San Lucas 9

1Te Jesús la stsob tel ta stojol te lajchaytul jnopojeletic yu'une. La yac'bey yich' yu'elic soc tulan yat'elic ta sloq'uesel spisil ta jchajp pucujetic soc ta slamantesel jchameletic. 2La sticun bael ta xcholel te bit'il ay ta ajwalinel te Diose soc ta slamantesel jchameletic. 3Soc la yalbey yaiyic: —Ma me ayuc bila ya awich'ic bael, ni anabate'ic, ni achojaq'uic, ni awajic, ni ataq'uinic, soc ma me cha'lijc'uc ac'u'ic. 4Te banti nailuc ya x'ochexe, ainanic tey a ja' to teme ya awijq'uitayic jilel te lume. 5Te banti ma xyiq'uex ochele, loc'anic bael tey a. Tijt'ana jilel te stanul awacanique. Ja' me seña ta stojolic te ma ja'uc ta awentaic te ma xch'uunique —xi' te Jesuse. 6Jich loq'uic bael. Bajt'ic ta bay ch'in lumetic. La xcholbey yaiyic te lec yach'il c'op swenta colel, soc la slamantes jchameletic ta bayuc. 7Te ajwalil Herodes la yaiy stojol spisil te bila yac ta spasel te Jesuse. Ma sna' te bila ya snop yu'une, ta scaj te ay mach'atic yacalic ta yalel te ja' cha'cuxix tel te Juane. 8Soc ay yantic yacalic ta yalel te ja'ix te Elías te j'alwanej yu'un te Diose. Soc ay yantic yacalic ta yalel te ja' cha'cuxemix tel jtul te namey q'uinal j'alwanejetique. 9Ja'uc me to, te Herodes la yal: —Jo'on la cac' ta c'oquel sjol te Juane. ¿Mach'a a in to te yacon ta yaiyel stojol sc'oplale? —xi'. Jich yu'un, la sle te ayuc bit'il ya yilbey site. 10Te c'alal sujt'ic tel te jpuc-c'opetique, jul yalbeyic yaiy te Jesús te bila la spasique. Jich ic'otic bael yu'un te Jesús ta bay jochol q'uinal te nopol ay ta lum Betsaida. 11Te c'alal la sna'ic stojol te ants-winiquetique, la st'unic bael. Te Jesús la yic' ta stojol. La xcholbey yaiyic te bit'il ay ta ajwalinel te Diose, soc la slamantes te mach'atic ayic ta chamele. 12Te c'alal yaquix ta malel c'aal a, noptsajic tel ta stojol Jesús te lajchaytul jpuc-c'opetique. Jich la yalic: —Ticunaix bael te ants-winiquetic ta bay ch'in lumlumtic soc ta c'alc'altic te nopol ayique. Ac'a smajan snaic tey a, soc ac'a sle swe'elic tey a. Yu'un te banti ayotique, ma'yuc mach'a ay sna li'to —xiic. 13Jesús la yal: —Ac'beya swe'elic te ja'exe —xi'. La yalic: —Ja' nax jo'pejch' waj quich'ojtic soc cha'cojt' chay. ¿Yu'un bal ya xba jmanbeytic swe'elic te in yipal ants-winiquetic to? —xiic. 14Melel ay niwan jo'mil (5,000) ta jtul winiquetic te stsoboj sbaique. Te Jesús la yalbey te jnopojeletic yu'une: —Albeyaic te ac'a snajc'an sbaic ta tsojboltsojp. Lajlajuneb me yoxwinic (50) ya awaq'uic te juju-jtsojbe —xi'. 15Te jnopojeletique jich la spasic te bit'il albotique. Jich la snajc'an sbaic ta spisilic te ants-winiquetique. Te Jesús la stsac te jo'pejch' waj soc te cha'cojt' chaye. La stoy moel sit ta ch'ulchan, la yalbey wocol Dios yu'un, 16soc la xet' te waje. La yac'bey ta sc'ab te jnopojeletique, ja'ic la spucbeyic te ants-winiquetic. 17Spisilic we'ic ja' to c'alal noj te xch'ujt'ique. Patil la yich' stsobel te sobraile. Noj xan lajchayeb moch te sobraile. 18Ay q'uejel bajt' ta sc'oponel Dios te Jesuse. Sjoinej te jnopojeletique. Tey la sjojc'obey yaiy a: —¿Mach'aon me ta sc'opic a te ants-winiquetique? —xi'. 