San Mateo 1

1Ja' in to, ja' lista yu'un te antiguo me'il-tatiletic yu'un te Jesucristoe te sts'umbal David te ja' sts'umbal Abrahame. 2Abraham, Isaac, Jacob, Judá soc te yermanotaque, 3Judá te stat Fares soc Zara. Ja' sme'ic te Tamare. Fares, Esrom, 4Aram, Aminadab, Naasón, 5Salmón te stat Booz. Ja' sme' te Rahabe. Booz te stat Obed. Ja' sme' te Rute. Obed, 6Isaí te stat muc' ajwalil David. Te muc' ajwalil Davide stat Salomón. Ja' sme' te yinam Urías ta neelal toe. 7Salomón, Roboam, Abías, 8Asa, Josafat, Joram, 9Uzías, Jotam, Acaz, 10Ezequías, Manesés, Amón, Josías. 11Te Josiase stat Jeconías soc te yermanotaque. Ja' yorail te chucul ic'otic bael ta Babilonia te israeletique. 12Ta patil te c'alal ayix ta Babilonia te Jeconiase tal Salatiel, 13Zorobabel, Abiud, Eliaquim, 14Azor, Sadoc, Aquim, 15Eliud, Eleazar, Matán, 16Jacob, José te smamlal te Mariae te sme' Jesús te Cristo sbiile. 17Jich yu'un teme ya jcajtaytic coel tel te jaycum te antiguo me'il-tatiletic yiloj sba soc Abraham te Davide, ay chanlajuncum. Soc ay chanlajuncum yiloj sba soc David te bi ora chucul ic'otic bael ta Babilonia te israeletique. Soc ja' nanix jich ay chanlajuncum xan ja' to c'alal ayin te Cristoe. 18Te bit'il ayin te Jesucristoe, jich ay: Te sme'e, ja' te Mariae, chapalix te ya xnujbin soc te Joseje. Ja'uc me to, ma to bay yic'oj sbaic a, chicanix te yic'ojix alal ta swenta te Ch'ul Espiritue. 19Te Joseje, ja' te smamlale, te bit'il toj ta winiquile, jich ma la sc'an te ya sboltesbey sc'oplal te Mariae. La snop te muquen c'an yijq'uitay jilele. 20Te c'alal jich snopojix a te jich c'an spase, ta swaich chicnaj la yil jtul ch'ul abat yu'un te Cajwaltique. Jich albot yu'un: —José, te sts'umbalat Davide, ma x'axi' te ya awic' awinamin te Mariae, melel te bit'il ay yale, ja' ta swenta te Ch'ul Espiritue. 21Ya me x'ayin squerem-al. Jesús sbiil ya xc'ot awu'un te yale. Jich ay te sbiile, yu'un ya me scoltay ta lajel yu'un smulic te lum yu'une —xi' te ch'ul abate. 22Spisil in to c'ot ta pasel swenta yu'un jich me ya xc'ot te bila yaloj te Cajwaltic ta swenta te j'alwanej yu'une: 23“Ay me jtul tec'tojom ach'ix te ya yic' alale. Ya x'ayin squerem-al, Emanuel ya xc'ot te sbiile”, te xie. Te bit'il Emanuel xi' te sbiile, “Sjoinejotic te Diose”, xi' c'oem. 24C'alal wijc' sit te Joseje, jich la spas te bila mandal albot yu'un te ch'ul abate. La yic' yinamin te Mariae, 25ja'uc me to, ma la sc'opon sba soc, ja' to c'alal ayin te sba yale. Jesús sbiil c'ot yu'un te yale.


Copyright
Learn More

will be added

X\