San Mateo 12

1Jich ora te c'ax bael Jesús ta yolilal ts'unbil trigoetic ta sc'aalelal cux-o'tan soc te jnopojeletic yu'une. Ayic ta wi'nal te jnopojeletique, jich caj xjixbeyic sbac' te trigoe, soc la xc'uxbeyic te sbaq'ue. 2Te fariseoetic la yilic te bila yacalic ta spasele, soc jich la yalbeyic te Jesuse: —Ilawil te jnopojeletic awu'une. Yacalic ta spasel te bila ma stac' ta pasel ta sc'aalelal cux-o'tan —xiic. 3La yal te Jesuse: —¿Ma bal awilojic ta Sjun Dios te bila la spas te David te c'alal ay ta wi'nal soc te sjo'taque? 4Te c'alal och ta sna Dios, la swe'ic te ch'ul waj te pachal ta stojol te Diose te ma xju' ya swe'ic soc te sjo'taque. Ja' nax ya xju' ya swe'ic stuquel te sacerdoteetique. 5Soc ja' nanix jich, ¿ma bal awilojic ta mandalile te bit'il ma xyich'ic lewa yu'un yat'el ta templo ta sc'aalelal cux-o'tan te sacerdoteetique, soc ma yu'unuc ya sta smul a? 6Ya calbeyex te li' ay to te mach'a cajal yu'un te temploe. 7Te ja'exe ma ba ana'ojbeyic swentail te bila ts'ibubil ta Sjun te Diose: “Ja' ya jc'an te ya awaiyic c'uxtaywaneje. Ma ja'uc ya jc'an te milbil majt'anile”, te xie. Te yu'unuc ana'ojbeyic swentaile, ma ba la alebeyic smul te mach'atic ma'yuc smulic te jichuque. 8Melel te Nich'anile, ja' ajwalil yu'un te sc'aalelal cux-o'tanile —xi' te Jesuse. 9Jich c'ax xan bael te Jesuse. C'ot ta sinagoga yu'unic. 10Ay jtul winic tey a te sicuben xchial te jch'ix sc'abe. La smaliy yilic te bila ya spas te Jesuse soc la sjojc'obeyic: —¿Ya bal stac' te ya yich' coltayel jchameletic ta sc'aalelal te cux-o'tane? —xiic. 11Jesús la yalbey: —¿Bi xaex yu'un? Teme ay ch'ay coel ta lomen-ch'en cojt'uc achij ta sc'aalelal cux-o'tane, ¿ma bal yacuc xba aloq'uesic? 12Te jtul winique c'ax jich ay sc'oplal stuquel te bit'il cojt' chije. Jich yu'un ya stac' ta pasel te bila lec ta sc'aalelal te cux-o'tane —xi' te Jesuse. 13Jich la yalbey te winique: —Toya jajch'el te ac'abe —la yut. Te c'alal la stoy jajch'el te sc'abe, jich lecub. Pajal lec c'ot soc te yan sc'abe. 14Jich te fariseoetique loq'uic bael. Ba snopic te bi ya yut ya smilic te Jesuse. 15C'alal la sna' stojol te Jesuse, loc' bael tey a. Tsobol ants-winiquetic la sts'aclinic bael. La scoltay spisil te jchameletique. 16Soc la yalbey mandal te ants-winiquetic te ma ba ya spucbeyic sc'oplale. 17Jich la yal swenta yu'un jich ya xc'ot ta pasel te bila la yalbey jilel sc'oplal ta namey te j'alwanej yu'un Dios te Isaías te jich la yale: 18“Li' ay to te cabat, te tsabil cu'une. C'ux ya caiy ta co'tan soc bin nax co'tan yu'un. Ya me cac'bey ta yo'tan te Espíritu cu'un. Jich me ya spuc ta alel ta stojol jyanlumetic te bila toj ta pasele. 19Ma x'utawan. Ma x'awun. Ma q'uejeluc to chican sc'op ta calleetic. 