19La yalic: —Ay mach'a ya yalic te ja'at te Juan te J'ac'-ich'ja'e. Te yane ya yalic te ja'at Eliasate. Soc ay yantic ya yalic te ja'at jtul namey q'uinal j'alwanejat yu'un Dios te cha'cuxemat tele —xiic. 20Jojc'obotic yu'un uuc te Jesuse: —¿Ja' xan te ja'exe, mach'aon ta ac'opic uuc? —xi'. La yal te Pedroe: —Ja'at Cristoat yu'un te Diose —xi'. 21Te Jesús la scom ta spisilic te ma me mach'a ya yalbeyic jtuluc. 22Soc la yal: —Te Nich'anile puersa ya xc'ax bayal swocol soc xujt' ma'yuc sc'oplal ya xc'ot ta yo'tanic te principaletique soc te jwolwanej-sacerdoteetique soc te jts'ibojometique. Ya me x'ac'ot ta lajel yu'unic, soc ya me xcha'cux tel ta yoxebal c'aal —xi'. 23Soc la yalbey yaiyic ta spisilic: —Teme ay mach'a ya sc'an ya sts'aclinone, ac'a me sloq'ues sba ta yo'tan. Ac'a me xcuch scruz jujun c'aal. Ac'a st'unon. 24Melel te mach'a ya xc'uxtay sba soc te xcuxlejale, ch'ayel me ya xbajt' soc te xcuxlejale. Yan te mach'a ya yac' sba ta lajel soc xcuxlejal ta jwentae, ya me xcuxin stuquel. 25¿Bila ya xloc' awu'un a teme ya awu'unin spisil te balumilale, teme tey ya xlajat a soc teme ch'ayel ya xbaat yu'une? 26Teme ya xq'uexawex cu'un, soc ya xq'uexawex yu'un te jc'ope, te Nich'anile, ya me xq'uexaw awu'unic uuc te c'alal ya xtal soc yutsilal te State soc te ch'ul abatetique. 27Jamal ya calbeyex: Ay mach'atic li' ayic to te ma ba ya xlajique ja' to teme la yilic te ayix ta ajwalinel te Diose —xi' te Jesuse. 28Ay niwan swaxaquebal c'aal yalbel a, te Jesús mo bael ta wits, yu'un ba sc'opon Dios tey a. La yic' bael te Pedro, te Jacobo soc te Juane. 29Te c'alal yac ta sc'oponel Dios a te Jesuse, c'atp'uj sit yelaw. Te sc'u'-spaq'ue xlemet nax xojobil a c'ot. 30Soc chicnaj cheb winiquetic tey a te yacalic ta c'op soc te Jesuse, ja' te Moisés soc te Eliase. 31Joytaybilic ta xojobil yutsilal Dios. Yacalic ta yaanel ta yoxebalic te bit'il ya xc'ax swocol ta lajel ta bay Jerusalén te Jesuse. 32Te Pedro soc te sjo'taque smasaset nax sitic yu'un swayelic. La swic' sitic yu'un. La yilic te xlemet nax yutsil xojobil te Jesuse soc te cheb winiquetic te sjoinej sba soque. 33Te c'alal yacaliquix ta bael a te cheb winiquetique, te Pedro la yal: —Maestro bin nax yutsil te li' ayotic to. Ja' lec jpastic oxwol nailwamal. Jun awu'un te ja'ate, jun yu'un te Moisese, soc jun yu'un te Eliase —xi' te Pedroe. Yu'un ma la sna' te bila ya yal yu'une. 34Yac to ta yalel a, talic ta potsel yu'un te tocale. Xiw yo'tanic yu'un te bit'il ochic ta tocal la yilique. 35Ay mach'a c'opoj tel ta yolil tocal: —Ja' in to, ja' te Jnich'an te tsabil cu'une. Aiybeya awaiyic stojol sc'op stuquel —xi'. 36Te c'alal laj yo'tan ta c'ope, la yilic te stuquel xanix tey a te Jesuse. Jich te jnopojeletique ma'yuc mach'a la yalbey yaiy jtuluc ta ora te bila la yilique. 37Ta yan c'aalil coic tel ta wits. Talic ta tael yu'un tsobol ants-winiquetic te Jesuse. 38Ay jtul winic tey a te tulan c'opoje: —Maestro, wocoluc ya jc'an te ya awilbon te jnich'ane, yu'un jip jtul a. 39Yac ta uts'inel yu'un te pucuje. Ya x'awun yu'un, soc ya xt'uxanot ta lum, soc ya xbulan ya'lel sti'. Ma x'ijq'uitayot yu'un. 40La calbeyix wocol te jnopojeletic awu'un te yacuc sloq'uesbonic ta yo'tan, ja'uc me to, ma ju' yu'unic sloq'uesel —xi'. 41La yal te Jesuse: —Bit'il ayex a, te ma'yuc xch'uunjel awo'tanique soc te ma lecuc awo'tanique. ¿Jayeb me xan c'aal te ya joinexe soc te ya jts'icbeyex te bit'il ayexe? Ic'bon tel quil te anich'ane —xi'. 