San Marcos 15

1Te c'alal sacubix a te q'uinale, te jwolwanej-sacerdoteetic, te principaletic, te jts'ibojometic, soc ta spisil te Muc'ul Tsoblej yu'unique, la stsob sbaic ta xchapel sc'opic. Jich la xchuquic bael te Jesuse. Ba yac'beyic ta sc'ab te Pilatoe. 2Te Pilato la sjojc'obey yaiy te Jesuse: —¿Ja'at bal Muc' Ajwalilat yu'un te judioetique? —xi'. La yal te Jesuse: —Jich te bit'il la awale —xi'. 3Te jwolwanej-sacerdoteetic bayal la slebeyic smul te Jesuse. 4Te Pilato la sjojc'obey xan: —¿Bi yu'un te ma x'ajaq'ue? Aiya awaiy te jayeb amul te ya slebate —xi'. 5Te Jesuse jp'al ma la sjac'. Jich bayal ayan yo'tan yu'un te Pilatoe. 6Ta jujun q'uin Pascua c'aem te ajwalil te ya scoltay bael jtul chuquel, chican te lume te mach'a ya yich' coltayel yu'une. 7Ay jtul winic Barrabás sbiil te pajal ayic ta chuquel soc te sjo'taque te la yaiyic milaw ta scontrainel te ajwalile. 8Jich la stsob tel sbaic te lume. Jajch' sc'anbeyic Pilato te bit'il c'aem ta spasel ta yorail te q'uine. 9Te Pilato la sjojc'obey: —¿Ya bal ac'anic te ja' ya jcoltay bael te Muc' Ajwalil yu'un te judioetique? —xi'. 10Yu'un sna'oj stojol te Pilato te lab-o'tantaybil yu'unic te Jesuse, ja' swentail te ac'ot ta c'abal yu'un te jwolwanej-sacerdoteetique. 11Te jwolwanej-sacerdoteetic la sujic te lume te ja'uc ya sc'anic te ya xcol bael ta chuquel te Barrabase. 12Te Pilato la sjojc'obey xan te lume: —Ja' xan te mach'a Muc' Ajwalil yu'un te judioetic ya awalique, ¿bi ya ac'anic ya jpasbey? —xi'. 13La yalic ta aw: —¡Mila ta cruz! —xiic. 14La yal te Pilatoe: —¿Bi yu'un? ¿Bila amen spasoj? —xi'. La stoyesic xan te yawique: —¡Mila ta cruz! —xiic ta aw. 15Jich yu'un te Pilato ja' la scoltay bael te Barrabase, yu'un la sc'an yo'tan te lecuc yo'tanic te lum yu'une. Soc la yac' ochuc ta majel te Jesuse, swenta yu'un ya xba yich' jijp'anel ta cruz stuquel. 16Jich te soldadoetique la yiq'uic ochel ta yutil yamac'ul sna te ajwalile, te Pretorio sbiile. La yiq'uic tel stijq'uil te soldadoetique. 17La yac'beyic slap tsaj'aman c'u'ul soc la yac'bey scoronain jalbil ch'ix ta sjol. 18Jich la yawtayic ta labanwanej: —¡Bin nax yutsil te muc' ajwalilat yu'un te judioetique! —xiic ta slabanel. 19La smajbeyic jalal ta sjol, soc la stubtayic, soc la squejan sbaic ta swenta yich'el ta muc' ta sc'opic. 20C'alal laj yo'tanic ta slabanel te Jesuse, la sloq'uesbeyic te tsaj'aman c'u'ule, soc la yac'beyic slap te sc'u' nixe. Jich la yiq'uic loq'uel. Ba smilic ta cruz. 21Ay jtul winic te talem ta Cirene, Simón sbiil te ja' stat te Alejandro soc te Rufoe, te xc'otuc ta c'alc'altique. La sujic ta xcuchel bael scruz te Jesuse. 22La yiq'uic bael te Jesús ta bay q'uinal Gólgota sbiil te Yawil Baqueljolol xi' c'oeme. 23C'an yac'beyic yuch' vino capal soc mirra, ja'uc me to, ma la sc'an la yuch'. 24Jich la sjijp'anic ta cruz. Te soldadoetic la spasic ta número yilic te bila ya xc'ot ta swentaic juju-jtul yu'un te sc'u'-spaq'ue. 25Baluneb ora c'aal a te la yich' jijp'anel ta cruz te Jesuse. 26Soc la yaq'uic ta sjol cruz welel ch'ujte' ta bay ts'ibubil te bi swentailuc te ac'ot ta lajele: “MUC' AJWALIL YU'UN TE JUDIOETIQUE”, xi' te ts'ibubile. 