San Mateo 15

1Ay fariseoetic soc jts'ibojometic te talic c'alal lum Jerusalén te jul sc'oponic te Jesuse. La sjojc'obeyic: 2—¿Bi yu'un te jnopojeletic awu'une te ya xc'axintaybeyic te costumbre yu'un te principaletique? ¿Bi yu'un ma ba ya spoc sc'abic neeluc te c'alal ya xwe'ique? —xiic. 3La yal te Jesuse: —¿Bi yu'un uuc te ja'exe, te ya ac'axintaybeyic smandal Dios a te costumbre awu'unique? 4Melel jich la yal te Diose: “Ich'aic ta muc' te ame'-atate”, te xie. Soc la yal xan: “Te mach'a ya sbolc'optay te state, o teme ja' te sme'e, ac'a lajuc”, te xie. 5Yan te ja'exe jich ya awalic: “Teme ay jtul winic te jich ya yalbey te sme'-state: ‘La cac'beyix smajt'anin Dios spisil te bila ay cu'une, jich ma xju' te ya jc'uxtayexe’, te ya yute, 6ma yejt'aluc ya xc'uxtayix te sme'-state”, te xaexe. Jich ta swenta te costumbre awu'unique ma'yuquix sc'oplal ya xc'ot ta ch'uunel awu'unic a te bila yaloj ta mandal te Diose. 7Cha'lam awo'tanic te ja'exe. Jich nix la yalbeyex ac'oplalic te namey q'uinal j'alwanej yu'un Dios te Isaiase: 8“Ja' in lum to sba nax sti'ic yich'ojonic ta muc', yan te yo'tanique q'uejel to ay stuquel. 9Tojol te ya xtal slajin sbaic ta jtojole, melel sc'op nax ants-winic te mandal ya yaq'uic ta nopele”, te xie —xi' te Jesuse. 10Te Jesús la yic' tel ta stojol te ants-winiquetique. Jich la yalbey yaiyic: —Aiya awaiyic stojol, soc ac'a c'otuc ta awo'tanic: 11Ma ja'uc amen sc'oplal ya xc'ot ta stojol Dios te winic yu'un te bila ya yotses ta yee. Ja' amen sc'oplal ya xc'ot ta stojol Dios yu'un te bila ya xloc' tel ta yee —xi' te Jesuse. 12Te jnopojeletic yu'un te Jesuse, noptsajic tel ta stojol. Jich la yalbeyic: —¿La bal awil te ilinic yu'un te fariseoetic te bila la awale? —xiic. 13La yal te Jesuse: —Spisil awal-ts'unubil teme ma ja'uc la sts'un te Jtat te ay ta ch'ulchane, ya me yich' bulel loq'uel. 14Ac'a yil sbaic jiche te melel ya stojtesic ta be ma'sitetic ta sc'opic, ja'uc me to, pajal ma'sit c'oemic soc. Jich yu'un teme ay jtul ma'sit ya stojtes ta beel te mach'a pajal ma'sit soque, xchebalic me ya xch'ayic ta xaab —xi' te Jesuse. 15La sjac' te Pedroe: —Cholbotic caiytic bit'il ay in seña-c'op to —xi'. 16La yal te Jesuse: —¿Yu'un bal ma to xc'ot ta awo'tanic uuc te ja'exe? 17¿Ma bal yacuc ana'ic stojol te bit'il ya xc'ot ta ach'ujt'ic spisil te bila ya x'och ta awe'ique? Patil ya xba ach'ayic jilel ta letrina. 18Yan te bila ya xloc' tel ta awe'ique, ta awo'tanic ya xjajch' tel stuquel. Ja' amen ac'oplal ya xc'oex ta stojol Dios yu'un. 19Melel ta yo'tanic ya xcaj snopic te ants-winiquetic te bila amen ta pasele: Ja' te milawe, soc te mulweje, soc yalel ta mulil, soc elec', soc le-c'op, soc toyba-c'op. 20Ta spisil in to, ja' amen sc'oplal ya xc'ot ta stojol Dios yu'un. Yan teme ma spoc sc'ab c'alal ya xwe', ma ja'uc amen sc'oplal ya xc'ot yu'un stuquel —xi' te Jesuse. 21Loc' bael tey a te Jesuse. Bajt' ta sq'uinal lum Tiro soc ta lum Sidón. 