San Mateo 16

1Ay fariseoetic soc saduceoetic te ba sc'oponic te Jesuse, yu'un la sc'an yilbeyic yo'tan. Jich la sc'anbeyic te ya yac' ta ilel seña yu'el ta ch'ulchan. [ 2Ja'uc me to, te Jesús la yalbey yaiyic: —Te c'alal malix a te c'aale jich ya awalic: “Q'uepelix q'uinal pajel, yu'un tsaj te ch'ulchane”, xaex yu'un. 3Soc te c'alal sacubix a te q'uinale, jich ya awalic: “Yo'tic ya xtal ja'al, yu'un tsaj te ch'ulchan soc ay tocal”, xaex yu'un. ¡Cha'lam awo'tanic te ja'exe! Ya ana'ic stsajtayel te bi yilel te q'uinale, ja'uc me to, ya awalic te ma x'ana'ic stsajtayel te señaetic yac ta coel ta pasel ta ora to.] 4In te mach'a cuxulic ta q'uinal ta ora to, amen yo'tanic soc jmulwejetic, ya sc'an seña yilic, ja'uc me to, ma x'ac'botic. Ja' seña ta stojolic te Jonás te namey q'uinal j'alwanej yu'un te Diose —xi'. Jich la yijq'uitay jilel. Q'uejel a bajt'. 5Te c'alal c'axic bael ta jejch' mar, ma la sna' yich'ic bael swajic te jnopojeletique. 6Te Jesús jich la yal: —Na'aic me q'uinal ta lec, tsajtaya me abaic ta swenta te levadura yu'un te fariseoetic soc te saduceoetique —xi'. 7Te jnopojeletique jich caj yalbey sbaic yu'un: —Ja' yu'un te ma la jna'tic tel te waje —xiic. 8Te Jesús la sna' stojol te bila la yalbey sbaique. Jich caj yalbey: —¿Bistuc ya awalbey abaic te ma'yuc waj awich'ojique? Ma'yuc xch'uunjel awo'tanic. 9Yu'un ma to c'oemuc ta awo'tanic jiche. ¿Yu'un bal ch'ayix ta awo'tanic te jo'pejch' waj we'ic a te jo'mil (5,000) ta jtule, soc ch'ay balix ta awo'tanic te jayeb moch noj a te sobraile? 10¿Soc ch'ay balix ta awo'tanic te jucpejch' waj la yich' mac'linel a te chanmil (4,000) ta jtule, soc te jayeb moch noj te sobraile? 11¿Bit'il ay a te ma c'ot ta awo'tanic te ma ja'uc waj te la calbeyex sc'oplale? Ja' la calbeyex te ya atsajtay abaic ta swenta te levadura yu'un te fariseoetic soc te saduceoetique —xi' te Jesuse. 12Jich c'ot ta yo'tanic te jnopojeletic te ma ja'uc la yal te ya stsajtay sbaic ta swenta te levadura yu'un te waje. Ja' la yal te ya sc'an ya stsajtay sbaic yu'un te bila ya yac' ta nopel te fariseoetic soc te saduceoetique. 13Te Jesús c'ot ta bay te q'uinal te Cesarea Filipo. Tey la sjojc'obey yaiy a te jnopojeletic yu'une: —¿Bi ya yalic awaiy te ants-winiquetique? ¿Mach'a ta sc'opic te Nich'anile? —xi'. 14La yalic: —Ay ya yalic te ja'at Juanat te J'ac'-ich'ja'e. Te yane ya yalic te ja'at Eliasat. Soc ay yantic ya yalic te ja'at Jeremiasat, o yan namey q'uinal j'alwanejat yu'un te Diose —xiic. 15Jich albotic yu'un te Jesuse: —¿Ja' xan te ja'exe, mach'aon ta ac'opic uuc? —xi'. 16La yal te Simón Pedroe: —Ja'at Cristoat te Snich'anat te cuxul Diose —xi'. 17La yal te Jesuse: —Bin nax me awutsil te ja'ate, Simón te snich'anat Jonase, te melel ma ants-winicuc te la yac'bat ana' yalel in to. Ja' la yac'bat ana' stojol te Jtat te ay ta ch'ulchane. 18Jo'on ya cal te ja'at Pedroat, ta sba te ton in to ya cac' ipajuc ta stsojbol a te jch'uunjeletic cu'une. In te jch'uunjeletic cu'une ma stsalotic yu'un te lajele. 19Jo'on ya cac'bat syaveal ta sjamel soc smaquel ta banti ay ta ajwalinel te Dios te ay ta ch'ulchane. Te bila ya achuc li'to ta balumilale, jich chucul ya xc'ot ta ch'ulchan. Soc te bila ya achap ta balumilale, jich chapal ya xc'ot ta ch'ulchan —xi' te Jesuse. 20Soc la spas ta mandal te jnopojeletic yu'un te ma me mach'a ya yalbeyic jtuluc te ja' te Cristo te Jesuse. 21Ja' nix yorail a te Jesús caj xcholbey yaiyic te jnopojeletic yu'une te ya xbajt' ta Jerusalén, soc te tey ya xc'ax bayal swocol ta sc'abic te principaletique soc te jwolwanej-sacerdoteetique soc te jts'ibojometique. Soc la yal te bit'il ya x'ac'ot ta lajel, soc te ya yich' cha'cuxesel ta yoxebal c'aal. 22Jich te Pedroe la yic' bael ta q'uejel te Jesuse, soc la yalbey: —Cajwal, ma me jichuc ya sc'an te Diose. Ma me jichuc ya xc'ot ta pasel ta awenta —la yut. 23Te Jesús la sujt'es sba sc'opon te Pedroe: —¡Q'ueja aba ta jtojol, Satanás! Ja'at jcojch'inwanejat. Ma'yuc ta awo'tan te bila ya sc'an yo'tan te Diose. Ja' nax ay ta awo'tan te bila ya sc'an yo'tan te ants-winiquetique —la yut. 24La yalbey ts'iin te jnopojeletic yu'une: —Te mach'a ya sc'an yac' sba ta jnopojel cu'une, ac'a me sloq'ues sba ta yo'tan. Ac'a xcuch scruz. Ac'a st'unon. 25Melel te mach'a ya xc'uxtay sba soc te xcuxlejale, ya me xch'ay soc te xcuxlejale. Yan te mach'a ya yac' sba ta lajel soc xcuxlejal ta jwenta, ja' ya yich' xcuxlejal stuquel. 26¿Bila ya xloc' yu'un a te winic teme ya yu'unin spisil te balumilale teme ch'ayel ya xbajt' soc te xch'ulele? ¿Bila ya yac'bey ta sjelol te xch'ulel teme ch'aye? 27Melel te Nich'anile ya me xtal soc yutsilal te State soc te ch'ul abatetic yu'une. Ya xtal yac'bey stojol sc'ab juju-jtul chican bi yilel te yat'el spasoje. 28Jamal ya calbeyex, ay mach'atic li' ayic to te ma ba ya xlajique ja' to teme la yilic ya xtal ta ajwalinel te Nich'anile —xi' te Jesuse.


Copyright
Learn More

will be added

X\