San Juan 9

1Te c'alal yac ta c'axel bael te Jesuse, la yil jtul winic te ma'sit ta yainab toe. 2Te jnopojeletic yu'une la sjojc'oyic: —Maestro, ¿mach'a smul te ma'sit ayin in winic to? ¿Scaj bal smul sme'-stat, o scaj bal smul stuquel? —xiic. 3La yal te Jesuse: —Ma scajuc smul, soc ma scajuc smul sme'-stat. Yu'un nax ya x'ac'ot ta ilel yat'el Dios ta swenta. 4Te bit'il ayotic to ta c'aleltique, puersa me ya jpasbey yat'el te mach'a la sticunon tele. Yu'un ya xtal te ajc'ubale, c'alal ma'yuquix mach'a ya xju' ya x'at'ej. 5Te bit'il ayon to ta balumilale, sacuben q'uinal cu'un ta stojolic te mach'atic ayic ta balumilale —xi'. 6Lajel to yo'tan ta yalel a, la stubtay te lume. La spas ta ajch'al te ya'lel sti'e. La sbalanbey ta sit te ma'site. 7Jich la yalbey: —Baan, poca asit ta bay estanqueil ja' te Siloé sbiile —la yut. (Te Siloé, “ticunbil”, xi' c'oem.) Te ma'site ba spoc te site. Te c'alal sujt' baele, ya yilix te q'uinale. 8Te mach'atic nopol ay soque soc te mach'atic yilojic te bit'il ma'sit ta neelale, jich la yalic: —¿Ma bal ja'uc in to te ya snajc'an sba ta c'anbajele? —xiic. 9Ay la yalic: —Ja' na'ax —xiic. Soc ay la yalic: —Ma ja'uc. Ja' nax te col pajaluc soc yilele —xiic. Te winique la yal sba stuquel: —Te bit'il ya awalique jo'on nix —xi'. 10Jich yu'un la sjojc'obeyic: —¿Bit'il jam te asite? —xiic. 11La yal te winique: —Jtul winic te Jesús sbiile, la spas ajch'al. La sbalanbon ta jsit, soc la yalbon: “Baan ta bay estanqueil ja' te Siloé sbiile. Baan, poca asit”, la yuton. Jich boon. C'alal la jpoc te jsite, jich la quil te q'uinale —xi'. 12Jich la sjojc'obeyic xan: —¿Banti ay te winic ya awale? —xiic. La yal te winique: —Ma jna' te banti aye —xi'. 13Jich la yiq'uic bael ta stojol fariseoetic te winic te jambot site. 14Ja'uc me to, ja' sc'aalelal cux-o'tan a, te la spas ajch'al te Jesuse soc te la sjambey sit te ma'site. 15Jich yu'un te fariseoetique la sjojc'obeyic uuc te bit'il la yilix te q'uinale. La yal te winique: —La sbalanbon ajch'al ta jsit. La jpoc. Jich jam te jsite —xi'. 16Ay cha'oxtul te fariseoetic la yalique: —Ma ba talem ta stojol Dios me to, melel ma scanantay te bi c'aalil swenta cux-o'tan —xiic. Soc ay la yalic: —¿Ya bal c'an ju'uc yu'un spasel jtul jmulawil in señailetic to? —xiic. Jich ma junuc yo'tan sbaic yu'un. 17Jich la sjojc'obeyic xan te winique: —Ja'xan te ja'ate ¿bi xaat yu'un te winic te la sjambat asite? —xiic. La yal te winique: —Ya cal te jo'one j'alwanej yu'un Dios —xi'. 18Te judioetique ma xch'uun yo'tanic teme yu'un nanix ma'sit ta neelal te winic te bit'il ya yilix q'uinale. Jich la sticunic ta iq'uel te sme'-state. 19La sjojc'obeyic: —¿Ja' bal anich'an in to te ma'sit ta ac'opic te c'alal ayine? ¿Bit'il a te ya yilix q'uinale? —xiic. 20La yal te sme'-state: —Ja'. Jna'ojtic te ja' cal-jnich'antic in to te ma'sit c'alal ayine. 