20Ma ba ya slajin sc'asel ta jyalel te jalal te c'asemixe; soc ma ba jc'axel ya stup'bey sc'aal te smechail c'ajc' te c'un nax yac' ta tilele. Ma xlaj yo'tan ta ora ja' to teme ya yaiy tsalaw ta stojil chajbanele. 21Spisil jyanlumetic ya me yac' smuc'ul yo'tanic ta stojol te abat cu'une”, xi' te Diose. 22Ay la yiq'uic tel ta stojol Jesús jtul winic uma' te ma'situben yu'un te pucuje. Te Jesús la scoltay. Jich c'opoj te winique, soc la yil q'uinal. 23Spisil te ants-winiquetic jchajp nax la yilic a. Jich la yalic: —¿Ma bal ja'uc te Sts'umbal David te maliybile? —xiic. 24Te c'alal la yaiyic stojol te fariseoetique, jich la yalic yu'un: —Ja' in winic to, ya sloq'ues pucujetic ta swenta Beelzebú ja' te mero ajwalil yu'un te pucujetique —xiic. 25Jesús la sna' stojol te bila la yaan yo'tanique. Jich caj yalbey yaiyic: —Te mach'atic jtul nax muc' ajwalil ay yu'unique, teme ya xat sbaique soc teme ya xjajch' scontroin sbaique, tey ya sjin sbaic ta spisilic a. Ja' nanix jich uuc te mach'atic jun nax lum ayique, o te mach'atic jun nax na ayique, teme ya xat sbaique ma ba ya xjalajic ta q'uinal yu'un. 26Ja' nanix jich, ¿ya bal xju' ya sloq'ues sba stuquel te Satanase? Te jichuc ya spase, ja' nax scontroinej sba abi. ¿Bit'il c'an jalajuc ta at'el te jichuque? 27Te ja'exe ya awalic te ja' ta swenta Beelzebú te ya jloq'ues pucujetique. Teme melel te bila ya awalique, ¿mach'a ta swenta te ya sloq'ues pucujetic te jnopojeletic awu'unique? Jich yu'un, ta swenta te jnopojeletic awu'unique, ja' me ya yich'beyex ac'opic stuquel. 28Ja'uc me to, te jo'one ya jloq'ues pucujetic ta swenta te Espíritu yu'un te Diose. Tey chicanix ta jamal te ayix ta ajwalinel ta awolilic te Diose. 29“Melel teme ay mach'a yo'tan ya yochintaybey sna te c'ajc'al winique, neel ya sc'an ya sc'ol ta chuquel. Patil ya xju' ya yelc'anbey te sbiluque. 30“Te mach'a ma sjoinone, ja' jcontro abi. Te mach'a ma ta jwentauc ya stsobawane, ja' jinwanej abi. 31“Jich yu'un ya calbeyex: Spisil mulil soc stoyba c'op te ants-winiquetique, ya spasbot perdón yu'un te Diose. Yan teme ya stoybac'optayic te Ch'ul Espiritue, ma xju' ya spasbot perdón yu'un stuquel. 32Teme ay mach'a ya scontroc'optay te Nich'anile, ya xju' ya spasbot perdón yu'un. Yan te mach'a ya scontroc'optay te Ch'ul Espiritue, ma xju' ya spasbot perdón yu'un stuquel te jayeb c'aal cuxul ta q'uinal ni ja'uc ta patilal bael ta sbajt'el q'uinal. 33“Teme lec te te'e, lec te sit ya yaq'ue. Yan teme amen te te'e, amen sit ya yac' stuquel. Melel te te'e ya jna'beytic sba ta swenta te site. 34Te ja'exe sts'umbalex jti'awal chanetic, ¿bit'il c'an lecuc te ac'opique?, melel amen te awo'tanique. Ta swenta ac'opic chican te bila nojel ta awo'tanique. 35Te mach'a lec yo'tane, lec ya xc'opoj, yu'un lec te bila nojel ta yo'tane. Yan te mach'a amen yo'tane, ma lecuc ya xc'opoj, yu'un nojel ta yo'tan te bila amene. 