San Mateo 11

1Te c'alal laj yo'tan Jesús ta spasel ta mandal te lajchaytul jnopojeletique, loc' bael tey a. Ba yaiy p'ijubteswanej soc ba yal sc'op Dios ta bay te lumlumtic yu'unique. 2Te bit'il ayix ta chucjibal te Juane, la yaiy stojol te bila yac ta spasel te Cristoe. Jich la sticun bael cheb jnopojeletic yu'un. 3Jich c'o sjojc'oyic ta stojol: —¿Ja'at bal Cristoat te albil sc'oplal ya xtale? ¿O ay to bal yan te ya jmaliytic xane? —xiic. 4La yal te Jesuse: —Baanic, albeya te Juan te bila la awilique soc te bila la awaiyic stojole. 5Cholbeya yaiy te yac ta jamel sit te ma'sitetique, soc te yacalic ta lecubel te coxoetique, soc yacalic ta lecubel sbaq'uetal te jc'a'el-chameletique, soc yacalic ta jamel xchiquin te jcojq'uetique, soc yacalic ta cha'cuxel te animaetique, soc yaquix ta cholel ta stojol me'baetic te lec yach'il c'ope. 6Bin nax me yutsil te mach'a ma xchebaj yo'tan cu'un —la yut bael te Jesuse. 7Te c'alal sujt'ic bael te jnopojeletique, te Jesús caj yalbey yaiyic te mach'atic stsoboj sbaic te bit'il ay sc'oplal te Juane. Jich la yal: —¿Bila xc'otuc awilic ta bay jochol taquin q'uinal? ¿Ja' bal ba awilic jalal te yac ta tijulayel yu'un te iq'ue? 8Teme ma ja'uque, ¿bila xc'otuc awilic? ¿O ja' xc'otuc awilic jtul winic te jelawen yutsilal te sc'u'-spac' slapoje? Ya calbeyex, te mach'a jelawen yutsil sc'u'-spac' ya slape, ay ta sna muc' ajwalil stuquel. 9¿Biluc xc'otuc awilic jiche? “Ja' xc'o quiltic jtul j'alwanej yu'un Dios”, ¿xaex bal? Melel nix a. Soc ya calbeyex te c'ax jich ay yat'el te bit'il j'alwanej yu'un te Diose. 10Yu'un ja' nix te mach'a jich ts'ibubil jilel sc'oplal ta Sjun te Diose: “Ya me jneeltes bael ta atojol jtul j'alwanej cu'un, swenta yu'un ya xchajbanbat abe”, te xie. 11“Jamal ya calbeyex, ma'yuc jtuluc chicnajem ta yolil te ants-winiquetic te pajal yat'el soc te Juan J'ac'-ich'ja'e. Ja'uc me to, te mach'a peq'uel yac'oj sba ta yajwalinel te Dios te ay ta ch'ulchane, ja' me cajal xc'ot yu'un te Juane. 12“Te c'alal tal te Juan J'ac'-ich'ja'e ja' to ta ora to, jajch' ta controinel yu'un te bit'il ay ta ajwalinel te Dios te ay ta ch'ulchane. In te mach'atic yich'oj sbaic ta muc' soc te yipique, yo'tanuc ya yu'uninic. 13Spisil te j'alwanejetic yu'un te Diose soc te mandalile, la yalic te bit'il ay ta ajwalinel te Dios te ay ta ch'ulchane, ja' to c'alal tal te Juane. 14Soc te yacuc xc'ot ta awo'tanic te ja'exe, te Elías te jtul j'alwanej yu'un Dios te maliybil ya xtale, ja'ix te Juane. 15Te mach'a ay xchiquine, ac'a me yaiy stojol ta lec. 16“Te ants-winiquetic te cuxulic ta q'uinal ta ora to, ja' pajalic soc te alaletic te ya snajc'an sbaic ta tajimal ta yolil ch'iwich. Jich ya yawtayic te sjo'taque: 17“La coq'uesin camaytic, ma ba ajc'otajex yu'un. La jc'ajintaytic mel-o'tan c'ayoj, ma ba oq'uex yu'un”, te xiique. 18Melel te c'alal tal te Juane ma ba we'-uch'aj ta lec. “Ay pucuj ta yo'tan”, xaex yu'un. 19Patil tal te Nich'anile te ya xwe'-x'uch'aj ta leque. Jich ya awalic te toyol ya xwe'-x'uch'aje soc te ya sjoin jmulawiletic soc te jc'an-patanetique. Ja'uc me to, te sp'ijil yo'tan te Diose, ja' me ya xchicnaj ta swenta te bila ya yac' c'otuc ta pasele —xi' te Jesuse. 20Te Jesús, tulan la yut te lumetic te banti bayal spasoj jchajp at'eliletic te ma la sujt'es yo'tanic ta stojol Dios. Jich la yal: 21—¡Lum Corazín, ya me awil awocolic! ¡Lum Betsaida, ya me awil awocolic uuc! Melel te teyuc la yich' pasel jchajp at'eliletic ta bay lum Tiro soc ta lum Sidón jich bit'il te la yich'ix pasel ta atojolique, ora la slapic ch'ixal pac', soc la snajc'an sbaic ta stanul c'ajc' ta sujt'esel yo'tanic te jichuque. 22Ya calbeyex te bayal me castigo ya awich'ic ja'ex lum Corazín soc lum Betsaida te c'alal Dios ya yilbeyex awat'elique. Yan te lum Tiro soc te lum Sidón ma sta jich castigo ya yich' stuquelic. 23Jichat uuc lum Capernaúm te atoyoj abaic c'alal ta ch'ulchan, ja'uc me to, c'alal ta infierno ya xch'ojotat coel. Melel te jichuc la yich' pasel jchajp at'eliletic ta banti lum Sodoma jich bit'il te la yich' pasel ta awolilique, chican to ta q'uinal ta ora to te jichuque. 24Ya calbeyex te bayal me castigo ya awich' lum Capernaúm te c'alal Dios ya yilbeyex awat'elique. Yan te lum Sodoma ma sta jich castigo ya yich' stuquel —xi' te Jesuse. 25Ja' nix ta yorail a te jich la yal te Jesuse: —Jtat, te ajwalilat yu'un te ch'ulchane, te balumilale, jelawen yutsil awo'tan te ja' la awac'bey sna'ic stojol spisil in to te mach'atic alaletic c'oeme, ma ja'uc la awac'bey sna'ic stojol te mach'atic ay sp'ijilique soc te ya sna'ic q'uinal ta leque. 26Jich, Jtat, te melel jich la sc'an awo'tan atuquel —xi'. 27Soc la yal xan: —Te Jtate yac'ojbon ta jc'ab spisil te bitic aye. Ma'yuc mach'a ya sna'bey sba te Nich'anile; ja' nax ya sna'bey sba te Tatile. Soc ma'yuc mach'a ya sna'bey sba te Tatile; ja' nax stuquel te Nich'anile, soc uuc te mach'a jayeb ya yac'bey sna'bey sbae. 28La'ic me ta jtojol ta apisilic ja'ex te lubenex yu'un te tulan at'ele soc te ijc'atsile. Jo'on ya cac'beyex acux awo'tanic. 29Ich'bonic te yugo-te' cu'une. Nopbonic co'tan te melel manso co'tan soc peq'uel cac'oj jba. Jich me ya yich' lewa te awo'tanique. 30Melel te yugo-te' cu'une, ma'yuc swocolil ta cuchel stuquel. Soc ma ba al ta cuchel te ijc'atsil cu'une —xi' te Jesuse.


Copyright
Learn More

will be added

X\