San Lucas 19

1C'alal och Jesús ta lum Jericó, been c'axel ta yolil lum. 2Ay jtul winic tey a Zaqueo sbiil te ja' jwolwanej yu'un te jc'an-patanetique. Buen c'ulej te winique. 3La sle bit'il ya yil te Jesuse, ja'uc me to, ma ju' te la yile, melel tsobol te ants-winiquetique soc c'ax comol winic stuquel. 4Jich animaj c'axel ta ora. Mo ta sicómoro-te' te banti ya xc'ax te Jesuse, swenta yu'un jich me ya yilbey sit. 5C'alal c'ax tey a te Jesuse, la stoy moel sit, la yil tey ay a. Jich la yalbey: —Zaqueo, coan tel ta ora, yu'un ya xc'oon ta ana yo'tic —xi'. 6Jich te Zaqueo coj tel ta ora. Bin nax yo'tan la yic' bael ta sna. 7Te c'alal la yilic spisil te ants-winiquetic te tey och a te Jesuse, la smuquen-ayanic. Ja' amen la yaiyic te la sjoin te mach'a jmulawile. 8Te Zaqueo tejc'aj jajch'el ta olilal. Jich la yalbey te Cajwaltique: —Cajwal, ya me jq'uebanbey oliluc jbiluc te me'baetique. Soc teme ay mach'a la jlo'laybey sbiluque, chaneb buelta ya quesmantesbey sujt'el te sjelole —xi'. 9La yal te Jesuse: —Ta ora to julemix colel li' ta na to, melel ja' sts'umbal Abraham uuc in winic to. 10Melel te Nich'anile tal sle soc tal scoltay te mach'atic ch'ayeme —xi' te Jesuse. 11Te ants-winiquetic yacalic ta yaiybel stojol sc'op tey a te Jesuse. Jich jajch' yalbey yaiyic seña-c'op, yu'un ya xc'otix ta Jerusalén, soc scuyojic te ants-winiquetic te ya xchicnajix ta ora nax te muc' ajwalil ya yac' te Diose. 12Jich la yal te Jesuse: —Ay jtul jc'ulej winic te bajt' ta yan lum te c'ubul aye, yu'un ba yich' tel yat'el ta muc' ajwalil. 13Te c'alal ma to xbajt' a, la yic' tel ta stojol lajuntul te abatetic yu'une. La yac'bey jujun mina-taq'uin ta juju-jtul. Jich la yalbey jilel: “Aiyaic manbajel soc chonbajel, ja' to teme sujt'on tele”, la yut. 14“Ja'uc me to, te winique mero ilaybil yu'un te slumale. Jich yu'un te c'alal baemix a, ta spat nax la sticunic bael abat te jich ba yale: “Ma jc'antic te ya yich' yat'el ta muc' ajwalil ta jwentatic te winique”, xiic. 15“Ja'uc me to, puersa la yich' yat'el ta muc' ajwalil. Jich sujt' tel ta slumal. Te c'alal sujt'emix tele, la sticun tel ta iq'uel te abatetic yu'un te la yac'bey jilel te jujun mina-taq'uine, swenta yu'un ya me sna' stojol te jayeb jolon yu'unic te taq'uine. 16Te mach'a sbabial tale la yal: “Cajwal, te mina-taq'uin la awac'bon jilele, jolon lajuneb cu'un”, xi'. 17La yal te ajwalile: “Lec at'ejat, lequil abatat. Te bit'il jun awo'tan la awentainbon te bila jteb la cac'bat jilele, jich yu'un ya cac'bat awat'el ta swentainel lajunpam lum”, xi'. 18“Tal uuc te yane jich la yal: “Cajwal, te mina-taq'uin la awac'bon jilele, jolon jo'eb cu'un”, xi'. 19Jich nix albot yu'un te yajwale: “Te ja'ate ya cac'bat awat'el ta swentainel jo'pam lum”, xi'. 20“Soc tal te yane. Jich la yal uuc: “Cajwal, li' ay to te jun mina-taq'uin la awac'bon jilele. La jq'uejbat, soc la jpotsbat ta pañuelo. 21Yu'un la jxi'at te bit'il tulan awo'tane. Melel ya awich' te bila ma ja'ucat awac'oj tey a, soc ja'at ya ac'aj te ma ja'ucat la ats'une”, xi'. 22Te ajwalile la yal: “Amenat ta abatil. Ta swenta te awee te ya cac'bat castigo yu'une. Te bit'il ya ana' te tulan co'tane, soc te ya quich' te bila ma jo'ocon cac'oj tey a, soc te ya jc'aj te ma jo'ocon jts'unoje, 23¿bi yu'un ma la awac' ta majanel swenta yu'un la quich'bey soc sjol te c'alal sujt'on tel te jichuque?”, la yut. 24“Soc jich la yalbey te mach'atic tec'ajtic tey a: “Pojbeya te mina-taq'uine. Ac'beya te mach'a yich'oj te lajunebe”, xi'. 