San Lucas 15

1La stsob sbaic tel spisil te jc'an-patanetique soc te yantic jmulawiletique, tal yaiybeyic stojol sc'op te Jesuse. 2Ja'uc me to, te fariseoetic soc te jts'ibojometic caj smuquen-ayanic. Jich la yalic: —Ja' in winic to, jun yo'tan sba soc te jmulawiletique, melel ya sjoin ta we'el —xiic ta smuquen-ayanel te Jesuse. 3Jich te Jesús caj yalbey yaiyic in seña-c'op to: 4—Teme ay jtul te ja'ex te ay jo'winic (100) ta jcojt' xchije, ¿bi xi' yo'tan yu'un teme ay ch'ay jcojt'uc yu'une? ¿Ma bal yacuc yijq'uitay jilel ta aquiltic te balunlajuneb yo'winic (99) ta jcojt'e, yu'un ya xba sle tel te jcojt' ch'ayeme? ¿Ma xlaj yo'tan ta sleel ja' to teme la stae? 5Te c'alal ya stae, bin nax yo'tan ya scajan tel ta snuc'. 6C'alal ya xc'ot ta snae, ya stsob tel te sjo'taque soc te spat-xujq'ue, jich ya yalbey yaiyic: “Binuc nax me co'tantic ta jpisiltic yu'un, melel la jtaix te jcojt' jchij te ch'ayeme”, xi' ta yalel. 7Jich yu'un ya calbeyex, te c'ax jich ay sbujts' yo'tanic te mach'atic ayic ta ch'ulchan te c'alal ya sujt'es yo'tan yu'un smul te jtul jmulawil, te bit'il balunlajuneb yo'winic (99) ta jtul te toj yo'tanic ta stojol Dios, te ma yejt'aluc ya sujt'es yo'tanic yu'un te smulique. 8“Teme ay jtul ants te ay lajunsejp dracma staq'uine, ¿bi xi' yo'tan yu'un teme ya xch'ay junuc dracma yu'une? ¿Ma bal yacuc stsum c'ajc' yil, soc ma bal yacuc smes ta lec te snae yu'un ya sle te staq'uin ch'ayeme? Ja' to ya xlaj yo'tan a teme la stae. 9Te c'alal la staix ta leele, ya stsob tel te sjo'tac ta antsile soc te spat-xujq'ue. Jich ya yalbey yaiyic: “Binuc nax me awo'tanic cu'un, melel la jtaix te jun dracma-taq'uin te ch'ayem cu'une”, xi' me ta stojolic. 10Ya calbeyex te jich nix bin nax yo'tanic te ch'ul abatetic yu'un Dios ta ch'ulchan teme ya sujt'es yo'tan yu'un smul te jtul jmulawile —xi' te Jesuse. 11Soc jich la yal xan te Jesuse: —Ay jtul winic te ay cheb snich'nabe. 12Te ijts'inale la yalbey te state: “Jtat, ya me awac'bonix te jayeb abiluc te ya xc'ot ta jwenta awu'une”, xi' ta stojol te state. Jich te state la spucbey sbiluc soc sq'uinal juju-jtul te snich'nabe. 13“Che'oxeb c'aal ta patil, te ijts'inale la xchon spisil te bila ac'bot ta swentae. Jich bajt' ta c'ubul ta yan lum. Tey c'o slajin spisil a te sbiluque, ma'yuquix bila yich'oj jilel. 14Te c'alal lajix yu'un spisil a te staq'uine, patil tal bayal wi'nal tey a ta bay te lume. Jich la sta bayal swocol, ta scaj te ma'yuc bila ayix yu'une. 15Jich ba sc'an yat'el ta stojol jtul winic ta bay te lume. Ja' la sticun bael ta sq'uinal ta smac'linel chitam. 16Yo'tan nax c'an snojes xch'ujt' a te sit te' te la swe'elin te chitametique, ja'uc me to, ma ba ac'bot. 17“Ta patil la snop ta yo'tan, jich la yal: “Te jtate ay bayal yaj'at'el soc ay bayal swe'elic. Yan te jo'one, ya xlajon ta wi'nal li'to. 18Ya me sujt'on bael ta sna te jtate. Jich me ya xc'o calbey: ‘Jtat, jtaoj jmul ta stojol Dios soc ta atojol uuc. 19Ma spasix te ya ap'ison ta anich'ane. Jich ac'a c'ouconix awu'un te bit'il awaj'at'el’, ya me cut” xi' ta snopel. 20Jich jajch' ta beel. Sujt' bael ta bay sna te state. “C'ubul to ay tel a te ilot yu'un te state. C'uxbaj ta yo'tan. Animal ba sta tel ta be. La smey soc la sbujts'iy. 21Te quereme la yalbey te state: “Jtat, jtaoj jmul ta stojol Dios soc ta atojol uuc. Ma spasix te ya ap'ison ta anich'ane”, xi' ta stojol te state. 22“Ja'uc me to, te state la yalbey mandal ta ora te abatetic yu'une: “Ich'bonic tel ta ora te lequil c'u'ule. Ac'bonic slap a. Ac'bonic xch'ocow ta sc'ab, soc ac'bonic xanab slap. 23Soc ic'aic tel te jujp'en tat wacaxe, milaic jti'tic, yu'un ya me jpastic q'uin. 24Melel in jnich'an to, lajemix la caiy, ja'uc me to, cha'cuxemix”, xi' te state. Jich och spasic te q'uine. 25“Te banquilale baem ta c'altic a. Te c'alal sujt' tele, ma to xc'ot ta sna a te la yaiy stojol q'uin soc ajc'ot. 26Jich la yic' tel jtul te abatetique. La sjojc'obey yaiy te bi swentailuc te q'uine. 27La yal te abate: “Yu'un ja' sujt'ix tel te awijts'ine. Jich te atate bin nax yo'tan la yac' ta milel jujp'en tat wacax, yu'un lec sujt' tel te awijts'ine”, xi' te abate. 28“Te banquilale ilin yo'tan yu'un. Ma la sc'an te ya x'och bael ta nae. Jich te state loc' tel. Tal yutsil-c'opon te snich'an te yacuc ochuc baele. 29Te banquilale la yalbey te state: “Ayix bayal ja'wil te jch'uunejbat amandale. Ma'yuc bay jch'ayojbat amandal ni junuc buelta. Ja'uc me to, ma'yuc bay la awac'bon ni cojt'uc tentsun te ya jpas q'uin soc te jo'taque. 30Yan te c'alal sujt' tel te alequil-nich'an te la sjowil-lajinbat ataq'uin ta jmulawil-ants, ja' la amilbeyix jujp'en tat wacax stuquel”, xi' te banquilale. 31“Te state la yalbey: “Jnich'an, spisil ora joinejat. Spisil te bila ay cu'une, ja' awu'un ta spisil uuc. 32Ja'uc me to, snujp' te ya jpastic q'uine, yu'un ay sbujts' co'tantic. Melel te awijts'ine lajemix, ja'uc me to, cha'cuxemix. Jc'axel ch'ayem ta jc'op, ja'uc me to, la jtaix”, xi' te state —xi' ta yalel te Jesuse.


Copyright
Learn More

will be added

X\