San Juan 16

1La yal xan te Jesuse: —La me calbeyex awaiyic in to, swenta yu'un ma xchebaj awo'tanic. 2Ya me stenex loq'uel ta sinagogaetic, soc ya me sta yorail te mach'auc ya smilexe, yu'un scuyojic te ja' yat'el Dios te ya spasique. 3Jich ya spasic yu'un xujt' ma sna'beyic sba te Jtate, soc ma sna'bonic jba uuc. 4La me calbeyex awaiyic in to, swenta yu'un te c'alal ya xc'ot yorail, jich me ya ana'ic te jich nix la calbeyex awaiyique. “Ta neelal to ma la calbeyex spisil in to yu'un joinejex to a. 5Ta ora to ya xba joinix te Mach'a la sticunon tele. Ja'uc me to, ma'yuc bay ya ajojc'obonic te bay ya xboone. 6Ja' nax baem ta awo'tanic te mel-o'tane, scaj te bit'il la calbeyexix awaiyic spisil in to. 7Ja'uc me to, ya me calbeyex ta melel te ja' lec te ya xboone, yu'un teme ma xboone, ma xtal ta atojolic te Jmuc'tesej-q'uinal awu'unique. Yan teme ya xboone, ya me jticunbeyex tel. 8Soc teme tale, ja' me ya yac'bey c'otuc ta yo'tanic ants-winiquetic te bila a te mulile, soc te toj-o'tanile, soc te bit'il ay castigo yu'un te mulile. 9Te mulile ja' te ma sc'an xch'uunonique. 10Te mach'a a te toj yo'tane, ja' te jo'one, te ya xboon ta stojol te Tatile, soc ma ba ya awilbonic xan jsit. 11Te castigo yu'un mulil, ja' te ya yich' castigo te ajwalil yu'un te balumilale. 12“Ay to bayal xan te bila c'an calbeyexe, ja'uc me to, ma to xju' awu'unic sna'el stojol ta ora to. 13Yan te c'alal ya xtal te Espiritue, ja' ya yac' ta na'el te bila melele, ja' me ya yac'beyex ana'ic stojol spisil te bila smelelile. Melel ma stuquel yo'tanuc te bila ya yale. Ja' me ya xtal yalbeyex spisil te bila yaiyoj stojole, soc ja' me ya yac'beyex ana'ic te bila quechel ya xtale. 14Ja' me ya yac'bon ta ilel te cutsilale, yu'un ja' me ya xc'ot swenta yalel te bila ya jc'an te ya cale, ja' me ya yac'beyex ana'ic. 15Spisil te bila ay yu'un te Jtate, jo'on cu'un uuc. Ja' swentail te la calbeyex te ja' ya xc'ot ta swenta yalel te Espíritu te bila ya jc'an te ya cale, ja' me ya yac'beyex ana'ic stuquel. 16“Li' ta ajc' ma ba ya awilbonic te jsite. Li' xan ta ajc' ya awilbonic xan jsit —xi' te Jesuse. 17Jich yu'un ay la yalbey sbaic te jnopojeletic yu'une: —¿Bit'il ay a te la yalbotic te ma ba ya quilbeytiquix site soc li' xan ta ajc' ya quilbeytic xan te site, soc te la yal te ya xbajt' ta bay te State? 18¿Bila ya sc'an ya yal a te ajc' xanix, te xie? Ma xc'ot ta co'tantic te bila ya yale —xiic. 19Jesús la sna' stojol te ya sc'an yo'tanic te ya sjojc'obeyique. Jich caj yalbey yu'un: —La calbeyex te li' ta ajc' ma ba ya awilbonic te jsite; soc li' xan ta ajc' ya awilbonic xan te jsite. ¿Ja' bal yacalex ta yaanel? 20Jamal ya calbeyex, ya me x'oq'uex cu'un soc bayal me ya amel awo'tanic. Yan te mach'atic te ayic ta swenta te balumilale, ya xbujts'naj yo'tanic yu'un, ja'uc me to, te mel-o'tan ya awaiyique, ya me xc'atp'uj ta sbujts' awo'tanic. 21Jich bit'il jtul ants te yorailix ya x'alaje. Bayal ya smel yo'tan yu'un te jajch'ix xc'uxul te swocole, melel la staix yorail. Ja'uc me to, c'alal ayinemix a te yale, ma ba ya sna'ix xan xc'uxul te swocole, yu'un bujts'najix yo'tan yu'un te ayinemix squerem-ale. 22Ja' nanix jich te ja'exe, ayex ta mel-o'tan ta ora to. Ja'uc me to, ya me quilbeyex xan asitic soc ya me xbujts'naj ta lec awo'tanic yu'un. Te sbujts' awo'tanique ma xju' ta pojel. 23“Te bi c'aalil ya xc'ot ta pasele, ma me ayuc bi ya ajojc'obonic xan. Jamal ya calbeyex, spisil te bila ya ac'anbey ta jwenta te Jtate, ya me yac'beyex. 24Ma to ayuc bila ac'anojic ta jwenta. C'anaic, jich me ya yac'beyex, swenta yu'un jich me ya xbujts'naj ta lec awo'tanic yu'un. 25“Spisil in to la calbeyex tel ta puro seña-c'op, ja'uc me to, ya me sta yorail te ma'yuc bi ya calbeyex xan ta seña-c'op. Jamal me ya calbeyex bit'il ay sc'oplal te Jtate. 26Te bi c'aalil ya cale ay bila ya ac'anic ta jwenta. Ma xcal te ya xc'opojon awu'unic ta stojol te Jtate, 27melel te Jtate c'ux ya yaiyex ta yo'tan. Ja' c'ux ya yaiyex ta yo'tan yu'un te bit'il c'uxon ta awo'tanique soc te bit'il xch'uunej awo'tanic te talemon ta stojol te Diose. 28Loc'on tel ta stojol te Jtate, talon ta balumilal. Yan buelta ya quijq'uitayix te balumilale, ya sujt'onix bael ta stojol te Jtate —xi' te Jesuse. 29La yal te jnopojeletique: —Ta ora to jamal la awalix caiytic, melel ma seña-c'opuc te la awalbotique. 30Ta ora to la jna'tiquix te spisil ay ta awo'tan. Jich ma puersauquix te ay mach'a ya sjojc'obat xane. C'otix ta co'tantic te talemat ta stojol te Diose —xiic. 31La yal te Jesuse: —¿C'ot balix ta awo'tanic? 32Ya calbeyex te ya staix yorail soc ja' yorailix in to te ya xpujq'uex bael ta anel ta anaic juju-jtule, soc ya awijq'uitayonic jilel jtuquel. Ja'uc me to, ma jtuqueluc ya xjilon, melel sjoinejon te Jtate. 33La calbeyex spisil in to, swenta yu'un jich me lamal q'uinal ya awaiyic ta jwenta. Yan ta bay te balumilale ya me xc'ax awocolic, ja'uc me to, ayuc me smuc'ul awo'tanic ta jwenta, melel tsalbilix cu'un te balumilale —xi' te Jesuse.


Copyright
Learn More

will be added

X\