42Te c'alal yac ta noptsajel tel te quereme, t'uxanot ta lum yu'un te pucuje soc ac'bot xijulay sba yu'un. Ja'uc me to, te Jesús la scom te pucuje soc la scoltay te quereme. La yac'bey ta sc'ab te state. 43Spisilic yan nax q'uinal la yaiyic yu'un te la yilbeyic yutsilal yu'el te Diose. Te c'alal ch'ayem nax yo'tanic yu'un te bila la spas te Jesuse, jich la yalbey te jnopojeletic yu'une: 44—Aiya awaiyic stojol ta lec te bila ya calbeyexe: Te Nich'anile ya me x'ochon ta sc'ab te ants-winiquetique —xi'. 45Te jnopojeletique ma c'ot ta yo'tanic te bila la yale, Dios ma ba ac'bot sna'ic stojol yu'un. Soc la xi'ic te ya sjojc'obeyic xan te Jesuse. 46Te jnopojeletic yu'un te Jesuse, jajch' yalbey sbaic te mach'a muc' ya xc'ot yu'unic ta spisilique. 47Te Jesús la sna' stojol te bila yacalic ta yaanele, jich yu'un la spet jtul alal. 48Jich la yal: —Te mach'a jo'on ta jwenta te ya yic' ta stojol jtuluc alal jich bit'il in to, jo'on la yic'onix abi. In te mach'a ya yic'on ta stojole, ja' la yiq'uix uuc te mach'a la sticunon tele. Jich yu'un te mach'a peq'uel ay ta awolilique, ja' me muc' stuquel —xi' te Jesuse. 49C'opoj te Juane: —Maestro, la quiltic jtul winic te yac ta sloq'uesel pucujetic ta swenta abiil. La calbeytic te ya scom sbae, melel ma ba sjoinejotic —xi'. 50Jesús la yalbey: —Ma me x'acomic, melel te mach'a ma scontroinotique, yu'un ja' joytic ta at'el abi —xi'. 51C'alal nopol ya sta yorail te ya x'ic'ot moel ta ch'ulchan te Jesuse, la stejc'an yo'tan te ya xbajt' ta Jerusalén. 52Jich la sneeltes bael abatetic yu'un. Bajt'ic ta smajanel na ta bay ch'in lum te ay ta sq'uinal Samaria. 53Ja'uc me to, te samariaetique ma la yic' ta stojolic, yu'un la sna'ic te c'alal ta Jerusalén ya xbajt' te Jesuse. 54Te cheb jnopojeletic, te Jacobo soc te Juane, la yilic te ma ac'botic ta majanel te nae. Jich la yalbeyic te Jesuse: —Cajwal, ¿ya bal ac'an te yacuc caltic mandal te ya xco tel c'ajc' ta ch'ulchan te jich me ya xlajic yu'un, [jich te bit'il la spas ta namey te j'alwanej Eliase]? —xiic. 55Te Jesús la sujt'es sba. La scom, [jich la yalbey: —Ma x'ana'ic stojol te bila ay ta awo'tanique. 56Melel te Nich'anile, ma ba tal slajinbey xcuxlejalic te ants-winiquetique. Tal yac' cuxinuc —xi' te Jesuse.] Jich c'axic bael ta bay yan ch'in lum. 57Te bit'il yacalic ta beele, ay mach'a la yalbey te Jesús ta be: —Cajwal, ya jt'unat chican te banti ya xbaate —xi'. 58La yalbey te Jesuse: —Te waxetique ay xch'enic. Soc te ja'mal mutetique ay spechechic stuquelic. Yan te Nich'anile ma xwejt' te banti ya smejts'an sba ta wayele —xi' te Jesuse. 59Te Jesús la yalbey te yane: —La' t'unawon bael —la yut. Te winique la yal: —Cajwal, ac'awon xan bael neeluc te ya xba jmuc jilel te jtate —xi'. 60Jesús la yalbey: —Ja' ac'a smuc te mach'a pajal anima soque. Yan te ja'ate, baan ta spuquel te bit'il ay ta ajwalinel te Diose —la yut. 61Ay yan c'opoj: —Cajwal, ya jc'an ya jt'unat. Ja'uc me to, ac'awon bael neeluc te ya xba jc'opon xan jilel te mach'atic ay cu'un ta jnae —xi'. 62Te Jesús la yalbey: —Te mach'a ayix ta at'el soc te aradoe, teme ya yil sujt'el te spate, ma xtuun ta abatinel tey a ta banti ay ta ajwalinel te Diose —xi' te Jesuse.


Copyright
Learn More

will be added

X\