San Marcos 4

1Ta yan buelta jajch' ta p'ijubteswanej Jesús ta bay ti'mar. La stsob sbaic tel ta stojol bayal ants-winiquetic. Jich och snajc'an sba ta barco te ay ta ti'mare. Spisil te ants-winiquetic, teq'uelic ta bay sti'il te mare. 2Ay bayal bila la yac'bey snopic ta swenta seña-c'op. Jich la yal ta p'ijubteswanej: 3—Aiya me awaiyic stojol in to, ay jtul j'awal te loc' ta swajel te yawale. 4C'alal yac ta swajel a te yawale, ay tujq'uej jilel ta be. Tal te ja'mal mutetique. La sbiq'uic te awalile. 5Soc ay c'ot ta ba tontiquil te ma'yuc lec te slumile. Ch'ij tel ta ora scaj te ma pimuc te slumile. 6Te c'alal q'uejp te q'uinale taquej yu'un, scaj te ma ba c'uben te yisime. 7Soc ay c'ot ta bay yolil ch'ixtiquil. Toy moel ta ch'iel te ch'ixetique. Jc'axel tenbil c'ot te awalile. Jich ma ba sitin. 8Ja'uc me to, ay c'ot ta bay lequil lum. La yac' sit stuquel. Jich la yac' bayal sit ta juju-jpejt'. Ay la yac' lajuneb xcha'winic (30), soc oxwinic (60), soc jo'winic (100) —xi' te Jesuse. 9Soc jich la yalbey yaiyic: —Te mach'a ay xchiquine, ac'a me yaiy stojol ta lec —xi'. 10Te c'alal stuquel ayix a te Jesuse, te mach'atic sjoinejic soc uuc te lajchaytulique caj sjojc'obeyic bit'il ay swentail te seña-c'op te la yale. 11Te Jesús la yalbey yaiyic: —Te ja'exe, Dios ya yac'beyex ana'ic stojol te bit'il ay ta ajwalinel te Dios te ma'yuc ta na'el stojol ta neelal toe. Yan te yantique, ja' ya x'albot yaiyic ta swenta seña-c'op stuquelic, 12swenta yu'un jayebuc te ya yilic ta sitique, ma sna'beyic swentail, soc jayebuc buelta te ya x'albot yaiyique, ma xc'ot ta yo'tanic. Jich ma ba ya sujt'es yo'tanic soc ma spasbotic perdón yu'un te smulique —xi' te Jesuse. 13Jich la yal: —¿Yu'un bal ma c'ot ta awo'tanic te seña-c'op la cale? ¿Bit'il ya xc'ot ta awo'tanic te yantic seña-c'op jiche? 14Te mach'a ya yaiy awal, ja' me te mach'a ya xchol te sc'op Diose. 15Te awalil te c'ot ta bee, ja' pajal c'oem soc te mach'atic ya yaiyic stojol te sc'op Diose, ja'uc me to, laj nax yo'tanic ta yaiyel stojol a, ya xtal te Satanase. Jich ya sloq'uesbey ta yo'tanic te sc'op Dios te la yich' awel ta yo'tanique. 16Te awalil te c'ot ta ba tontiquile, ja' pajal c'oem soc te mach'atic bin nax yo'tanic la yaiyic stojol te sc'op Diose. 17Ja'uc me to, te bit'il ma ba c'uben ta lec te yisime, jich ma xjalajic. Teme ya xtal yiljibal yo'tanic soc uts'inel ta stojolic ta scaj te sc'op Diose, tic' ya xch'ay xch'uunjel yo'tanic a. 18Te awalil te c'ot ta bay yolil ch'ixtiquil, ja'ic te mach'atic ya yaiyic stojol te sc'op Diose, 19ja'uc me to, ja' ya xbajt' ta yo'tanic sna'el te bitic swenta te balumilale. Ya xlo'layotic yu'un te c'ulejalile. Biq'uit nax yo'tanic yu'un spisil bila ay ta q'uinal. Jich tenbil ya xc'ot te sc'op Dios te ay ta yo'tanique. Jich ma sitinic. 20Te awalil te c'ot ta lequil lume, ja'ic te mach'atic ya yaiyic te sc'op Diose soc te ya yac' ta yo'tanique. Ay ya sitin lajuneb xcha'winic (30), oxwinic (60) soc jo'winic (100) —xi' te Jesuse. 