San Mateo 10

1Jich te Jesús la yic' tel te lajchaytul jnopojeletic yu'une. La yac'bey yich' yat'elic ta sloq'uesel pucujetic soc ta slamantesel spisil biluc nax chameliluc soc te bila ay xc'uxule. 2Te sbiilic te lajchaytul jpuc-c'opetique jich ay: Te mach'a sbabiale, ja' te Simón te Pedro yan sbiile, soc te yijts'ine te Andrés sbiile, soc Jacobo soc te yijts'ine te Juan sbiile te snich'nab te Zebedeoe, 3soc Felipe, Bartolomé, Tomás, Mateo te jc'an-patane, soc Jacobo te snich'an Alfeoe, soc Lebeo te Tadeo yan sbiile, 4soc te Simón te cananistae, soc te Judas Iscariote te la yac' ta c'abal ta patil te Jesuse. 5Te Jesús la sticun bael te lajchaytulique, soc la spas bael ta mandal: —Ma me xbaex ta banti ainemic te jyanlumetique, soc ma me x'ochex ta banti lumlumtic yu'un te samariaetique. 6Tey me ya xbaex ta bay te israeletique, melel jich c'oemic te bit'il chijetic te ch'ayemique. 7Jich me xawalic ta xcholel: “Nopol ya xjajch'ix ta ajwalinel te Dios te ay ta ch'ulchane”, xaex me. 8Soc ya me alamantesic jchameletic, soc jc'a'el-chameletic, soc ya me acuxesic animaetic, soc ya me aloq'uesic pucujetic. Ta majt'anil la cac'beyex; ac'aic ta majt'anil uuc. 9“Ma me x'awich' bael ataq'uinic: ni oro, ni plata, ni cobre ta xchujq'uil ach'ujt'ic. 10Soc ma me x'awich'ic bael abolsaic, ni ajel-c'u'ic, ni ajel-xanabic, ni anabate'ic. Melel te mach'atic ya x'at'ejique, tey me ya sta swe'elic a. 11“Teme ya xc'oex ta bay muc'ul lum o ta ch'in lum, leaic tey a te mach'a lec sc'oplal. Ainanic ta sna ja' to teme ya awijq'uitayic jilel te lume. 12Teme ochex ta snae, patbeya me yo'tan te yajwal nae. 13Teme lec yo'tanic te yajwal nae, lamal q'uinal ya yaiyic ya xc'ot. Yan teme ma lecuc yo'tanique, ja' ya me sujt' ta awentaic te lamal q'uinale. 14Teme ay mach'a ma la sc'an yiq'uex ta snae, soc teme ma la sc'an yaiybeyex stojol ac'opique, loc'anic tel ta sna, o ja' te lume. Tijt'ana jilel te stanul awacanique. 15Jamal ya calbeyex, ya me sta yorail yu'un Dios te ya yilbey te yat'elique. C'ax jich castigo ya x'ac'bot yich' stuquelic a te bit'il castigo la yich' te lum Sodoma soc te lum Gomorrae., 16“Jich yu'un ya me jticunex jich bit'il chijetic ta yolil te jti'awal ja'mal ts'i'etique. Ich'a me ap'ijilic jich bit'il te chane, ja'uc me to, manso me xawac' abaic jichuc paloma. 17Tsajtaya me abaic ta stojol te ants-winiquetique, melel ya me yaq'uex ta sc'ab te muc'ul tsobleje, soc ya me yac'beyex castigo ta sinagogaetic, 18soc ya me yiq'uex bael ta stojol ajwaliletic soc ta stojol muc' ajwaliletic ta jo'on jwenta. Jich me ya awalic testigo-c'op ta stojolic soc ta stojol te jyanlumetique. 19Ja'uc me to, te c'alal ya x'ac'otex ta c'abale, ma me xjajch' amel awo'tanic yu'un te bit'il ya sc'an ya xc'opojexe soc te bila ya xc'o awalique. Melel te bi ora ya xc'opojexe, Dios me ya yac'beyex awalic te bila ya sc'an te ya awalique. 20Melel ma ja'uc ya xc'opojex te ja'exe, ja' ya xc'opoj ta awo'tanic te Espíritu yu'un te Jtatique. 21“Ay me yermano sbaic te ya yac' sbaic ta milele. Soc ay me tatil te ya yac' ta milel te yal-snich'ane. Soc ay me alnich'anetic ya xjajch' scontroinic te sme'-statique, soc ya me yaq'uic ta milel. 22Ya me awich'ic p'ajel ta apisilic ta swenta jbiil. Te mach'a ya xcujch' yu'un c'alal ta slajibale, ja' me ya xcol stuquel. 