San Lucas 12

1Jich ora la stsob sbaic tel ta stojol Jesús bayal ta jmil ants-winiquetic, stenten nax sbaic ta stojol. Jich te Jesuse, neel la yalbey te jnopojeletic yu'une: —Tsajtaya me abaic ta swenta te levadura yu'un te fariseoetique, ja' bi, ja' te bit'il cha'lam te yo'tanique. 2Melel ma'yuc bila nac'al te ma xyich' chicnantesele, soc ma'yuc bila muquen te ma x'ac'ot ta na'el stojole. 3Spisil bila awaloj ta ijc' q'uinal, ya me x'aiyot stojol ta saquil q'uinal. Melel te bila muquen la awal ta yutil anae, ja' me ya yich' awtayel ta sbaba naetic. 4“Te bit'il jun ayotique, yo'tic ya calbeyex: Ma me ja'uc x'axi'ic te mach'a ya smilbeyex abaq'uetalic te patil ma'yuc bi ya xju' ya spasbeyex xane. 5Ya calbeyex te mach'a ya sc'an ya axi'ique: Ja' me x'axi'ic te mach'a ya xju' yu'un ya smilat soc te ay yat'el te ya xju' ya yaq'uex ta bay yawil c'ajc' te ma xtup' sbajt'el q'uinale. Ja' me x'axi'ic stuquel. 6“¿Ma bal cha'sejbuc ch'in taq'uin stojol ta manel ta ch'iwich te jo'cojt' ch'in mutetique? Ja'uc me to, ni cojt'uc ch'ayem ta yo'tan te Diose. 7Ja' nanix jich uuc te ja'exe, asta te stsotsil ajolique, spisil ajtaybil yu'un ta lijq'uilijc'. Jich yu'un ma me xiwex. C'ax jich ay ac'oplalic a te bit'il ay sc'oplal bayal ta jcojt' te ch'in mutetique. 8“Ya calbeyex, spisil mach'a jamal ya yal ta stojol ants-winiquetic te bit'il xch'uunejone, jich uuc te Nich'anile jamal me ya yal ta stojol te ch'ul abatetic yu'un Dios te bit'il ay ta swentae. 9Yan te mach'a ya smucon ta yo'tan ta stojol te ants-winiquetique, ja' nix jich mucbil ya xc'ot ta stojol te ch'ul abatetic yu'un te Diose. 10“Teme ay mach'a ya sbolc'optay te Nich'anile, ya xju' ya spasbot perdón yu'un. Yan te mach'a ya stoybac'optay te Ch'ul Espiritue, ma xju' ya spasbot perdón yu'un stuquel. 11“Te c'alal ya x'ic'otex bael ta sinagogaetic, soc teme ya xtec'anotex ta stojol jtuuneletic soc ta stojol te ajwaliletique, ma me xjajch' amel awo'tanic yu'un te bit'il ya sc'an ya asujt'esbeyic te sc'opique soc te bila lec ya xc'o awalique. 12Melel te c'alal ya sta yorail te ya xc'opojexe, te Ch'ul Espíritu ya me yac'beyex ana'ic te bila ya xc'o awalique —xi' te Jesuse. 13Ay jtul winic ta yolil te ants-winiquetic, te jich la yalbey te Jesuse: —Maestro, albeya te jbanquil te ya yac'bon oliluc uuc te bila la yijq'uitaybon jilel soc te jtate —xi'. 14Jesús la yalbey: —Winic, ¿yu'un bal ay mach'a la yac'bon cat'el ta chajbanwanej ta spuquel sbiluc te atate? —xi'. 15Jich la yalbey yaiyic: —Tsajtaya me abaic. Ma me xawac' bic'tajuc awo'tanic yu'un te c'ulejalile, melel ma ja'uc ya xcuxinat yu'un teme ay bayal te bila ay awu'une —xi' te Jesuse. 16Soc la yalbey yaiyic seña-c'op: —Ay jtul jc'ulej-winic te bayal sitin te sc'ale. 17Jich jajch' snop ta yo'tan: “¿Bi ya sc'an ya jpas in to? Melel ma'yuc banti ya stac' ya jq'uejix te sit cawal-jts'unube”, xi' ta snopel. 18Nojp yu'un ts'iin: “Ta ora to ya jna'ix te bila ya jpase. Ya me jin spisil te snail cawal-jts'unube. Ya me jpas muc'. Tey me ya jq'uej spisil a soc spisil te bila ay cu'une. 19Ya me calbey te jch'ulele: ‘Jch'ulel, bayalix te jbiluctic te ya xtuun cu'untic bayal ja'wile. Ja' lec quich'tic lewa. We'ucotic, uch'ajucotic, bujts'najuc co'tantic yu'un”, xi' ta yo'tan. 20Jich albot yu'un te Diose: “Winic, ma x'ana' q'uinal. Ja' in ajc'ubal to ya me jc'anbat ach'ulel. Spisil te bila q'uejbil awu'une, ¿mach'a me ya yich'bat jilel?”, xi' te Diose. 