San Marcos 6

1Loc' bael tey a te Jesuse. Bajt' ta slumal. La sjoin bael te jnopojeletic yu'une. 2C'alal la sta sc'aalelal cux-o'tan, jajch' ta p'ijubteswanej ta bay te sinagogae. Bayal te mach'atic la yaiybeyic stojol te sc'ope. Bayal ayan yo'tanic yu'un, jich la yalic: —¿Banti la snop tel spisil in to te winique? ¿Banti la sta te sp'ijil te ac'bile? ¿Banti la sta te yu'el ta spasel te jchajp at'eliletique? 3¿Ma bal ja'uc te jcarpintero te yal te Mariae? Soc ja' yijts'inab te Jacobo, te Joseje te Judase soc te Simone. Soc ja' sjoy ta alatayel uuc te antsetic te ayic ta coliltique —xiic. Jich bolob yo'tanic ta stojol. 4Ja'uc me to, te Jesús jich la yal: —Ta bayuc ya x'ich'ot ta muc' te jtul j'alwaneje; ja' nax ma x'ich'ot ta muc' yu'un te slumale soc te spat-xujq'ue soc te mach'atic ayic ta snae —xi'. 5Jich ma la spas jchajp at'eliletic tey a. Cha'oxtul nax chameletic la scajanbey sc'ab ta sjolic te la scoltaye. 6Te Jesús bayal ayan yo'tan yu'un te bit'il ma la xch'uunique. Soc la yocliy bael te ch'in lumetic te nopol ayique, soc la yaiy p'ijubteswanej tey a. 7La yic' tel te lajchaytul jpuc-c'opetic yu'une. Che'cheb la sticun bael, soc la yac'bey bael tulan yat'el ta sloq'uesel te pucuje. 8La spas ta mandal te ma'yuc bi ya yich'ic bael xujt'uc ta swenta sbeibic. Ja' nax me ac'a yich'ic bael te snabate'ique. Ma me xyich'ic bael xchojaq'uic, ni swajic, ni staq'uinic ta xchujq'uilic. 9Ac'a me slapic bael te xanabique. Ma me xyich'ic bael sjel-c'u'ic. 10Soc la yalbey yaiyic: —Ta banti ya x'ochex ta nae, ainanic tey a ja' to teme ya awijq'uitayic jilel te lume. 11Teme ay lum te ma sc'an yiq'uexe, soc teme ma sc'an yaiyic stojole, loc'anic bael tey a. Tijt'ana jilel te stanul awacanique. Ja' me seña ya yilic te ma ja'uc ta awentaic te ma la xch'uunique, —xi' te Jesuse. 12Jich bajt'ic ta xcholel ta stojol te ants-winiquetic, swenta yu'un ya sujt'es yo'tanic ta stojol Dios. 13Soc la sloq'uesic tsobol pucujetic soc la yac'beyic aceite ta sjolic tsobol jchameletic, jich colic ta chamel. 14Te ajwalil Herodes la yaiy stojol spisil te bila yac ta spasel te Jesuse, yu'un pujq'uem sc'oplal ta spamal te q'uinale. Te Herodese jich la yal yu'un: —Ja' niwan te Juan J'ac'-ich'ja'e. Cha'cuxemix tel ta bay te animaetique. Ja' swentail te ayix yu'el ta spasel spisil in to —xi'. 15Ay yantic la yalic: —Ja' niwan te j'alwanej Eliase —xiic. Soc yantic la yalic: —Ja' niwan j'alwanej yu'un Dios te pajal soc te namey q'uinal j'alwanejetique —xiic. 16Te Herodes la yaiy stojol te jich la yalique. Jich la yal yu'un: —Ja' me te Juan te la jticunbey yajwal ta c'oquel te sjole. Cha'cuxemix tel ta bay te animaetique —xi'. 