San Marcos 1

1Ja' xjajch'ibal te lec yach'il c'op yu'un Jesucristo te [Snich'an te Diose.] 2Jich bit'il ts'ibubil jilel sc'oplal yu'un Isaías te j'alwanej yu'un te Diose: “Ya me jneeltes bael ta atojol jtul te mach'a ya xc'opoj cu'un, swenta yu'un ya xchajbanbat abe. 3Ya me xcaj ta aw ta jochol taquin q'uinal. Jich me ya yal ta aw: ‘Chajbanbeyaic me sbe te Cajwaltique, toj me xajamic bael te sbee’, te xie”, xi' te ts'ibubile. 4Jich te Juane tal ta yaq'uel ich'ja' ta jochol taquin q'uinal. Soc jich la yalbey te ants-winiquetic te ac'a sujt'es yo'tanic ta stojol te Diose, soc ac'a yac' sbaic ta ich'ja', yu'un jich me ya spasbot perdón yu'un te smulique. 5Te ants-winiquetique talic ta spamal sq'uinal Judea soc ta bay muc'ul lum Jerusalén. Tal yaiybeyic stojol sc'op te Juane. Te c'alal la yalic ta jamal te smulique, jich ac'bot yich'ic ja' ta muc'ja' Jordán yu'un. 6Te sc'u' te Juane pasbil ta stsotsil camello, soc xchucoj xch'ujt' ta nujc'ul. Ja' la swe'elin te c'ulub soc ajaw-chab. 7Jach ta xcholel, jich la yal: —Te mach'a patil ya xtal cu'un ja' cajal yu'el stuquel. Ma spas te ya jtilbey yac'ul te xanabe. 8Melel te jo'one, ja' nax ya cac'beyex awich'ic te ja' ta swenta nax te ja'e. Yan te mach'a ya xtale, ja' ya yac'beyex awich'ic ja' ta swenta te Ch'ul Espiritue —xi' te Juane. 9La sta yorail te loc' tel Jesús ta lum Nazaret te ay ta sq'uinal Galilea. Jul ac'botuc yich' ja' yu'un Juan ta muc'ja' Jordán. 10Te c'alal loc' nax tel ta ja' te Jesuse, la yil jam te ch'ulchane, coj tel te Espiritue, jich bit'il stsumut te jul ta stojole. 11Soc ay mach'a c'opoj tel ta ch'ulchan te jich la yale: —Ja'at Jnich'anat te bayal c'uxat ta co'tane. Bin nax co'tan awu'un —xi'. 12Te Jesús ora ic'ot bael ta jochol taquin q'uinal yu'un te Espiritue. 13Cha'winic c'aal ilbot yo'tan tey a yu'un te Satanase. Te Jesús ja' nax sjoinej tey a te ja'mal chambalametique, soc tal yac' sbaic ta abatinel yu'un te ch'ul abatetique. 14Te c'alal och ta chuquel te Juan J'ac'-ich'ja'e, te Jesús bajt' ta sq'uinal Galilea ta yalel te lec yach'il c'op te bit'il ay ta ajwalinel te Diose. 15Jich la yal: —C'otix yorail te bit'il ay ta ajwalinel te Diose. Jich yu'un sujt'esa awo'tanic ta stojol te Diose. Ch'uunaic me te lec yach'il c'ope —xi' te Jesuse. 16Te Jesús been c'axel ta ti'mar yu'un Galilea. C'alal la yil te Simone soc te yijts'ine ja' te Andrese, yacalic ta xch'ojel ochel ta mar te stsacjibal-xchayique, melel ja' yat'elic te tsac-chaye. 17Te Jesús la yalbey yaiyic: —La', ts'aclinawonic. Ta ora to ja' awat'eliquix ya xc'ot te ya atsob tel ants-winiquetic ta jtojole —xi' te Jesuse. 18Ta ora nax la yijq'uitayic jilel te stsacjibal-xchayique. La sts'aclinic bael. 19Been xan c'axel jtebuc te Jesuse. Tey la yil te Jacobo soc te yijts'ine, ja' te Juane, te snich'nab te Zebedeoe. Ayic ta yutil barco. Yacalic ta sts'aquel te xchojaq'uil stsacjibal-xchayique. 20Te Jesús ora la yic' tel xchebal. Jich la yijq'uitayic jilel te sbarcoique, te yaj'at'elique soc te statique, ja' te Zebedeoe. La sts'aclinic bael te Jesuse. 21C'otic ta lum Capernaúm. Ta sc'aalelal cux-o'tan och ta sinagoga te Jesuse. La yaiy p'ijubteswanej tey a. 22Bayal ayan yo'tanic yu'un te bila la yac' ta nopele, melel jich la yaiy p'ijubteswanej ta stojolic te bit'il mach'a yich'oj tulan yat'el. Ma jichuc te bit'il te jts'ibojometique. 