San Juan 3

1Ay jtul fariseo Nicodemo sbiil, ja' principal yu'un te judioetique. 2Tal sc'opon ta ajc'ubal te Jesuse. Jich jajch' yalbey: —Maestro, jna'oj stojol te bit'il ticunbilat tel ta p'ijubteswanej yu'un te Diose, melel ma'yuc mach'a ya xju' yu'un spasel te jchajp at'eliletic te yacat ta spasel te manchuc sjoinejucat te Diose —xi'. 3Te Jesús jich la yalbey: —Jamal ya calbat, ja' te mach'a ma xcha'ayin xan, ma xju' ya yil te bit'il ay ta ajwalinel te Diose —xi'. 4La sjojc'o te Nicodemoe: —¿Bit'il c'an cha'ayinuc xan te winic te mamalixe? ¿Ya to bal xju' ya x'och ta xch'ujt' sme' te ya xcha'ayin xane? —xi'. 5Te Jesús jich la yal: —Jamal ya calbat, ja' te mach'a ma x'ayin ta swenta ja' soc ta swenta Espíritu, ma xju' ya x'och tey a ta banti ay ta ajwalinel te Diose. 6Te mach'a ayinem nax ta swenta baq'uet, ch'ich'-baq'uet nanix abi. Yan te mach'a ayinem ta swenta te Espíritu, yich'ojbey stalel te Espiritue. 7Ma me q'uejeluc nax q'uinal ya awaiy yu'un, te la calbat te ya sc'an ya xcha'ayinate. 8Te iq'ue bayuc nax ya xbeen. Ya awaiy stojol te xaxaxet ya xbeene, ja'uc me to, ma x'ana' te banti ya xtale, soc ma x'ana' te banti ya xbajt'e. Jich c'oem spisilic te mach'atic ayinemic ta swenta te Espiritue —xi'. 9Te Nicodemo la xcha'jojc'obey xan: —¿Bit'il ya xc'ot ta pasel in to? —xi'. 10La yal te Jesuse: —Te ja'ate maestroat yu'un te lum Israel, ja'uc me to, ¿ma x'ana' stojol te bila ya calbate? 11Jamal ya calbat, ja' ya caltic te bila jna'ojtique, soc te bila quilojtique; ja'uc me to, ma xc'ot ta awo'tan te bila ya caltique. 12Teme ma xach'uun te bila swenta nax balumilal te la calbate, ¿ja'uc to bal c'an ach'uun teme ya calbat te bila swenta te ch'ulchane? 13“Ma'yuc mach'a moem bael ta ch'ulchan. Ja' nax stuquel te mach'a coem tel ta ch'ulchane, ja' te Nich'anil te talem ta ch'ulchane. 14Soc jich te bit'il la sjijp'an jti'awal chan ta bay jochol taquin q'uinal te Moisese, ja' nanix jich ya yich' jijp'anel uuc te Nich'anile, 15swenta yu'un spisil te mach'a ya xch'uune, ma xch'ay. Ya xcuxin sbajt'el q'uinal —xi' te Jesuse. 16Melel te Diose bayal c'ux la yaiy ta yo'tan spisil te ants-winiquetique. Jich yu'un la yac'bey te jip jtul Snich'ane, swenta yu'un spisil te mach'a ya xch'uune, ma xch'ay, jich me ya sta xcuxlejal sbajt'el q'uinal. 17Ma ja'uc la sticun tel Snich'an ta balumilal yu'un te ya yac' ta lajel yu'un smulic te ants-winiquetique. Ja' la sticun tel yu'un te ya scoltaye. 18Te mach'a ya xch'uun te Snich'an Diose, ma x'ac'ot ta lajel yu'un te smulique. Yan te mach'a ma xch'uune, chapalix te ya x'ac'ot ta lajele, scaj te ma xch'uun te jip jtul Snich'an te Diose. 19Ja' smulic c'ot te c'alal tal ta balumilal te saquil q'uinale, te ants-winiquetic ma la smulanic. Ja' toyol yo'tanic yu'un te ijc' q'uinale scaj te bit'il amen te yat'elique. 20Melel spisil te mach'a ya spas te bila amene, ya sp'aj te saquil q'uinale. Melel ma xtalic ta bay te saquil q'uinale, yu'un ma sc'anic te ya xchicnaj ta ilel te bila amen yacalic ta spasele. 21Yan te mach'atic ya spas te bila smelelile, ya xtalic ta bay te saquil q'uinale. Jich ya xchicnaj ta ilel te bit'il ja' ta swenta Dios spisil te yat'elic yacalic ta spasele. 22Ta patil te Jesús bajt' ta sq'uinal Judea soc te jnopojeletic yu'une. Tey la sjoin sbaic ta yaq'uel ich'ja' a. 23In te Juane yac ta yaq'uel ich'ja' uuc ta bay Enón te nopol yiloj sba soc te Salime, yu'un ay bayal ja'etic tey a. Te ants-winiquetic talic ta stojol, jich la yac'bey yich'ic ja'. 24Melel ma to ochemuc ta chuquel a te Juane. 25Te jnopojeletic yu'un te Juane, jajch' c'op yu'unic soc te jwolwanej-judioetique ta swenta te bit'il ay sc'oplal te utstesele. 26Jich ba sc'oponic te Juane: —Maestro, te mach'a ajoinej ta stojol sloq'uib c'aal ta bay jejch' muc'ja' Jordán te la awalbotic sc'oplale, ja' yaquix ta yaq'uel ich'ja'. Spisilic xbajt'iquix ta stojol —xiic. 27Te Juan jich la yal: —Ma'yuc jtuluc winic te ay bila ya xc'ot ta swenta spasel teme ma ja'uc ya x'ac'bot spas yu'un te Diose. 28Te jo'one la calbeyex ta jamal te ma jo'ocon te Cristoe. Ja' nax quich'oj tel neeltesel yu'un. 29Jich bit'il te nujbinele. Te mach'a ya xnujbin soc te ach'ixe, ja'ix te smamlale. Yan te mach'a sjoy nax sba soque, ja' nax ya xbujts'naj yo'tan yu'un te ya yaiybey te sc'ope. Jich c'oemon ta stojol te Jesuse. Bayal ya xbujts'naj co'tan ta swenta. 30Ja' me ya xtoy bael sc'oplal stuquel. Yan te jo'one, ya me xlaj bael jc'oplal jtuquel —xi' te Juane. 31Te mach'a talem ta toyole, ja' cajal ay yu'un spisil te bitic aye. In te mach'a swenta te balumilale, swenta nax balumilal, soc ja' nax ya sna' yalel te bila swenta te balumilale. Yan te mach'a talem ta ch'ulchane, cajal ay yu'un spisil te bitic aye. 32Te bila la yile soc te bila yaiyoj stojole, ja' ya xcholbey sc'oplal. Ja'uc me to, ma'yuc mach'a ya xch'uun te bi ya yale. 33Yan teme ay mach'a ya xch'uune, ya yac' ta na'el te bit'il melel te bila ya yal te Diose. 34Melel te mach'a ticunbil yu'un te Diose, ja' ya yal te sc'op Diose, yu'un ma p'isbiluc nax Espíritu ya yac' te Diose. 35Te Tatile c'ux ta yo'tan te Snich'ane, ja' yac'ojbey ta sc'ab spisil te bitic aye. 36Te mach'a ya xch'uun te Nich'anile, ya me xcuxin sbajt'el q'uinal. Te mach'a ma sc'an xch'uun te Nich'anile, ma xyil te cuxinele. Ja' nax quechel yilimba Dios ta stojolic.


Copyright
Learn More

will be added

X\