21Soc la yalbey xan: —¿Teme ya atsum c'ajc' awile, ya bal amac ta cajon? ¿O ya bal xba atujch'an ta yanil wayibal? Ma jichuc ta pasel. Ya sc'an te ya yich' tujch'anel ta stuchtajib swenta yu'un ya xchicnaj q'uinal yu'un. 22Melel ma'yuc bila ay ta naq'uel te bila ma xyich' chicnantesele. Te bila muquen aye, ya me xchicnaj ta saquil q'uinal. 23Te mach'a ay xchiquine, ac'a me yaiy stojol ta lec —xi' te Jesuse. 24Soc jich la yalbey xan: —Tey me xawac' awo'tanic a te bila la awaiyic stojole. Te jich yipal ya ap'ise, jich nix yipal ya sp'isbotat, soc c'axem to xan ya me yesmantesbeyex. 25Melel te mach'a ay bila yich'oje, ya x'ac'bot xan sjoy. Yan te mach'a ma'yuc bila yich'oje, ya xpojbot te bila yich'oj jtebuque —xi' te Jesuse. 26La yal te Jesuse: —Te bit'il ay ta ajwalinel te Diose, ja' pajal c'oem soc te ay jtul winic te ya swaj awalil ta lumq'uinale. 27Ya xway ta ajc'ubal, soc ya xjajch' ta sacubel q'uinal. In te awalile ya xjajch' ta loq'uel tel soc ta ch'iel, ja'uc me to, ma'yuc ta na'el yu'un te bit'il yac ta ch'iele. 28Te lumq'uinale, ja' ya yac' te ya sitine. Neel ya xchicnaj te yabenale, patil ya xchicnaj te banti ya yac' site soc c'unc'un ya xyijub te site. 29Te c'alal yijubenix a te site, te winique ya xjajch' set' ta hoz, melel yorailix te c'ajoje —xi' te Jesuse. 30Soc la yal te Jesuse: —¿Bila ya jpajtic soc te bit'il ay ta ajwalinel te Diose? ¿Bila seña-c'op te ya jpajtic soque? 31Ja' pajal c'oem soc te sbac' mostaza te ya yich' ts'unel ta lumq'uinal te biq'uit nax te sbaq'ue. Ma spaj yantic awaliletic te ay ta balumilale. 32Te c'alal ya yich' ts'unele, ya xch'i soc muc' ya xc'ot c'ax jich te bit'il yantic awalts'unubiletique. Muc' ya xc'ot te sc'abc'abe. Te ja'mal mutetique ya xju' ya xtal spas xpechechic tey a ta bay te yaxinale —xi' te Jesuse. 33Te Jesús la yal seña-c'op, jich te bit'il la yalix tele, ja' to chican bay c'alal te ju' yu'unic yaiyel stojole. 34Ma'yuc bay jich nax a c'opoj, puersa la stuuntes seña-c'opetic. Yan te jnopojeletic yu'une jamal la xcholbey yaiyic spisil. 35Te c'alal ochix a te ajc'ubale, jich te Jesús la yalbey te jnopojeletic yu'une: —C'axucotic bael ta jejch' mar —xi'. 36Jich la yijq'uitayic jilel te ants-winiquetique. Tey la yiq'uic bael a te Jesús ta bay te barco ochemique. Soc ay yantic barcoetic te la sjoinic c'axele. 37Tal buen tulan ic' ta mar. Te yip sbul te mare mal ochel ta barco. C'an muluc coel ta jc'axel. 38Te Jesús yac'oj sts'anjol ta wayel ta yit barco. Te jnopojeletic la stijic jajch'el. Jich la yalbeyic: —¡Maestro! ¿Yu'un bal ma'yuc sc'oplal ta awo'tan te ya xlajotic ta ja'? —xiic. 39Te Jesús jajch'. La scom te iq'ue. La yalbey te mare: —¡Ch'aban, senajan! —la yut. Te iq'ue ch'ab. Lamal nax q'uinal c'ot yu'un. 40Te Jesús la sc'opon te jnopojeletique: —¿Bi yu'un te ya xiwexe? ¿Bit'il ay a te ma'yuc xch'uunjel awo'tanique? —la yut. 41Bayal xiw yo'tanic yu'un ta spisilic. La yalbey sbaic: —¿Mach'a junuc a in to te ya xju' yu'un spasel ta mandal te iq'ue soc te ya xch'uunbot smandal yu'une? —xiic yu'un.


Copyright
Learn More

will be added

X\