San Lucas 10

1Ta patil te Cajwaltic la stsa xan lajuneb xchanwinic (70) ta jtul winiquetic. Che'cheb la sticun bael ta juju-jpam lum soc ta juju-jsejp q'uinal ta banti ya xc'ax bael ta patile. 2Jich la yalbey yaiyic: —Bayal me te c'ajoje. Yan te j'at'eletique, ma'yuc bayalic. Jich yu'un, albeyaic wocol te yajwal at'el te ya sticun ta at'el te j'at'eletique. 3Baanic me jiche. C'otuc me ta awo'tanic te bit'il jich c'oemex te bit'il alal chijetic te ya jticunex bael ta bay yolil te jti'awal ja'mal ts'i'etique. 4Ma me x'awich'ic bael yawil ataq'uinic soc achojaq'uic soc ajel-xanabic. Soc ma me xjalajex ta aiyej ta pat-o'tan ta be. 5Te bay nailuc te ya x'ochexe, patbeya yo'tan neeluc. Jich me xawalic: “Lamaluc me q'uinal ya awaiy ta anaic” xaex me. 6Teme ay tey a te mach'a te ya sle te lamal q'uinale, lamal me q'uinal ya yaiy ya xc'ot ta awentaic. Yan teme ma'yuc tey a, ya me sujt' ta awentaic te lamal q'uinal la awalbey yaiyique. 7Tey me x'ainex a ta banti na ya xc'oexe. Junuc me awo'tanic xwe'ex-x'uch'ajex tey a, chican te bila ya yac'beyexe. Te mach'a ya x'at'eje, ya me yich' stojol sc'ab yu'un. Ma me xmelmonuquex ta naetic. 8Ta bay lum te ya yiq'uexe, junuc me awo'tan xawe'elinic te bila ya yac'beyexe. 9Lamantesbeya xchamelic te jich yipal jchameletic ya ataic tey a. Soc jich me xawalbey yaiyic: “Nopol ya xjajch'ix ta atojolic te bit'il ay ta ajwalinel te Diose”, xaex me. 10Yan ta bay lum te ma la snajc'anexe, loc'anic bael ta bay calleetic yu'unic. Jich me xawalic: 11“Te stanul alumalic te ay ta cacantique, ya me jtijt'antic jilel swenta seña te ma ja'uc ta jwentatic te ma la ach'uunique. Ja'uc me to, na'aic me stojol te bit'il nopol ya xjajch'ix ta ajwalinel te Diose”, ya me awutic. 12Ya calbeyex te c'alal ya sta yorail ya yich' castigo in lum to, c'ax jich castigo ya yich' a te bit'il lum Sodoma. 13“¡Lum Corazín ya me awil awocol! ¡Lum Betsaida ya me awil awocol uuc! Melel te teyuc la yich' pasel jchajp at'eliletic ta bay lum Tiro soc ta lum Sidón jich bit'il te la yich'ix pasel ta atojolique, ora la sujt'es yo'tanic te jichuque. La me slapic ch'ixal pac', soc la me snajc'an sbaic ta stanul c'ajc' ta smelel yo'tanic te jichuque. 14Ja'uc me to, te c'alal ya sta yorail yu'un te Dios te ya yilbeyex awat'elique, bayal me castigo ya awich'ic. Yan te lum Tiro soc te lum Sidón, ma sta jich castigo ya yich' stuquelic. 15Jichat uuc lum Capernaúm te atoyoj abaic c'alal ta ch'ulchan, ja'uc me to, ya me xch'ojotat coel c'alal ta infierno. 16“Te mach'atic ya yaiybeyex stojol te ac'opique, jo'on la yaiybonic stojol jc'op abi. Te mach'atic ya sp'ajexe, jo'on la sp'ajonic abi. Teme ya sp'ajonic te jo'one, ja' ya sp'ajic uuc te Mach'a sticunejon tele —xi' te Jesuse. 17Te lajuneb xchanwinic (70) ta jtule, ay bayal sbujts' yo'tanic te c'alal sujt'ic tele. Jich la yalic: —Cajwal, asta te pucujetic la xch'uunbotic jmandaltic ta swenta abiil —xiic julel. 18La yal te Jesuse: —Jich na'ax, melel yacon ta yilel te ch'ay coel tel ta ch'ulchan te Satanase. Jich la quil te bit'il xlememet ya xco tel te chawuque. 19Jo'on la cac'beyex tulan awat'elic ta xpech'el ta teq'uel te chanetique soc te tsequetique, soc cac'ojbeyex te ya xju' awu'unic stsalel spisil yu'el te cajcontrotique. Jich ma'yuc bila ya yuts'inex xan xujt'uc. 20Ja'uc me to, ma me ja'uc nax ay sbujts' awo'tanic yu'un te bit'il ya xch'uunbeyex amandalic te pucujetique. Ja'uc me ay bayal sbujts' awo'tanic yu'un te bit'il ts'ibubilix abiilic ta bay te ch'ulchane —xi' te Jesuse. 21Jich ora te ay bayal sbujts' yo'tan Jesús ta swenta te Ch'ul Espiritue. Jich la yal: —Jtat, te yajwalat ch'ulchan balumilale, jelawen yutsil awo'tan te ja' la awac'bey sna'ic stojol spisil in to te mach'atic peq'uel ayique te ma ja'uc la awac'bey sna'ic stojol te mach'atic ay sp'ijilique soc te ya sna'ic q'uinale. Jich, Jtat, melel jich la sc'an awo'tan atuquel —xi'. 