17Melel te Herodese la sticun ta tsaquel ta neelal to te Juane, te la yac' ta chuquel ta cadena ta bay chucjibal. Jich la spas ta scaj te Herodiase te yinam yijts'ine te Felipe sbiile. Melel te ajwalil Herodese, ja' yic'oj yinamin te yinam yijts'ine. 18Jich yu'un te Juane la yalbey te Herodese: —Ma lecuc te awic'oj awinamin te yinam awijts'ine —la yut. 19Jich te Herodiase ilin yo'tan yu'un. Yo'tan c'an smil ta ora te Juane, ja'uc me to, ma ju' yu'un. 20Ja'uc me to, te Herodese la xi' te Juane, yu'un sna'oj stojol te toj ta winiquile soc te ma'yuc mulil ta yo'tane. Jich yu'un la yac' ta canantayel ta lec swenta yu'un ma xtaot ta milel. Te ajwalile bayal bila ma c'ot ta yo'tan te bila albot yu'un te Juane, ja'uc me to, la smulan te la yaiy stojole. 21La sta yorail te c'ot ta pasel te bila snopoj ta yo'tan te Herodías c'alal la spas q'uin te ajwalil Herodes te bit'il loc' ja'wil ya'wilale. Te ajwalile la stsob ta we'el-uch'ajel spisil te sjo'tac ta ajwalile, soc te coroneletique soc spisilic te mach'atic ich'bilic ta muc' ta bay sq'uinal Galilea. 22Te yantsil-al te Herodiase, och ta ajc'ot tey a ta bay yacalic ta we'el-uch'ajel. Te Herodes soc te mach'atic yac ta we'el soque la smulanic te bit'il ajc'otaj te ach'ixe. Te Herodese jich la yalbey te ach'ixe: —C'anbon te bila ya sc'an awo'tane. Ya cac'bat —xi'. 23Soc la yal ta jamal: —Chican te bila ya ac'anbone ya cac'bat, manchuc teme ja' ya ac'anbon oliluc te jmaquen-q'uinale —xi' te Herodese. 24Loc' bael te ach'ixe. Ba yalbey te sme'e: —¿Bila ya jc'anbey? —xi'. Te sme'e jich la yal: —Ja' x'ac'anbey sjol te Juan J'ac'-ich'ja'e —la yut. 25Te ach'ixe och bael ta ora tey a ta bay nacal te muc' ajwalile. Jich la yalbey: —Ya jc'an te ja' ya awac'bon ta plato ta ora sjol te Juan J'ac'-ich'ja'e —la yut. 26Te muc' ajwalile, bayal la smel yo'tan yu'un, ja'uc me to, scaj te la yal ta jamal ta stojol te mach'atic yic'oj ta we'ele, jich ma ju' yu'un te la smac ta c'ope. 27Jich yu'un te muc' ajwalile ora la sticun bael jtul soldado. La yalbey mandal te ya yich'bey tel sjol te Juane. 28Te soldado bajt' ta bay chucjibal. La sc'ocbey loq'uel sjol te Juane. La spajch'anbey tel ta plato. La yac'bey ta sc'ab te ach'ixe. In te ach'ixe ba yac'bey ta sc'ab te sme'e. 29Te c'alal la yaiyic stojol te jnopojeletic yu'un te Juane, tal yich'beyic bael te sbaq'uetale. Ba smucbeyic jilel. 30Patil te jpuc-c'opetique la stsob sbaic soc te Jesuse. Caj xcholic spisil te bila la spasique soc te bila la yaq'uic ta nopele. 31La yal te Jesuse: —La'ic te ja'exe, ya xba jcux co'tantic jtebuc ta bay jochol te q'uinale —xi'. Yu'un xloc' x'och nax ta stojol te ants-winiquetique. Ma spas ya xwe'iquix yu'un. 32Jich yu'un te Jesús soc te jpuc-c'opetic yu'une stuquel bajt'ic ta barco. Tey c'otic a ta bay jochol te q'uinale. 33Ja'uc me to, tsobol mach'atic la yilic te bajt'ic soc te Jesuse. Jich bajt'ic ta animal ta lumq'uinal. Bayuc nax loq'uic tel ta spisil lumetic. Ja' neel c'otic stuquelic tey a. 34C'alal loc' ta barco te Jesuse, la yil te ayix tsobol ta jtul tey a. La sna'bey yo'bolil sbaic, yu'un jich c'oemic la yil te bit'il chijetic te ma'yuc jcanantaywanej yu'unique. Jich jajch' sp'ijubtes. Bayal bila la yac'bey snopic. 