21Ja'uc me to, ma jna'tic te bit'il ay te ya yilix q'uinale. Soc ma jna'tic xaal te mach'a jambot sit yu'une. Jojc'obeya awaiyic stuquel, melel muc'ul winiquix. Ac'a yalbat stuquel —xiic. 22Jich la yal te sme'-state scaj te la xi'ic te judioetique. Melel chajbanbilix yu'unic te ya yich' loq'uesel ta sinagoga chican mach'a a te ya yal te ja' Cristo te Jesuse. 23Ja' swentail te la yalic te sme'-state: “Jojc'obeya awaiyic stuquel melel muc'ul winiquix”, te xie. 24Jich yu'un te judioetique la xcha'yiq'uic xan tel te winic te ma'sit ta neelale. Jich la yalbeyic: —Albotic ta jamal ta stojol Dios te mach'a la sjambat te asite, yu'un jna'ojtic stojol jo'otic te jmulawil te winic ya awale —xiic. 25La yal te winique: —Te jo'one ma jna' teme jmulawile, o ma jmulawiluque. Ja' nax ya jna' te ma'siton ta neelale, ja'uc me to, ya quilix q'uinal ta ora to —xi'. 26La xcha'jojc'obeyic xan: —¿Bi la yut la sjambat te asite? —xiic. 27Te winique la yal: —La calbeyexix awaiyic. Ma x'ac'an awaiyic stojol te bi ya cale. ¿Bistuc awu'unic te ya calbeyex xane? ¿Yu'un bal ya ac'anic te ya x'ochex ta jnopojel yu'un? —xi'. 28Jich caj yutic te winique, jich la yalbeyic: —Te ja'ate yaj-nopojelatix atuquel. Yan te jo'otique jnopojelotic yu'un Moisés. 29Jna'ojtic stojol jo'otic te c'oponot yu'un Dios te Moisese. Yan te mach'a ya awale, ni ya jna'tic stojol xujt'uc te banti taleme —xiic. 30La yal te winique: —Jchajp nax ya caiy a te ma x'ana'ic stojol ja'ex te bay taleme, melel la sjambonix te jsite. 31Jna'ojtic stojol ta jpisiltic te Dios ma xyaiybey stojol sc'op te jmulawiletique. Ja' nax ya yaiybey stojol sc'op te mach'atic jun yo'tanic ta stojole soc te ya spas te bila ya sc'an yo'tane. 32Ta namey q'uinal tel ma'yuc bay chicnaj ta alel sc'oplal jtuluc te ya xjam sit te mach'a ma'sit ya x'ayine. 33Te manchuc talemuc ta stojol Dios te winique xujt' ma'yuc bi ya xju' yu'un spasel te jichuque —xi'. 34La yalbeyic: —Mero jmulawilat ja' to c'alal ayinate. ¿Ja' bal c'an ap'ijubtesotic? —la yutic. Jich la sloq'uesic ta sinagoga. 35La yaiy stojol Jesús te la sloq'uesiquix te mach'a ma'sit ta neelale. La sta sba soc te winique. Jich la yalbey: —¿Ya bal ach'uun te Snich'an Diose? —xi'. 36La yal te winique: —Cajwal, albon caiy te mach'a a. Ya me jch'uun —xi'. 37Jesús la yalbey: —Awilojix. Jo'on abi te yacotic ta aiyej —xi'. 38La yal te winique: —Ya jch'uunat, Cajwal —xi', soc la squejan sba ta stojol. 39La yal te Jesuse: —Talemonix li' ta balumilal to swenta yu'un ya xchicnaj te mach'a leque soc te mach'a amene. Jich yu'un te mach'atic ma xyilic q'uinale, ya me xjam sitic. Yan te mach'atic ya yilic q'uinal ta sc'opique, ya me xc'atp'ujic ta ma'sit —xi'. 40La yaiyic stojol cha'oxtul te fariseoetic te sjoinejic tey a. Jich la yalbeyic: —¿Yu'un bal ma'sitotic te jo'otique? —xiic. 41Jesús la yalbey yaiyic: —Te yu'unuc ma'situquexe, ma'yuc amulic te jichuque. Ja'uc me to, ya awalic te jamal asitique, ja' ma xch'ay amulic yu'un —xi' te Jesuse.


Copyright
Learn More

will be added

X\