22Soc la yal xan: —Te Jtate yac'ojbon ta jc'ab spisil te bitic aye. Ma'yuc mach'a ya sna' stojol te mach'a a te Nich'anile. Ja' nax ya sna' stojol te Tatile. Soc ma'yuc mach'a ya sna' stojol te mach'a a te Tatile. Ja' nax ya sna' stuquel te Nich'anile, soc uuc te jayeb mach'a ya yac'bey sna'bey sbae —xi' te Jesuse. 23Jich la sujt'es sba ta yilel te jnopojeletic yu'une, soc la yalbey yaiyic ta stuquelic nax: —Bin nax me yutsilic te mach'atic ya yilic ta sitic te bila yacalex ta yilele. 24Melel xcalbeyex, ay tsobol j'alwanejetic yu'un te Diose soc tsobol muc' ajwaliletic te yo'tanuc lajuc yilic te bila yacalex ta yilel te ja'exe, ja'uc me to, ma la yilic. Yo'tanuc lajuc yaiyic stojol te bila yacalex ta yaiyel stojol te ja'exe, ja'uc me to, ma la yaiyic stojol stuquelic —xi' te Jesuse. 25Ay jtul maestro yu'un te mandalile, la stejc'an sba jajch'el sc'opon te Jesuse, yu'un la sc'an yilbey yo'tan. Jich la yal: —Maestro, ¿bila lec ya sc'an ya jpas te ya xcuxinucon sbajt'el q'uinal yu'une? —xi'. 26La yal te Jesuse: —¿Bila a te ts'ibubil ta mandalile? ¿Bi xi' awaiy te ya awile? —xi'. 27La yal te maestro yu'un te mandalile: —Te ts'ibubil jilele, jich ay: “C'ux me x'awaiy ta awo'tan te Cajwaltic Diose soc spisil awo'tan, soc spisil ach'ulel, soc spisil awip, soc spisil ap'ijil. Soc c'ux me x'awaiy te apat-axujq'ue, jich nix te bit'il c'ux ya awaiy aba atuquel te ja'ate”, te xie —xi'. 28La yal te Jesuse: —La ana' sujt'esel ya caiy. Jich me xba apas. Jich me ya xcuxinat sbajt'el q'uinal —xi'. 29Te maestro yu'un te mandalile, ma la sc'an teme ma'yuc sc'oplal ya xc'ot te bila la sjojc'oye. Jich la sjojc'o xan: —¿Mach'a a te jpat-jxujq'ue? —xi'. 30Te Jesús la yalbey: —Ay jtul winic coj tel ta Jerusalén. C'an bajt'uc ta lum Jericó, ja'uc me to, tsacot yu'un j'eleq'uetic ta be. Jich la spojbeyic spisil te bila ay yu'une soc te sc'u' slapoje. Lajelix jilel yu'unic. Jich bajt'ic te j'eleq'uetique. 31Ja'uc me to, ay jtul sacerdote c'ax tey a ta banti chawale. C'alal la yil, la sc'al sba c'axel. Bajt'. 32Soc ay jtul levita-winic te c'ax tey a ta banti chawale. Ja' nanix jich te c'alal la yile, la sc'al sba c'axel uuc. Bajt'. 33Ja'uc me to, ay tal jtul Samaria-winic te yac ta beel tel ta be uuc. Te c'alal la yil te winique, la sna'bey yo'bolil sba. 34Noptsaj tel ta stojol. La xpoxtaybey yejch'en ta aceite soc ta vino soc la spotsbey. Soc la smojt'es ta sburro. Jich la yic' bael ta bay wayibal-na. Tey la scanantay a. 35Ta yan c'aal te c'alal bajt' te Samaria-winique, la sloq'ues jilel cheb denario-taq'uin te la yac'bey jilel te yajwal nae. Soc jich la yalbey xan: “Canantaybon in winic to. Teme ay to xan taq'uin ya xlaj awu'une, ya me jsujt'esbat te c'alal ya sujt'on tele”, xi'. 36¿Mach'a me awaiy a ta yoxebalic te mero spat-xujc' c'ot soc te winic te tsacot yu'un te j'eleq'uetique? —xi' te Jesuse. 37Te maestro yu'un te mandalile jich la yal: —Ja' te mach'a la xc'uxtaye —xi'. Te Jesús la yalbey te maestroe: —Jich me xba apas uuc te ja'ate —xi'. 38Te bit'il yac ta beel te Jesuse, c'ot ta bay ch'in lum. Ay jtul ants tey a te Marta sbiil te la yic' ochel ta snae. 39Te Martae ay yijts'in María sbiil te tal snajc'an sba ta bay nopol yacan te Jesuse, yu'un ya yaiybey stojol te sc'ope. 40Yan te Martae ja' nax bajt' ta yo'tan sna'el spisil te bila ya xchajbane. Jich tal yalbey te Jesuse: —Cajwal, ¿ma bal ya awil te ma ba ya scoltayon ta spasel we'elil te quijts'ine? Albon me te yacuc scoltayone —xi'. 41Jesús la yalbey: —Marta, Marta, ja' nax baem ta awo'tan spasel spisil te bila pasel ya sc'ane. Ay awocol yu'un. 42Jun nax te bila ya sc'ane. Yan te María, la stsa stuquel te bila leque. Ma'yuc mach'a ya xpojbot yu'un jtuluc —xi'.


Copyright
Learn More

will be added

X\