21Ya calbeyex te jich ya xc'ot te mach'a ja' nax ya xbajt' ta yo'tan stsobel te sc'ulejal ya xtuun yu'un stuquele, soc te ma'yuc sc'ulejal ya xc'ot ta stojol te Diose —xi' te Jesuse. 22Soc jich la yalbey xan te jnopojeletic yu'un te Jesuse: —Ja' swentail te ya calbeyex: Ma me ja'uc ya xbajt' ta awo'tanic te bit'il ya xcuxinex ta balumilale, jich bit'il te ya xwe'exe soc te ya ata ac'u'-apaq'uique. 23Melel ma ja'uc bayal sc'oplal te awe'elique; ja' cajal sc'oplal te acuxlejalique. Soc ma ja'uc bayal sc'oplal te ac'u'-apaq'uique; ja' cajal sc'oplal te abaq'uetalique. 24Ilawilic te bit'il cuxulic te jojetique. Ma xyaiyic awal, soc ma xyaiyic c'ajoj, soc ma'yuc snail yiximic, soc ma'yuc snail sbiluquic. Ja' mac'linbilic yu'un te Diose. Yan te ja'exe, c'ax jich ac'oplalic te bit'il ay sc'oplal te mutetique. 25Manchuc me bayal ya x'ayan awo'tanic yu'un te bit'il comol winicate, ¿ay bal ya xju' awu'unic te ya anajt'ubtes aba junuc xujcubil? 26Teme ma xju' ta pasel awu'unic te bila peq'uel sc'oplale, ¿bistuc te ja' ya xbajt' ta awo'tan te yantic xane? 27“Ilawilic te bit'il ya xch'i te ja'mal nichimetique. Ma x'at'ejic, soc ma sjal sc'u'-spaq'uic. Ya calbeyex te ma la spajbey yutsilal junuc nichim te sc'u'-spac' te muc' ajwalil Salomón, manchuc teme jelawen yutsilale. 28Melel teme Dios la yac' te jich ay yutsilal te ja'mal nichimetic te jun nax c'aal cuxule soc te pajel ya yich' chiq'uel ta yawil c'ajq'ue, ¿yu'un bal ma c'axemuc to xan jich ya sc'u'ultesex te ja'exe? ¿Bistuc te ma'yuc xch'uunjel awo'tanique? 29Jich yu'un te ja'exe ma me ja'uc ya xbajt' ta awo'tanic sleel te bit'il ya xwe'ex-x'uch'ajexe. 30Melel ja' nax baem yo'tanic ta sleel stuquel te ants-winiquetic ta balumilale. Yan te ja'exe ay Atatic te sna'oj spisil te bila ya xtuun awu'unique. 31Ja' me xaleic neeluc te bit'il ay ta ajwalinel te Diose. Jich me ya yesmantesbeyex spisil te bila ya xtuun awu'unique. 32“Ma me xiwex ja'ex te chijex cu'un te ma tsoboluquexe. Melel te Jtatique bin nax yo'tan ya yaq'uex tey a ta banti ay ta ajwalinel te Diose. 33Chonaic te bila ay awu'unique, soc q'uebanbeyaic te me'baetique. Leaic yawil ac'ulejalic te ma xbolobe. Q'uejaic ta ch'ulchan te ac'ulejalic te stalel ma xlaje, te bay ma x'och j'elec' soc te bay ma xlaj ta joch'e. 34Melel ta banti ay te ac'ulejalique, tey ay a te awo'tanique. 35“Chapaluquex me, chuculuc me ach'ujt'ic, soc yacuc me ta tilel ac'ajq'uic. 36Jichuquex me te bit'il abatetic te chapalic ta smaliyel te ya sujt' tel te yajwalic te baem ta yilel nujbinel te ora ya sjambeyic te c'alal ya xjul stij te ti'naile. 37Bin nax me yutsil te abatetic te wiq'uil sitic ya xjul taotuc yu'un te yajwalique. Jamal ya calbeyex, te yajwalique ya me xchuc xch'ujt' te ya yac' sba ta abatinel yu'unique. Ya yic' tel ta smesa, soc ya yac'bey swe'elic. 38Chican bi ora te ya xjule, teme olil ajc'ubal o teme nopol sacubel q'uinal, teme wiq'uil sitic ya xjul sta te abatetic yu'une, bin nax me yutsil sc'oplalic yu'un te bit'il lequil abatetique. 