San Marcos 10

1Te Jesús la yijq'uitay jilel te lum Capernaúm. Bajt' ta sq'uinal Judea soc ta bay te q'uinal te ay ta stojol sloq'uib c'aal ta jejch' muc'ul ja' Jordán. Yan buelta la stsob sbaic tel te lume. Jich jajch' sp'ijubtes jich bit'il te c'aem ta spasele. 2Ay fariseoetic noptsajic tel ta stojol te Jesuse, swenta yu'un ya yilbeyic yo'tan. La sjojc'obeyic teme ya spas ya yijq'uitay sba soc yinam te winique. 3La yal te Jesuse: —¿Bi xi' smandal te Moisese? —xi'. 4La yalic: —Te Moisés la yal te ya xju' ya yich' najc'anel ta jun te bi swentailuc te ya yijq'uitay sbaique —xiic. 5Te Jesús la yalbey: —Te Moisese la nax sts'ibubeyex jilel te mandalile, ta scaj te tulan te awo'tanique. 6Ja'uc me to, ta xjajch'ibal c'alal Dios la spas spisil te bitic aye, la spas winic soc ants. 7Ja' swentail te ya yijq'uitay jilel sme'-stat te winique, soc ya yic' sba soc te yiname, 8soc jun nax sbaq'uetalic ya xc'ot ta xchebalic. Jich ma chebuquix. Jun nax ayiquix. 9Jich yu'un te mach'a jun nax la yac' te Diose, ma spas ta jatel yu'un te winique —xi' te Jesuse. 10Te c'alal ayix ta na soc te jnopojeletique, la sjojc'obeyic xan in aiyej to. 11Te Jesús la yalbey yaiyic: —Te mach'a ya yijq'uitay sba soc te yiname, teme yan ants ya yinamine, ja' me mulwej abi. 12Soc teme ay ants te ya yijq'uitay sba soc te smamlale, teme yan winic ya smamlaline, ay ta mulwej abi —xi'. 13Ay la yiq'uic tel alaletic ta stojol te Jesuse, swenta yu'un ya scajanbey sc'ab ta sjolic, ja'uc me to, te jnopojeletique c'an scomic te mach'atic yic'ojic tele. 14C'alal la yil te Jesuse, ma lecuc la yaiy. Jich la yal: —Ac'a taluc ta jtojol te alaletique. Ma me x'acomic, melel te mach'a jich yo'tanic te bit'il in alaletic to, ja' me ya xju' ya yajwalinic te Diose. 15Jamal ya calbeyex, te mach'a ma xch'uun yajwalinel te Diose, jich bit'il te alale, ma xju' ya yajwalin te Diose —xi' te Jesuse. 16La spet te alaletique. La scajanbey sc'ab ta sjolic, soc la yac'bey bendición ta spisilic. 17Te c'alal jajch' xan ta beel te Jesuse, tal ta animal jtul winic. Tal squejan sba ta stojol soc la sjojc'obey: —Maestro te lecat atuquele, ¿bila lec ya jpas swenta yu'un ya xcuxinon sbajt'el q'uinal? —xi'. 18Te Jesús la yalbey: —¿Bi yu'un ya awal te lecone? Ma'yuc mach'a lec, ja' nax lec stuquel te Diose. 19Awaiyoj stojol te bi ya yal te mandaliletique: “Ma me x'awaiy milaw, ma me x'awaiy mulwej, ma me x'awaiy elec', ma me xlewanat ta c'op, ma me x'awaiy lo'laywanej, soc ich'a ta muc' te ame'-atate”, te xie —xi' te Jesuse. 20La yal te winique: —Maestro, spisil cat'elinej spasel ta jqueremil to tel —xi'. 