San Juan 13

1Nopol ya sta yorail te q'uin Pascuae. Te Jesús sna'oj te c'otix yorail te ya yijq'uitay jilel in balumilal to soc te ya xbajt'ix ta stojol te State. Spisil ora c'ux la yaiy ta yo'tan te mach'atic ay yu'un ta balumilale, soc la yac'bey xan yilic te c'uxbajem ta yo'tan c'alal ta slajibal. 2- 4Och pucuj ta yo'tan te Judas te snich'an Simón Iscariote, albot ta yo'tan te bit'il ya yac' ta c'abal te Jesuse. Te Jesús ay ta yo'tan te talem ta stojol Dios, soc te ya sujt' bael ta stojol Dios, soc te bit'il spisil ac'bilix ta sc'ab yu'un te State. Jich yu'un te c'alal yac ta we'el ta mesa, la stejc'an sba jajch'el. La sloq'ues sc'u', soc la xchuc toalla ta xch'ujt'. 5La sq'ueb ja' ta vasija. Caj spocbey yacan te jnopojeletic yu'une, soc la staquintesbey ta toalla te chucul ta xch'ujt'e. 6Te c'alal c'ot ta bay te Simón Pedroe, jich la yal te Pedroe: —Cajwal, ¿ja'at bal ya apocbon te cacane? —la yut. 7La yal te Jesuse: —Ta ora to ma to xc'ot ta awo'tan te bila ya jpase. Patil to ya xc'ot ta awo'tan —xi'. 8La yal te Pedroe: —¡Ma'yuc bi ora ya cac'bat apocbon cacan! —xi'. Jesús la yalbey: —Teme ma jpocbat awacane, ma xju' te cu'un ya xc'oate —xi'. 9Te Simón Pedro la yal: —Cajwal, ma me ja'uc nax ya apocbon te cacane, ya me apocbon jc'ab soc jol —xi'. 10Jesús la yalbey: —Te mach'a atinemixe ma yejt'aluc te ya yich' poquel scojt'ole. Tic' a teme ya yich' poquel te yacane, melel atinemix scojt'ol. Te ja'exe utstesbilexix, manchuc teme ma apisilicuque —xi'. 11Te bit'il la yal Jesús te ma spisiluc utstesbilique, yu'un sna'oj stojol te mach'a ya x'ac'ot ta c'abal yu'une. 12C'alal laj yo'tan ta spocbeyel yacan te jnopojeletique, la xcha'lap xan sc'u' soc la snajc'an sba ta snactijib. Jich caj yal: —¿Ya bal ana'beyic swentail te bila la jpasbeyex awilique? 13Te bit'il “Maestro” soc “Cajwal”, ya awutonic, melel xawalic, yu'unix jo'on a. 14Te bit'il maestroon soc ajwalilon awu'unic te la jpocbeyex awacanique, jich nix ya sc'an ya apocbey aba awacanic te ja'exe. 15Melel la cac'beyex awilic swenta yu'un jich me ya apasic uuc te bit'il la jpas awilique. 16Jamal ya calbeyex, te abate ma ja'uc cajal ya xc'ot ta stojol te yajwale. Soc te mach'a ticunbil tel, ja' peq'uel sc'oplal ya xc'ot ta stojol te mach'a ticunwanej. 17Teme c'ot ta awo'tanique, bin nax me awutsil teme jich ya apasique. 18“Ma apisiluc te jich ya calbeyexe, melel na'bilix cu'un te mach'atic jtsaoje. Ja'uc me to, puersa ya xc'ot ta pasel te bi ts'ibubil ta Sjun te Diose: “Te mach'a pajal ya xwe'on soque, c'atp'ujix ta jcontro”, te xie. 19Neel me la calbeyex te bit'il ma to xc'ot ta pasele, swenta yu'un te c'alal ya xc'ot ta pasele, jich me ya ach'uunonic te jo'one. 20Te mach'a ya yic' ta stojol te mach'a jticuneje, jo'on la yic'onix ta stojol abi. In te mach'a ya yic'on ta stojole, ja' la yiq'uix ta stojol uuc te Mach'a la sticunon tele —xi' te Jesuse. 