39Na'aic me stojol in to: Te yacuc sna' te yajwal na te bi ora ya xtal te j'eleq'ue, wiq'uil me sit ta smaliyel te jichuque, jich ma xyac' loq'uel ta elc'anel te bila ay yu'une. 40Ja' nanix jich te ja'exe, chapaluquex me ta maliywanej, melel ma na'biluc awu'unic te bi ora ya xtal te Nich'anile —xi' te Jesuse. 41Te Pedro la sjojc'obey te Jesuse: —Cajwal, ¿jo'otic nax bal ya awalbotic in seña-c'op to? ¿O ja' bal ya awalbey ta spisil uuc te yantique? —xi'. 42Jich la yal te Cajwaltique: —¿Mach'a a te mayordomo te jun yo'tan soc te ay sp'ijile? Ja' te ya x'ac'bot swentain te abatetic yu'un te yajwale soc te ya spucbey te bila ya xtuun yu'unic te jujun buelta te ya yich'ique. 43Bin nax me yutsil te winic teme jich yac ta spasel a te c'alal ya xtal te yajwale. 44Melel xcalbeyex, te yajwale ya me yac'bey swentainbey spisil te bila ay yu'une. 45Yan teme ya xcaj yal ta yo'tane: “Te Cajwal ma xtal ta ora”, teme xie, soc teme ya xjajch' yuts'in te abatetic soc te criadaetique, soc teme ya xjajch' ta we'el-uch'ajel soc ta yacubel, 46jich te yajwale ya me xtal ta bi c'aalil soc te bi ora ch'ayem stsa ta maliywanej a te abate. Ya me yac'bey buen tulan castigo. Tey me ya xbajt' a te banti ya xbajt' te mach'atic ma ba xch'uunejic te Diose. 47“Jich te abat te sna'oj te bila la sc'an yo'tan te yajwale, te ma la xchajban sba soc te ma la spas te bila la sc'ane, ya me x'ac'bot bayal ta jyalel majel. 48Yan te abat te ma ba sna'oj te bila la sc'an yo'tan te yajwale, te la spas te bila ay castigo yu'une, jteb nax majel ya x'ac'bot ta swenta stuquel. Te mach'a bayal bila ya x'ac'bote, bayal me te bila ya xc'anbote; soc uuc te mach'a bayal bila ya x'ac'bot swentaine, c'ax jich ya xc'anbot sujt'el stuquel. 49“Tal cac' tiluc c'ajc' ta balumilal. Co'tanuc te tilemixe. 50Ja'uc me to, puersa neel ya xtal tulan woclajel ta jtojol. Ayix jwocol ya caiy te bit'il yacon ta smaliyel te ya xc'ot ta pasele. 51¿Acuyojic bal te tal cac' lamajuc q'uinal ta balumilale? Ban c'an jichuc. Tal cac' scontroin sbaic te ants-winiquetique. 52Jich yu'un ta ora bael to, ta ba ay jo'tul te jun nax snaique, ya me sjin sbaic. Ya me xjajch' scontroin sbaic soc te cha'tule soc te oxtule. 53Te tatile ya scontroin te snich'ane; te nich'anile ya scontroin te state. Te me'ile ya scontroin te yantsil-ale; te yantsil-ale ya scontroin te sme'e. Te jme'tique ya scontroin te yalibe; in te alibale ya scontroin te yalib-me'ele —xi' te Jesuse. 54Te Jesús jich la yalbey yaiyic te ants-winiquetique: —C'alal ya awilic te ay tocal ta stojol smalib c'aal, jich ya awalic te ya xtal ja'ale, soc jich ya xc'ot ta pasel. 55Soc te c'alal ya xtal ic' ta stojol sur, jich ya awalic: “C'ux me c'aal ya caiytic yo'tic”, xaex yu'un, soc jich nix ya xc'ot ta pasel. 56¡Cha'lam awo'tanic te ja'exe! Teme ya ana'ic stsajtayel bi yilel te q'uinale, ¿bit'il ay a te ya awalic te ma x'ana'ic stsajtayel te bila yaquix ta c'oel ta pasel ta ora to? 57“¿Bi yu'un ma x'atsajtay aba atuquel yu'un te bila toj ta pasele? 58Teme ay mach'a ya yic'at bael ta bay te chajbajibale, chajbana aba soc ta ora te jun awo'tan ya xc'oat soque, swenta yu'un ma ba ya yac'at ta sc'ab te juez. Melel te juez ya me yac'at ta sc'ab te comandante te ya yac'at ochel ta chucjibale. 59Ya calbat te ma xloc'at tey a, ja' to teme ts'acal la atoj jilele —xi' te Jesuse.


Copyrighted Material
Learn More

will be added

X\