21Te Jesús la sc'abubey sit. C'ux la yaiy ta yo'tan, soc la yalbey: —Ay to yan xan te bila ya sc'an awu'une. Baan, chona spisil te bila ay awu'une, soc q'uebanbeya te me'baetique. Jich me ay ac'ulejal ta ch'ulchan ya xc'oat. La' me, joinawon —xi'. 22Te c'alal la yaiy stojol te winique, cham nax la yaiy yu'un, soc bayal la smel bael te yo'tane, yu'un bayal te sc'ulejale. 23Te Jesús la sc'abubey sit te jnopojeletique. Jich la yalbey yaiyic: —Te jc'ulejetique wocol ya yajwalinic te Diose —xi'. 24Te jnopojeletique bayal ayan yo'tanic yu'un te bila la yale, ja'uc me to, te Jesús la yalbey xan yaiyic: —Cal-jnich'nab, wocol ya x'och ta banti ay ta ajwalinel te Dios te mach'a yich'oj sba ta muc' soc te sc'ulejale. 25Jich bit'il ma xju' ya xc'ax ta aguja te camelloe, c'axem to xan wocol ya x'ochic te jc'ulejetic ta banti ay ta ajwalinel te Diose —xi' te Jesuse. 26Te c'alal la yaiyic stojole, jchajp nax q'uinal la yaiyic yu'un. Caj yalbey sbaic: —¿Mach'a me ya xcol jiche? —xiic yu'un. 27Te Jesús la sc'abubey sitic, soc la yalbey xan yaiyic: —Te ants-winiquetique ma xju' yu'unic spasel in to. Yan te Diose ya xju' yu'un stuquel, melel ma'yuc bi ma xju' yu'un spasel te Diose —xi'. 28Te Pedro la yal: —Cajwal, te jo'otique jilemix cu'untic spisil te bitic ay cu'untique, melel joinejticatix —xi'. 29La yal te Jesuse: —Jamal ya calbeyex, te mach'a ay bi ya yijq'uitay jilel ta jwenta soc ta swenta te lec yach'il c'ope, chican teme sna, sbanquiltac, xwixitac, yijts'inab, sme'-stat, yinam, snich'nab, o ja' te sq'uinale, 30jo'winic buelta ya x'esmaj sjelol ya yich' li'to ta q'uinal, chican teme sna, sbanquiltac, xwixitac, yijts'inab, sme', snich'nab, o sq'uinal. Soc ya me yich' uts'inel uuc, soc ta patil bael ya me x'ac'ot cuxinuc sbajt'el q'uinal. 31Ja'uc me to, te mach'atic sbabial ayic ta ora to, slajibal me ya xc'otic ta patil. Yan te mach'atic slajibal ayic ta ora to, ja' me sbabial ya xc'otic stuquelic —xi' te Jesuse. 32Yacalic ta beel moel ta sbelal Jerusalén. Neel yac ta beel te Jesuse. Patil ay stuquel te jnopojeletique. Bayal yac ta aiyej te yo'tanique. Yan te jts'aclinwanejetique yacalic ta xiwel stuquelic. Te Jesús la xcha'yic' ta stojol stuquel nax te lajchaytul jnopojeletic yu'une. Jajch' yalbey yaiyic xan te bila ya xc'ot ta pasel ta stojole. 33Jich la yal: —Aiya awaiyic stojol, yacotiquix ta moel bael ta Jerusalén. Te Nich'anile, tey me ya xc'o ac'otuc ta sc'ab a te jwolwanej-sacerdoteetic soc ta sc'ab te jts'ibojometique, soc ya me xchajbaj sc'oplal ta milel yu'unic, soc ya me x'ac'ot ta sc'ab te jyanlumetique. 34Ya me slabanic, ya me stubtayic, ya me yac'beyic majel ta nujc'ul, soc ya me smilic. Ja'uc me to, ta yoxebal c'aal ya me xcha'cux tel —xi' te Jesuse. 