22Ay jtul cananea-ants nainem tey a. Tulan c'opoj ta yalel wocol: —Cajwal, sts'umbalat David, c'uxtayawon soc te cantsil-ale. Yu'un ay pucuj ta yo'tan. Bayal ay ta uts'inel yu'un —xi' ta aw. 23Ja'uc me to, te Jesús ma la sjac'bey te sc'ope. Jich te jnopojeletique la yalbeyic te Jesuse: —Wocoluc, ticuna bael, yu'un bayal yac ta yawtaybelotic ta jpatic —xiic. 24Te Jesús la yalbey te antse: —Ma ja'uc ticunbilon tel ta awenta. Ja' nax sticunejon Dios ta xc'uxtayel te israeletic te jich c'oemic bit'il chijetic te ch'ayemique —xi'. 25Ja'uc me to, te antse tal squejan sba ta stojol. Jich la yal: —Cajwal, coltayawon —xi'. 26Jesús la yalbey: —Ma lecuc teme ya jpojbeytic swaj te alnich'anetic te ya cac'beytic swe'ic te alal ts'i'etique —xi'. 27La yal te antse: —Jich nix a, Cajwal. Ja'uc me to, te alal ts'i'etique ya swe'ic te sts'ubil swaj ya xch'ay coel ta yanil smesa te yajwale —xi'. 28Te Jesús la yalbey: —Me'tic, bayal xch'uunjel awo'tan. Jich me ya xc'ot ta pasel te bila ya sc'an awo'tane —xi'. Jich col ta ora te yantsil-ale. 29Loc' bael tey a te Jesuse. Been bael ta ti'ti'mar yu'un Galilea, soc mo bael ta wits. Tey c'o snajc'an sba a. 30Talic ta stojol tsobol ants-winiquetic tey a. Yic'ojic tel coxoetic, soc ma'sitetic, soc uma'etic, soc te jc'ojc'ol-c'abetic, soc yantic jchameletic. Tal yac'beyic ta stojol te Jesuse. Spisilic la yich'ic coltayel yu'un. 31Jchajp nax q'uinal la yaiyic yu'un te ants-winiquetique, yu'un la yilic te yacalic ta c'op te uma'etique, soc lec ayic te mach'atic jc'ojc'ol-c'abetique, soc yacalic ta beel te coxoetique, soc jamenix sitic te ma'sitetique. Jich caj yalbeyic wocol Dios yu'un te israeletique. 32Te Jesús la yic' tel te jnopojeletic yu'une. Jich la yalbey yaiyic: —Ya jna'bey yo'bolil sbaic in ants-winiquetic to, yu'un yoxebalix c'aal te sjoinejonic li'to, soc ma'yuc te swe'elique. Ma jc'an ya jticun bael ta snaic te bit'il ma'yuquix te swe'elique, teme repente ya xcom q'uinal yaiyic ta be —xi' te Jesuse. 33La yalic te jnopojeletic yu'une: —¿Banti c'an jtabeytic swe'elic li'to ta bay jochol q'uinal te melel tsobol te ants-winiquetique? —xiic. 34Te Jesús la sjojc'obey: —¿Jay pejch' waj ay awu'unic? —xi'. La yalic: —Jucpejch', soc cha'oxcojt' ch'in chayetic —xiic. 35Te Jesús la yalbey mandal te ants-winiquetic te ya snajc'an sbaic ta lume. 36La stsac te jucpejch' waje soc te chayetique, soc la yalbey wocol Dios yu'un. La xet', soc la yac'bey te jnopojeletique. Ja'ic ba spucbeyic te ants-winiquetique. 37Jich we'ic ta spisilic ja' to chican noj te xch'ujt'ique. Patil la stsobic te sobraile. Noj juqueb moch yu'un. 38Te jich yipal te mach'atic we'ique chanmil (4,000) te winiquetique. Ma la yich' ajtayel te antsetic soc te alaletique. 39Te c'alal la sticunix bael a te ants-winiquetique, och ta barco te Jesuse. Bajt' ta bay q'uinal te Magdala sbiile.


Copyright
Learn More

will be added

X\