23Ay talem ta sinagoga jtul winic te ay pucuj ta yo'tan, te caj ta aw. 24Jich la yal: —Jesús te Nazarete, ¿bi awentaotic? ¿Yu'un bal tal ajinotic? Ya jna'bat aba te ja'at te Xch'ul-nich'anat te Diose —xi' ta aw. 25Te Jesús la scom ta c'op te pucuje: —¡Ma xc'opojat! ¡Loc'an tel ta yo'tan te winique! —la yut. 26Te pucuje la yac' tup'uc yic' te winique. Tulan awun te c'alal loc' baele. 27Spisilic jchajp nax la yilic a, soc caj sjojc'obey sbaic: —¿Bila a in to? ¿Bila yach'il nopjibal in to? Tulan yat'el yich'oj soc yu'el ta spasel ta mandal te pucujetique, soc ya xch'uunbot sc'op yu'unic —xiic. 28Ora pujc' sc'oplal te Jesús ta spamal sq'uinal Galilea. 29Te c'alal loq'uic tel ta sinagoga, bajt'ic ta bay sna te Simone te ja' sna soc te Andrese. Sjoinejic bael te Jacobo soc te Juane. 30Chawal ta swayib c'o staic te snialme'el te Simone, yu'un ay ta c'ajc'. La yalbeyic ta ora te Jesús te ay ta chamele. 31Jich te Jesús noptsaj bael tey a ta banti chawale. La stsacbey sc'ab. La sjajch'es. Ora nax a lamaj te sc'aale. Och ta mac'linwanej. 32Malix te c'aale, ochix ajc'ubal a. Jich te ants-winiquetique la yiq'uic tel ta stojol Jesús spisil te mach'atic ayic ta chamel soc spisil te mach'atic ay pucuj ta yo'tanique. 33Spisil lum la stsob sbaic tel ta bay te ti'naile. 34Te Jesús spisil lamaj yu'un manchuc teme ajtalamtic te chamel yich'ojique, soc la sloq'uesbey ta yo'tan tsobol pucujetic. Ma la yac' c'opojuc te pucujetique, yu'un la sna'beyic sba. 35Buen sab to soc ijc' to q'uinal a te jajch' te Jesuse. Loc' bael ta lum. Stuquel ba sc'opon Dios ta bay jochol te q'uinale. 36Te Simone soc te sjo'taque ba sleic te Jesuse. 37Te c'alal la staique, jich la yalbeyic: —Tsobol me mach'a ya sleat —xiic. 38La yal te Jesuse: —Ya xbootic ta bay ch'in lumlumtic te nopajtic ayique, yu'un ya xba caltic tey a te lec yach'il c'ope. Ja' swentail te talemone —xi'. 39Jich te Jesús been ta spamal sq'uinal Galilea. La yal te lec yach'il c'op ta bay te sinagoga ta juju-jpam lum, soc la sloq'uesbey te pucujetic ta yo'tanic te ants-winiquetique. 40Noptsaj tel ta stojol Jesús jtul winic te yich'oj c'a'el-chamele. La squejan sba ta stojol soc jich la yalbey: —Te jichuc awo'tane ya xju' awu'un te ya alecubtesone —xi'. 41Te Jesús la sna'bey yo'bolil sba. Jich la scajanbey sc'ab ta sjol, soc jich la yalbey: —Lec ay, ya xcolat ta chamel —xi'. 42Te c'alal la yal jich te Jesuse, ora ch'ay te sc'a'el-chamele. Lecub te sbaq'uetale. 43Te Jesús la sticun bael, soc la spas bael ta mandal: 44—Ya calbat, ma me mach'a xawalbey yaiy jtuluc. Toj me xbaat ta stojol te sacerdote te ya awac' aba ta ilel yu'une. Soc ya me awac'bey smajt'an Dios te bit'il lecubatixe, jich bit'il yaloj te Moisese. Jich me ya sna'ic stojol te ch'ayemix te achamele —la yut bael. 45Jich bajt' te winique. Ora jajch' spucbey sc'oplal te bila c'oem ta pasel ta stojole. Ja' swentail te ma ju' yu'un te ya x'och bael ta lumlumtic te Jesuse. Tey been ta bay jochol q'uinal, ja'uc me to, bayal mach'a tal ta ilel yu'un ta bayuc.


Copyright
Learn More

will be added

X\