35Te Jacobo soc te Juane, te snich'nab te Zebedeoe, noptsajic tel ta stojol te Jesuse. Jich la yalic: —Maestro, ya caltic wocol ta atojol te jichuc ya apasbotic te bila ya jc'antique —xiic. 36La yal te Jesuse: —¿Bila a te ya ac'anic te ya jpasbeyexe? —xi'. 37La yalic: —Ja' ya jc'antic te yacuc jointicat ta mandal jtul ta awa'el soc jtul ta aq'uexen te c'alal ya xtalat soc te xojobil awutsilale —xiic. 38Te Jesús la yalbey: —Ma x'ana'beyic swentail te bila ya ac'anique. ¿Ya bal xju' awu'unic uuc te woclajel te ya x'ac'botone? Soc ¿ya bal xju' awu'unic uuc te uts'inel ya quich' te jo'one? —xi'. 39La yalic: —Yac, ya xju' cu'untic uuc —xiic. La yal te Jesuse: —Melel nix a te ya x'ac'botex uuc te woclajele, soc te ya awich'ic uts'inel uuc, jich te bit'il ya quich' te jo'one. 40Yan te bit'il ya ac'anic te ya xnajc'ajex jtul ta jwa'el soc jtul ta jq'uexene, ma ja'uc ay ta jwenta. Ja' ay ta swenta stuquel te Jtate te mach'atic te ya yac' najc'ajuc tey a —xi' te Jesuse. 41Te c'alal la yaiyic stojol te lajuntul jnopojeletique, ilinic ta stojol te Jacobo soc te Juane. 42Te Jesús la yic' tel ta stojol spisilic. Jich la yalbey yaiyic: —Ya ana'ic te ya yac' sbaic ta ich'el ta muc' yu'un slumal te ajwaliletique. Soc te mach'atic cajal ayique, tulan ya xmandalajic ta stojol te nacione. 43Yan te ja'exe ma me jichuc xapasic. Teme ya ac'anic te muc' ya xc'oexe, ac'a me abaic ta abatinel. 44Teme ay mach'a ya sc'an te sbabial ya xc'ot awu'unique, ac'a me yac' sba ta abatinel ta stojol te yantique. 45Melel jich uuc te Nich'anile, ma ja'uc talem yu'un te ay mach'a ya yabatine. Ja' talem yu'un te ya yac' sba ta abatinel soc te ya yac' sba ta lajel swenta yu'un jich ya xwejt' scolel tsobol ta jtul te ants-winiquetique —xi' te Jesuse. 46C'otic ta lum Jericó. Te c'alal yaquix ta loq'uel bael ta ti'lum te Jesuse, sjoinej te jnopojeletic yu'une soc tsobol te ants-winiquetique. Ay jtul ma'sit nacal ta ti'be yac ta c'anbajel, Bartimeo sbiil te snich'an Timeoe. 47La yaiy stojol te ja' Jesús te Nazarete te yac ta c'axele. Jich jajch' yawtay: —¡Jesús, te sts'umbalat Davide, c'uxtayawon! —xi' ta aw. 48Tsobol la scomic te manchuc ya x'awune, ja'uc me to, tulan awun xan: —¡Sts'umbal David, c'uxtayawon! —xi'. 49Te Jesús la stejc'an sba: —Ic'aic tel —xi'. Jich la yiq'uic tel te ma'site soc la yalbeyic: —Ac'a smuc'ul awo'tan. Jajch'an. Ya yic'atix —xiic. 50Jich la sc'ojts'an jilel te stsotse. Jajch' bael. Ba sta te Jesuse. 51Jesús la sjojc'obey yaiy: —¿Yu'un bal ay bi ya ac'an te ya jpasbate? —xi'. La yal te ma'site: —Maestro, ya jc'an te ya ajambon te jsite —xi'. 52Jesús la yalbey: —Baanix. Ta swenta xch'uunjel awo'tan te colematixe —xi' te Jesuse. Te winique ora la yil te q'uinale soc la sts'aclin bael ta be te Jesuse.


Copyright
Learn More

will be added

X\