25La yalic: “Cajwal, ay yich'ojix lajuneb mina-taq'uin stuquel”, xiic. 26La yal te muc' ajwalile: “Ya calbeyex: Spisil te mach'a ay bila yich'oje, ya me x'ac'bot xan sjoy. Yan te mach'a ma'yuc bila ay yu'une, ya me xpojbot te bila yich'oj jtebuque. 27Yan te mach'atic scontroinejone te ma la sc'anic te ya x'ochon ta muc' ajwalil ta swentaique, ic'bonic tel ta jtojol. C'ocbeyaic loq'uel sjol”, xi' te muc' ajwalile —xi' ta yalel te Jesuse. 28Te c'alal lajix yo'tan ta c'op te Jesuse, cha'jajch' xan ta beel moel ta Jerusalén. 29Te c'alal la sta te Wits Olivailtic sbiile ta bay nopol te ch'in lumetic te Betfagé soc Betania, la sticun bael cha'tul te jnopojeletic yu'une, jich la yalbey: 30—Baanic ta bay in ch'in lum to te ya quiltique. Tey me chucul ya xc'o ataic cojt' alal burro te ma'yuc mach'a scajtibinej ni junuc buelta. Tilaic, nitaic tel. 31Teme ay mach'a ya sjojc'obat: “¿Bistuc te ya atilic baele?”, teme xie, jich me xawalbeyic: “Ja' ya xtuun yu'un te Cajwaltique”, ya me awutic —xi'. 32Jich bajt'ic te cha'tul jnopojeletique. Jich c'o staic te bit'il albotic bael yu'un te Jesuse. 33Te c'alal yacalic ta stilel te alal burroe, albotic yu'un te yajwale: —¿Bistuc ya atilic te burroe? —xi'. 34La yalbeyic: —Ja' ya xtuun yu'un te Cajwaltique —xiic. 35Jich la snitic tel ta bay te Jesuse. La slim sc'u'ic ta spat te alal burroe, soc la smojt'esic tey a te Jesuse. 36Te bit'il yac ta beel te burroe, la slim bael sc'u'ic ta be. 37Te c'alal nopol ayiquix coel ta bay te Wits Olivailtique, bin nax yo'tanic jajch'ic ta aw te tsobol ta jtul jnopojeletic te sjoinejic ta beele. 38—¡Bin nax yutsil te Muc' Ajwalil te talemix ta swenta te Cajwaltique! ¡Lamalix q'uinal ta ch'ulchan! ¡Jelawen yutsil te Mach'a ay ta ch'ulchane! —xiic ta aw. 39Ay fariseoetic ta yolilic te tsobol ants-winiquetique. Jich la yalic: —Maestro, coma ta c'op te jnopojeletic awu'une —la yutic. 40La yal te Jesuse: —Ya calbeyex: Teme ya scom sbaic ta aw ta spisilic in to, ja' ya xjajch'ic ta aw uuc te tonetique —xi'. 41Te c'alal nopol ayiquix bael ta Jerusalene, te Jesús la yil spamal te lume. Jajch' yoq'uetay. 42Jich la yal ta yoq'uetayel: —Te c'oemuc ta awo'tan ta ora to te bila ya yac'bat lamal q'uinal awaiy yu'une, ja'uc me to, macal ta atojol ta ora to. 43Yu'un ya me sta sc'aalelal te ya xtal te awajcontroe. Ya me sjoytayat soc spamal te alumale. Ya me xtal yaiy tulan guerra. Ya me sle bi ya yut ya yochintaybat te alumale. 44Ya me yich' wuyel c'alal ta lum spisil te naetique. Ya me yich' milel spisil yajwal te alumale. Ni jp'ijuc ton te cajal ya xjil ta sba yan ton. Spisil me jich ya xc'ot ta pasel scaj te ma c'ot ta awo'tan te bi ora tal yilat te Diose —xi' ta yalel te Jesuse. 45C'alal och ta templo te Jesuse, jajch' sten loq'uel te mach'atic yacalic ta chonbajel soc ta manbajel tey a. 46Jich la yalbey yaiyic: —Jich ts'ibubil jilel ta Sjun Dios: “Te jnae snail sc'oponel Dios sbiil”, te xie. Ja'uc me to, te ja'exe la ac'atp'uniquix ta xch'en j'eleq'uetic —la yut. 47Jujun c'aal la yaiy p'ijubteswanej ta templo te Jesuse. Te jwolwanej-sacerdoteetic soc te jts'ibojometique soc uuc te mach'atic ich'bilic ta muc' yu'un te lume caj sleic bi ya yut ya smilic te Jesuse. 48Ja'uc me to, ma wejt' yu'unic te bi ya yutique, yu'un spisil lum toyol yo'tanic ta yaiybel stojol sc'op te Jesuse.


Copyright
Learn More

will be added

X\