36Soc ya calbeyex awaiyic, spisil ta jp'al c'op te ma'yuc swentail ya yal loq'uel ta ye te ants-winiquetique, ya me x'ich'bot sc'opic yu'un Dios ta slajibal c'aal. 37Melel ta swenta ac'op te ya yac'at ta libre, soc ta swenta ac'op te ya yac'at ta castigo yu'une —xi' te Jesuse. 38Ay fariseoetic soc jts'ibojometic te la sc'oponic te Jesuse: —Maestro, ya jc'antic te yacuc awac'botic seña awu'el quiltic —xiic. 39La yal te Jesuse: —Ya nax sc'an seña yilic te mach'atic te amen yo'tanic soc te mach'atic ma junuc yo'tanic ta stojol te Diose, ja'uc me to, ma x'ac'bot yilic. Ja' seña ta stojolic te Jonás te namey q'uinal j'alwanej yu'un te Diose. 40Melel te Jonase ain ta xch'ujt' muc'ul ballena-chay oxeb c'aal soc oxeb ajc'ubal. Ja' nanix jich uuc te Nich'anile ya me x'ain ta muquenal oxeb c'aal soc oxeb ajc'ubal. 41“Te c'alal ya sta yorail ya x'ilbot yat'elic te jayeb ants-winiquetic cuxulic ta q'uinal ta ora to, tey me ayic uuc a te niniveetique. Ja' me ya yalbeyic ta jamal te smulique, melel te niniveetique la sujt'es yo'tanic yu'un smulic te c'alal la xchol sc'op Dios te Jonase. Yan ta ora to li' ay to te mach'a cajal yu'un te Jonase. 42Soc tey me ay uuc a te antsil muc' ajwalil te ay smaquen-q'uinal ta stojol sur. Ja' me ya yalbey smulic uuc te mach'atic cuxulic ta q'uinal ta ora to, melel c'ubul tal ta yaiybel stojol sp'ijil sc'op te Salomone. Yan ta ora to, li' ay to te mach'a cajal yu'un te Salomone. 43“C'alal ya xloc' ta yo'tan ants-winic te pucuje, ya xbeen ta taquin q'uinaletic yu'un ya sle te banti ya yich' lewae, ja'uc me to, ma sta. 44Jich ya xjajch' yal: “Ya me sujt'on bael ta jna te banti loq'uemon tele”, xi'. Te c'alal ya xc'ot tey a, jochol ya xc'o stabey yo'tan te ants-winique, jich bit'il na te ma'yuc yajwal te mesbil soc te chajbanbil ta leque. 45Jich ya xba yic' tel juqueb pucujetic te c'ax jich yixtaelic te bit'il ay stuquele. Spisilic ya x'och snainbey yo'tan te ants-winique. C'ax to xan jich ya xbolob a te bit'il ay ta neelale. Jich me ya xc'otic te mach'a cuxulic ta q'uinal ta ora to te ma lecuc yo'tanique —xi' te Jesuse. 46Te Jesús yac to ta c'op ta stojol a te ants-winiquetique, tal te sme'e soc te yijts'inabe. Teq'uelic julel ta amac', ya sc'an sc'oponic te Jesuse. [ 47Ay mach'a la yalbey yaiy te Jesuse: —Te ame'e soc te awijts'inabe teq'uelic ta amac'. Ya sc'an sc'oponat —xi'.] 48Te Jesuse la yalbey yaiy: —¿Mach'a a te jme'e soc te quijts'inab ya awale? —xi'. 49La stoy bael sc'ab ta stojol te jnopojeletic yu'une, soc jich la yal: —Ja' in to ja' jme' soc ja' quijts'inab c'oem ta spisilic. 50Melel mach'auc a te ya spasbey sc'anjel yo'tan te Jtat te ay ta ch'ulchane, ja' quijts'inab soc ja' jme' c'oem —xi' te Jesuse.


Copyright
Learn More

will be added

X\