu'un. Aiybeya awaiyic stojol sc'op stuquel, —xi'. 6Te c'alal la yaiyic stojol te jnopojeletique, bayal xiw yo'tanic yu'un, soc la stinan sbaic coel c'alal ta lum. 7Te Jesús noptsaj tel, tal spic, soc la yalbey yaiyic: —Jajch'an, tec'lanic. Ma me xiwex —la yut. 8Te c'alal la stoy te sitique, ma'yuc mach'a la yiliquix tey a. Stuquel xanix te Jesuse. 9Te c'alal yacaliquix coel tel ta wits a, te Jesús la spas ta mandal te jnopojeletic yu'une: —Ma me mach'a xawalbey yaiyic te bila ac'botat awil ta asitique ja' to teme cha'cux tel ta bay animaetic te Nich'anile —xi'. 10Te jnopojeletique jich caj sjojc'obeyic te Jesuse: —¿Bi yu'un te ya yal te jts'ibojometic te puersa ja' neel ya xtal te Eliase? —xiic. 11La yal te Jesuse: —Melel nix a te ja' neel ya xtal te Eliase, soc melel xaal te ya xchajban spisil. 12Ja'uc me to, ya calbeyex te xtaluquix te Eliase. Ma la sna'beyic sba. Jich c'ax swocol yu'unic. Chican te bila la sc'an la spasbeyique. Jich nix te Nich'anile, ya me xc'ax swocol ta sc'abic uuc —xi' te Jesuse. 13Jich c'ot ta yo'tanic te jnopojeletique te ja' la yalbey sc'oplal te Juan J'ac'-ich'ja'e. 14Te c'alal c'otic tey a ta banti stsoboj sbaic te ants-winiquetique, noptsaj tel ta stojol Jesús jtul winic. Tal squejan sba ta stojol. Jich la yal: 15—Cajwal, wocoluc, c'uxtaybon te jnich'ane, yu'un ya xtup' yic' spisil ora. Bayal swocol yu'un. Bayuc nax ya xch'ay. Bayal buelta ch'ayix ta c'ajc' soc ta ja'. 16La quiq'uix tel li'to ta stojol te jnopojeletic awu'une, ja'uc me to, ma ju' yu'unic scoltayel —xi'. 17La yal te Jesuse: —¿Bit'il ayex a ja'ex te ma'yuc bi xch'uunej awo'tanic ta stojol te Diose soc te ma lecuc te awo'tanique? ¿Jayeb me xan c'aal te ya joinexe? ¿Jayeb me xan c'aal te ya jts'icbeyex te bit'il ayexe? Ic'bonic tel te quereme —xi'. 18Te Jesús la yalbey mandal te pucuje. Jich loc' ta yo'tan te quereme. Jc'axel lecub yu'un. 19Patil te jnopojeletic yu'une la sc'oponic ta stuquel te Jesuse. La sjojc'obeyic yaiy: —¿Bi yu'un te ma ju' cu'untic sloq'uesel jo'otic te pucuje? —xiic. 20La yal te Jesuse: —Yu'un ma'yuc xch'uunjel awo'tanic ta lec. Jamal ya calbeyex, te ayuc jich xch'uunjel awo'tanic jtebuc te bit'il sbac' mostaza te biq'uit naxe, ya me xju' ya awalbey in wits to: “Loc'an bael li'to, baan ta yan q'uinal”, teme ya awute, jich nix ya xc'ot ta pasel awu'unic. Ma'yuc bila ma xju' awu'unic spasel te jichuque. [ 21Ja'uc me to, ma xju' ta loq'uesel pucujetic te pajal soc in to ja' to teme ya apasic ayuno ta sc'oponel Dios yu'une] —xi' te Jesuse. 22Te c'alal la sjoin xan sbaic ta beel ta sq'uinal Galilea, te Jesús jich la yalbey yaiyic te jnopojeletique: —Te Nich'anile ya me x'ac'ot ta sc'ab te ants-winiquetique. 23Ya me yaq'uic ta lajel, ja'uc me to, ta yoxebal c'aal ya me yich' cha'cuxesel —xi'. Te jnopojeletique bayal la smel yo'tanic yu'un te bila la yale. 24Te c'alal c'ot ta lum Capernaúm te Jesús soc te jnopojeletic yu'une, te mach'atic ya stsobic taq'uin jujun ja'wil yu'un te templo ta Jerusalén tal sc'oponic te Pedroe. Jich la yalic: —¿Ya bal yac' te maestro awu'unic te cheb dracma-taq'uin ay ta c'anel yu'un te temploe? —xiic. 25La yal te Pedroe: —Yac —xi'. Jich och bael ta na te Pedroe. Ja' neel c'opoj te Jesuse. Jich caj yalbey: —Simón, ¿bila ya awal? ¿Mach'a a te ya sc'anbeyic spatan te muc' ajwaliletic ta balumilale? ¿Ja' bal ya sc'anbeyic te yal-snich'anique? ¿O ja' bal ya sc'anbeyic te jyanlumetique? —xi'. 26La yal te Pedroe: —Ja' nax te jyanlumetique —xi'. Te Jesús la yalbey: —Jich yu'un libre ayic te yal-snich'anic jiche. 27Ja'uc me to, swenta yu'un ma me mach'a amen yo'tan ya xc'ot yu'un, baan ta ti'mar. Ch'oja ochel te anzuelo. Nita loq'uel te chay te neel ya stsacbate. Jachbeya ye. Tey me ya ata a te jun estatero-taq'uin te ya awac'bon te cu'une soc uuc te awu'une. Ich'a bael. Baan, ac'a jilel —xi' te Jesuse.


Copyright
Learn More

will be added

X\