27Soc ay cheb j'eleq'uetic te la yich'ic jijp'anel ta cruz soque. Jtul ta swa'el soc jtul ta xq'uexen. [ 28Jich c'ot ta pasel te bila ts'ibubil ta Sjun te Diose te “ya me sjoin ta ajtayel te jmulawiletique”, te xie.] 29Te mach'atic yacalic ta c'axel tey a, la sjimulay sjolic ta slabanel: —¡E, ilawil xcal! Ya awal te ya ajin te templo soc te oxeb nax c'aal ya acha'pas xan ta ac'ope. 30Coltaya aba atuquel, coan tel ta cruz —xiic. 31Ja' nanix jich la slabanic uuc te jwolwanej-sacerdoteetic soc te jts'ibojometique. Jich la yalbey sbaic: —La scoltay yantic, ja'uc me to, ma xju' ya scoltay sba stuquel. 32Teme melel te ja' Cristo te Muc' Ajwalil yu'un te Israele, couc tel ta cruz ta ora quiltic. Jich me ya jch'uuntic —xiic. Soc la slabanic uuc te mach'atic pajal jipilic ta cruz soque. 33Ta olil c'aal ijc'ub q'uinal ta spamal te balumilale, ja' to ta oxeb ora smalel te c'aale. 34Ta oxeb ora c'aal a te tulan c'opoj te Jesuse: —Eloi, Eloi, ¿lama sabactani? —xi'. Ja' bi, “Dios cu'un, Dios cu'un, ¿bistuc la apijt'eson?” xi' ta c'asesel te bila la yale. 35Ay la yaiyic stojol te mach'atic tey ayic a, la yalic: —Ja' ya yic' tel te Elías te j'alwanej yu'un te Diose —xiic yu'un. 36Ay jtul te ora nax ba smul ta vinagre te esponjae. La slujch'an moel ta jalal yu'un ya yac'bey sts'ub te Jesuse. Jich la yalbey te yantique: —Ya jmaliy quiltic teme ja' ya xtal scojt'es ta cruz te Eliase —xi'. 37Te Jesuse tulan awun. Loc' xch'ulel. 38Jich ora jats coel tel c'alal sba c'alal yet'al te pac' tsalbil a te temploe. 39Te centurión yu'un soldado te teq'uel ta bay jipil te Jesuse, te c'alal la yil te bit'il awun soc te bit'il loc' xch'ulele, jich la yal: —Melel nix a te ja' Snich'an Dios in winic to —xi'. 40Ay antsetic te q'uejel to ayic ta ilwaneje. Tey ayic soc a te María Magdalena, soc te María te sme' te jch'iel Jacobo soc te José, soc uuc te Salomé. 41Ja' in antsetic to la sts'aclinic ta bael te Jesús te c'alal ay to ta sq'uinal Galilea. La yac' sbaic ta abatinel yu'un. Soc ay tsobol yantic antsetic te sjoinejic moel ta Jerusalén. 42Ja' sc'aalelal a te ya xchajban sbaic te judioetic te bit'il pajel xanix te sc'aalelal cux-o'tan yu'unique, soc malix c'aal a. 43Ay jtul winic José sbiil te talem ta ch'in lum Arimatea te yich'oj yat'el ta Muc'ul Tsobleje. Ich'bil ta muc' te José, soc yac ta smaliyel te bit'il ay ta ajwalinel te Diose. Ja' ba sc'opon te Pilatoe. Ma ba xiw ta stojol te ya sc'anbey sbaq'uetal te Jesuse. 44Te Pilatoe ayan yo'tan yu'un te lajemix la yaiye. Jich la yic' tel sjojc'obey yaiy te centurión yu'un soldado teme melele. 45Te c'alal albot yu'un te centurión te bit'il lajemixe, jich la yalbey te José te ya yich'bey bael te sbaq'uetale. 46Te José la sman te sábana-paq'ue, la scotesbey te sbaq'uetal soc la spotsbey ta pac'. Jich ba yac' jilel ta muquenal te p'ijom ton jutbil ochele, soc la smacbey jilel sti' ta muc'ul ton. 47Te María Magdalena soc te María te sme' te José la yilic te banti la yaq'uic jilele.


Copyright
Learn More

will be added

X\