21C'alal laj yo'tan ta yalel in to te Jesuse, bayal la smel yo'tan soc jamal caj yal: —Jamal ya calbeyex, ay jtulex te ya awac'onic ta c'abale —xi'. 22Te jnopojeletique jajch' yilbey sba sitic, yu'un bayal la yaan yo'tanic te mach'a a te la yalbey sc'oplale. 23Ay jtul jnopojel yu'un te Jesús te bayal c'ux sba ta yo'tan soque, te slac'oj sba ta we'el soque. 24Te Simón Pedro la yac'bey ch'in seña yil ta sc'ab te yacuc sjojc'obey te mach'a sc'oplal la yalbeye. 25Jich la sts'ean sba ta sjojc'oyel ta stojol te Jesuse. Jich la yal: —Cajwal, ¿mach'a a? —xi'. 26La yal te Jesuse: —Ja' te mach'a ya jmulbey xejt'uc waj te ya cac'bey swe'e, ja' me abi —xi'. Jich la smulbey soc la yac'bey te Judas te snich'an Simón Iscariotee. 27C'alal la stsac te Judase, och Satanás ta yo'tan ta ora. Te Jesús la yalbey: —Te bila ya apase, pasa me ta ora —la yut. 28Te mach'atic yacalic ta we'el ta mesae, ma la sna'ic jtuluc te bi swentailuc te jich la yalbeye. 29Te bit'il ja' ay ta swenta te yawil taq'uin te Judase, jich la scuyic te yu'un ay bila la yac' xan ta manel Jesús te ya xtuun yu'unic ta spasel a te q'uine, o teme ay bila ya yac'beyic xan jtebuc te me'baetique. 30C'alal stsacojix ta sc'ab a te mulbil waj te Judase, loc' bael ta ora. Ajc'ubalix a. 31Te c'alal loq'uix bael a te Judase, jich la yal te Jesuse: —Ta ora to ya x'ac'ot ta ilel yutsilal te Nich'anile soc ja' nix ta swenta te ya x'ac'ot ta ilel yutsilal te Diose. 32Teme ja' ta swenta te ya x'ac'ot ta ilel yutsilal te Diose, ja' nanix jich Dios ya yac' ta ilel yutsilal te Nich'anile. Ya me xc'ot ta pasel ta ora. 33Cal-jnich'nab, ma ba jalix c'aal te ya joinexe. Ya aleonic, ja'uc me to, jich nix ya calbeyex te bit'il la calbey te judioetique, ma xju' ya xbaex tey a ta bay ya xboone. 34Ta ora to ya calbeyex yach'il mandalil: C'ux me x'awaiy abaic ta awo'tanic, jich te bit'il c'ux la caiyex ta co'tane. 35Teme c'ux ya awaiy abaique, tey me ya sna'ic stojol spisil te mach'atic ayic ta balumilal te bit'il jnopojelex cu'un ta melele —xi' te Jesuse. 36Te Simón Pedro la sjojc'obey te Jesuse: —Cajwal, ¿banti ya xbaat? —xi'. La yal te Jesuse: —Te bay ya xboon ta ora to, ma xju' ya ats'aclinon bael tey a, ja'uc me to, ya me ats'aclinon bael ta patil —xi'. 37Pedro la yal: —Cajwal, ¿bi yu'un te ma xju' ya jts'aclinat bael ta orae? Melel jun co'tan ya cac' jba ta lajel ta awenta —xi'. 38Jesús la yalbey: —¿Ya bal awac' aba ta lajel cu'un? Jamal ya calbat: Ma to x'oc' mut yo'tic a te ya amucon ta awo'tan oxeb bueltae —la yut.


Copyright
Learn More

will be added

X\