23Te c'alal ya snutsex in lum to, ananic bael ta yan lum. Jamal ya calbeyex, ma to xnup' ta ilel awu'unic spisil a te lumetic yu'un israeletic te c'alal ya xtal te Nich'anile. 24“Ni jtuluc jnopojel te cajal ay yu'un te yajmaestroe, soc ma'yuc jtuluc abat te cajal ay yu'un te yajwale. 25Jich te jnopojele tic'uc me ya yaiy a teme pajal ya xc'ot soc te yajmaestroe. Soc jich uuc te mach'a ay ta abate, tic'uc me ya yaiy a teme pajal ya xc'ot soc te yajwale. Teme Beelzebú xi' sc'oplal te jwolwanej yu'un te jwol nae, ¿ja'uc to bal a te mach'atic ay yu'un ta snae? 26“Jich yu'un ma me x'axi'ic te j'uts'inwanejetique, melel ma'yuc bila nac'al te ma xyich' chicnantesele, soc ma'yuc bila muquen te ma x'ac'ot ta na'el stojole. 27Te bila la calbeyex awaiyic ta ijc' q'uinale, ja' me ya awalic ta saquil q'uinal; soc te bila la awaiyic stojol ta achiquinique, ja' me ya acholic ta jamal ta aw ta sba te nae. 28Ma me x'axi'ic te mach'atic ya smilbeyex abaq'uetalique, ja'uc me to, ma xju' yu'un ya smilbeyex stuquel te ach'ulelique. Ja' me x'axi'ic te Mach'a ya xju' yu'un ya yaq'uex ta lajel soc abaq'uetalic soc ach'ulelic ta bay infierno. 29“¿Ma bal jsejpuc ch'in taq'uin stojol ta chonel ta ch'iwich te cha'cojt' ch'in mutetique? Ja'uc me to, ma xju' ya xlaj cojt'uc teme ma sc'an yo'tan te Jtatique. 30Soc te stsotsil ajolique spisil ajtaybil ta juju-jlijc'. 31Jich yu'un ma me xiwex. C'ax jich ay ac'oplalic ta yo'tan a te bit'il ay sc'oplal bayal ta cojt' te ch'in ja'mal mutetique. 32“Spisil mach'a jamal ya yal ta stojol ants-winiquetic te bit'il xch'uunejone, jo'on uuc jamal me ya cal ta stojol te Jtat te ay ta ch'ulchane. 33Yan te mach'a ya smucon ta yo'tan ta stojol te ants-winiquetique, jich nix te jo'one ya jmuc ta co'tan ta stojol te Jtat te ay ta ch'ulchane. 34“Ma me xacuyic te tal cac' lamajuc q'uinal ta balumilal. Tal cac'bey scontroin sbaic. 35Te winique tal cac' scontroin te state. Te antse tal cac' scontroin te sme'e. Te alibale ya scontroin te yalib-me'ele. 36Yu'un ja' yajcontro ya xc'ot te mach'atic ay yu'un ta snae. 37“Ja' te mach'a c'ax jich c'ux ya yaiy ta yo'tan sme'-stat te bit'il c'ux ya yaiyone, ma snujp'in te ja' cu'un ya xc'ote. Soc te mach'a ja' c'ax c'ux ya yaiy ta yo'tan yal-snich'an te bit'il c'ux ya yaiyone, ma snujp'in te ja' cu'un ya xc'ote. 38Soc te mach'a ma sc'an ya xcuch scruz te ya st'unone, ma snujp'in te ja' cu'un ya xc'ote. 39Te mach'a c'ux nax ya yaiy sba soc te xcuxlejale, ya me xch'ay soc te xcuxlejale. Yan te mach'a ma xc'uxtay sba soc xcuxlejal ta jo'on jwenta, ja' me ya xcuxin stuquel. 40“Te mach'a ya yiq'uex ta snae, jo'on la yic'onix ta sna uuc, soc te mach'a ya yic'on ta snae, ja' la yiq'uix ta sna uuc te Mach'a sticunejon tele. 41Te mach'a ya yic' ta sna jtul j'alwanej scaj te ticunbil yu'un te Diose, pajal me ya yich' smajt'an soc te j'alwaneje. Soc te mach'a ya yic' ta sna te mach'a toj yo'tane, pajal me ya yich' smajt'an soc te mach'a toj yo'tane. 42Soc te mach'a ya yac'bey yuch' junuc tasa siquil ja' te mach'atic peq'uel sc'oplalic ta scaj te jnopojel cu'une, jamal ya calbeyex, ma xch'ay te smajt'an ya yich'e —xi' te Jesuse.


Copyright
Learn More

will be added

X\