San Marcos 2

1Che'oxeb c'aal ta patil te Jesús c'ot xan ta lum Capernaúm. Pujc' sc'oplal te ayix ta nae. 2Bayal la stsob sbaic tel ta ora nax. Noj ta jyalel te nae. Ma'yuquix banti ya xtec'ajic xan, ni ta ti'nail. Te Jesús la xchol te sc'op Diose. 3Tal chantul winiquetic te sq'uechojic tel jtul winic te chamen xchial te yoc sc'abe. 4Ma pas te toj ya xc'axic bael ta bay te Jesuse, ta scaj te bayal te ants-winiquetique. Jich yu'un la sjamic te ba na ta ba ay te Jesuse. Tey la sliq'uic coel a soc scajcante'al te mach'a chamen xchial yoc sc'ab ta bay stojol ay te Jesuse. 5C'alal la yil Jesús te bit'il ay xch'uunjel yo'tanique, jich la yalbey te chamele: —Jnich'an, pasbilatix perdón yu'un te amule —xi'. 6Ja'uc me to, tey najc'ajtic cha'oxtul a te jts'ibojometique. Jich la yal ta yo'tanic: 7¿“Bistuc te jich ya yal in winic to? Ya stoybac'optay te Diose. ¿Ay bal mach'a ya xju' yu'un spasel perdón yu'un mulil? Ja' nax stuquel te Diose”, xiic. 8Te Jesús la sna' stojol te jich yacalic ta yalel ta yo'tanique. Jich la yalbey: —¿Bi yu'un te jich ya awal ta awo'tanique? 9¿Bila wocol ta alel ta stojol te jchamele? ¿Ja' bal wocol te “Pasbilatix perdón yu'un amul”, te la cute? ¿O ja' bal wocol te “Jajch'an, tsaca jajch'el acajcante', beenan”, teme ya cute? 10Ja'uc me to, ya me cac'beyex awilic te bit'il tulan yat'el yich'oj ta spasel perdón yu'un mulil ta balumilal te Nich'anile —xi' te Jesuse. Soc jich la yalbey te winic te chamen xchial yoc sc'abe: 11—Ya calbat te ja'ate: Jajch'an. Q'uecha bael te acajcante'. Baan ta ana —la yut. 12Jich jajch' ta ora. La stsac jajch'el te scajcante'e. Loc' bael ta yolilic. Q'uelel sitic ta spisilic. Bayal ayan yo'tanic yu'un, soc la yalbeyic wocol Dios yu'un: —Xujt' ma'yuc banti quilojtic in to —xiic. 13Te Jesús cha'bajt' xan ta ti'mar. Tey la stsob sbaic tel ta stojol spisil te ants-winiquetique. Jich la sp'ijubtes. 14Te c'alal yac ta beel c'axel, la yil te Leví te snich'an Alfeo, nacal ta bay ya yich' tojel spatanul te biluque. Jich la yalbey: —La', ts'aclinawon —la yut. Jich te Leví la stejc'an sba. La sts'aclin bael te Jesuse. 15Ta patil bajt' ta sna Leví te Jesuse. Tey la sjoin ta we'el ta mesa tsobol jc'an-patanetic soc jmulawiletic. Soc tey ayic uuc a te jnopojeletic yu'un te Jesuse, melel tsobol te mach'atic la sts'aclinic ta beele. 16Te jts'ibojometic soc te fariseoetique la yilic te sjoinej sba ta we'el soc jc'an-patanetic soc jmulawiletic te Jesuse. Jich la yalbeyic te jnopojeletic yu'une: —¿Bit'il ay te maestro awu'unic te ya sjoin sba ta we'el-uch'ajel soc jc'an-patanetic soc jmulawiletic? —xiic. 17Te c'alal la yaiy stojol te Jesuse, jich caj yalbey yaiyic: —Te mach'atic bujts'an q'uinal ya yaiyique, ma xtuun yu'unic te jpoxtaywaneje. Ja' nax ya xtuun yu'unic jpoxtaywanej te mach'atic ayic ta chamele. Melel ma ja'uc tal quic' te mach'atic tojique, ja' tal quic' te jmulawiletique —xi' te Jesuse. 18Spasojic ayuno a te jnopojeletic yu'un te Juane soc te jnopojeletic yu'un te fariseoetique. Ay mach'atic tal sjojc'obeyic te Jesuse: —Ya spasic ayuno te jnopojeletic yu'un te Juane soc te jnopojeletic yu'un te fariseoetique. Yan te jnopojeletic awu'une, ¿bi yu'un te ma spasic ayuno stuquelic? —xiic. 19La yal te Jesuse: —¿Ya bal xju' ya spasic ayuno te j'il-nujbineletique, teme sjoinej to sba soc a te winic ya xnujbine? Melel teme ay to ta yolilique, ma xju' te ya spasic ayuno. 20Ja'uc me to, ya me sta yorail te ya x'ic'ot loq'uel ta yolilic te winic te nujbine. Ja' to me ya xjajch' spasulayic ayuno abi. 21“Ma'yuc mach'a ya spac'antay ta ach' pac' te pocol c'u'ile, melel te ach' paq'ue ya x'ojts'. Jich ya xch'i' yu'un te pocol c'u'ile. Jich c'ax muc' ya xc'ot xan a te xch'i'benale. 22Ja' nanix jich, ma'yuc mach'a ya spul yach'il vino ta pocol snujc'ulel chambalam te ts'isbile. Teme jich ya yich' pasele ya me xt'om te nujc'ule. Jich tojol ya xch'ay te vino soc te nujc'ule. Jich yu'un ya sc'an te yach'il nujc'ul ya yich' pulel a te yach'il vinoe —xi' te Jesuse. 23Ta sc'aalelal cux-o'tan been c'axel Jesús ta yolilal ts'unbil trigoetic. In te jnopojeletic yu'une la xjixbeyic sbac' trigo te c'alal yacalic ta c'axel tey a. 24Te fariseoetique cajic ta c'op yu'un: —Ilawil te jnopojeletic awu'une. Yacalic ta spasel te bila ma stac' ta pasel ta sc'aalelal cux-o'tan —xiic. 25La yal te Jesuse: —¿Yu'un bal xujt' ma ba awilojic ta Sjun Dios te bila la spas te Davide? Ay jun buelta ay swocol la yaiy yu'un wi'nal soc te sjo'taque. 26Jich och bael ta templo yu'un te Diose. Ja' yorail te ay ta muc' sacerdote te Abiatare. Te Davide la stsac tey a te ch'ul waj pachal ta stojol te Diose, te ja' nax ya xju' ya swe'ic te sacerdoteetique. Ja'uc me to, la swe' soc la yac'bey swe'ic uuc te sjo'taque —xi' te Jesuse. 27Soc la yalbey xan: —Te sc'aalelal te cux-o'tane, la yich' pasel ta scaj te ants-winique. Ma ja'uc swentail te ya xc'ax swocolic ta scanantayele. 28Jich yu'un te Nich'anile ja' ajwalil yu'un te sc'aalelal cux-o'tane —xi' te Jesuse.


Copyrighted Material
Learn More

will be added

X\