35Te c'alal malix a te c'aale, tal ta stojol te jnopojeletic yu'une. Jich la yalic: —Malix te c'aale. Ma'yuc mach'a ay sna li'to. 36Ticunaix bael te ants-winiquetique, swenta yu'un ya xba sman swe'elic ta nanatic soc ta ch'in lumlumtic te nopol ayique, yu'un ma'yuc swe'el yich'ojic tel —xiic. 37La yal te Jesuse: —Ac'beya swe'elic te ja'exe —xi'. La yalic: —¿Bay xba jtatic lajunwinic (200) denario-taq'uin te ya jmantic waj smac'lin sbaic a? —xiic. 38La yal te Jesuse: —¿Jaypejch' waj awich'ojic? Ba ilawilic —xi'. Te c'alal la yilique, jich tal yalbeyic: —Ay jo'pejch' waj soc cha'cojt' chay —xiic. 39Jich te Jesús la spas ta mandal te ants-winiquetique te ac'a snajc'an sbaic ta tsojboltsojp ta bay te yax aquiltique. 40Jich jo'jo'winic (100) la snajc'an sbaic soc ay yantic te la snajc'an sbaic lajlajuneb yoxwinic (50). 41Te Jesús la stsac te jo'pejch' waj soc te cha'cojt' chaye. La stoy moel sit ta ch'ulchan. La yalbey wocol Dios yu'un, soc la xet' te waje. La yac'bey ta sc'ab te jnopojeletique te ya xba spucbeyic te ants-winiquetique, soc la yac' ta puquel uuc te cha'cojt' chaye. 42Spisilic we'ic ja' to chican noj te xch'ujt'ique. 43Patil la stsobic te sobrail waje soc uuc te chaye. Noj lajchayeb moch. 44Ay jo'mil (5,000) ta jtul winiquetic te la swe'ic te waje. 45Laj nax yo'tanic a te la sticun ochel ta barco te jnopojeletic yu'un te Jesuse, yu'un jich me ya xneelajic c'axel yu'un ta bay lum Betsaida. Te Jesús jil to ta sc'oponel te ants-winiquetique. 46Te c'alal lajix yo'tan ta sc'oponel jilele, stuquel mo bael ta wits ta sc'oponel Dios te Jesuse. 47C'alal och te ajc'ubale, olil mar ayix bael a te barcoe. Yan te Jesuse, ay to ta lumq'uinal stuquel. 48La yil te ay swocolic ta stijel bael te barcoe, yu'un tulan yac ta tenel sujt'el yu'un te iq'ue. Te c'alal nopol sacubix tel a te q'uinale, te Jesús noptsaj bael tey a te bay ayique. Yac ta beel ta ba mar. Toj nax c'an c'axuc bael yilel. 49Te jnopojeletique la yilic te yac ta beel ta ba mar. Jich la scuyic ta ch'ulelal, soc awunic yu'un. 50Spisilic la yilic. Bayal xiwic yu'un. Te Jesús la sc'opon ta ora: —Ac'a stulanil awo'tanic. Jo'on ya awil. Ma me xiwex —la yut. 51Mo bael sjoinic ta barco. Lamaj ta ora te iq'ue. Mero jchajp nax q'uinal la yaiyic yu'un. 52Yu'un ma ba c'oem ta yo'tanic te bit'il ay sc'oplal te waj la yesmantes te Jesuse, melel tulan te yo'tanique. 53Te c'alal c'axiquix bael ta mar a, c'otic ta loq'uel ta bay q'uinal te Genesaret sbiile. Tey la xchuquic jilel a te barco ta bay sti'il te mare. 54Loq'uic nax ta barco a te na'bot sba Jesús ta ora yu'un te ants-winiquetique. 55Ora ba spuquic ta bayuc ta spamal te q'uinale. Jich la sq'uechic tel ta cajcante' te jchameletique. Yu'un la yaiyic stojol ta bay c'oem te Jesuse, tey la yiq'uic bael a te jchameletique. 56Spisil ch'in lumetic soc ta muc'ul lumetic soc ta c'alc'altic, chican banti och bael te Jesuse, tey la sloq'uesic ta bay calleetic te jchameletique. La yalbeyic wocol te Jesús te yacuc spicbeyic sti'il te sc'u'e. Te jayeb mach'atic la spicbeyic te sc'u'e, colic ta chamel ta spisilic a.


Copyright
Learn More

will be added

X\