San Juan 12

1Waqueb xan c'aal sc'an sta a te q'uin Pascuae, te Jesús bajt' ta lum Betania ta banti ay te Lázaro te la yich' cha'cuxesel tel ta bay animaetique. 2La xchajbanic we'elil tey a swenta yu'un ya sjoin sbaic ta we'el soc te Jesuse. Ja' la yac' sba ta jmac'linwanej te Martae. Tey ay a te Lázaro soc te yantic te la sjoin sbaic ta we'el ta mesa soc te Cajwaltique. 3Te María la yich' tel jteb ma oliluc litro perfume te nardo sbiil te toyem stojole. Tal smalbey ta yacan te Jesuse soc la staquintesbey ta stsotsil sjol. Been yic' ta swolol na te perfume. 4Caj ta c'op te jtul jnopojel, ja' te Judas Iscariote te snich'an Simone soc ja' nix te mach'a la yac' ta c'abal ta patil te Cajwaltique. Jich la yal: 5—¿Bi yu'un ma la yich' chonel in perfume to? Ya xloc' jo'lajunwinic (300) denario-taq'uin stojol te jichuque, yu'un ya yich' coltayel a te me'baetique —xi'. 6Te bit'il jich la yal te Judase, ma yu'unuc ayuc sc'oplal ta yo'tan te me'baetique. Yu'un ja' ay ta yo'tan te eleq'ue. Melel ja' scanantayej te yawil staq'uinique, soc c'aem ta yelc'anel te taq'uine. 7Jesús la yalbey: —Ac'a spas, melel ja' sq'uejojbon yu'un xpoxtayel te jbaq'uetal te ya yich' muquele. 8Melel te me'baetique spisil ora ay ta awolilic stuquelic, yan te jo'one, ma spisiluc ora te ya joinexe —xi'. 9Ay tsobol judioetic la yaiyic stojol te ay ta Betania te Jesuse. Jich bajt'ic tey a. Ma ja'uc nax ba yilic te Jesuse, ja' ba yilic uuc te Lázaro te cha'cuxemix tel yu'un Jesús ta bay te animaetique. 10Jich yu'un te jwolwanej-sacerdoteetique la xchajbanbeyic sc'oplal ta milel uuc te Lázaroe, 11yu'un ja' ta scaj te ayix bayal judioetic yac ta loq'uel bael ta stojolic yu'un ja' ya xba xch'uunic te Jesuse. 12Ta yan c'aal ay bayal ants-winiquetic talemic ta yilel q'uin Pascua ta bay Jerusalén. La yaiyiquix stojol te ya xtal ta Jerusalén te Jesuse. 13Jich yu'un la sbojtilayic tel yabenal palmera. Jich loc' staic ta be te Jesuse. Jich la yalic ta aw: —¡Jelawen yutsil! ¡Bin nax yutsil te mach'a talem ta swenta te Cajwaltique! ¡Bin nax yutsil te Muc' Ajwalil yu'un te Israele! —xiic ta aw. 14Te Jesús la sta cojt' burro. La scajtijibin bael jich te bit'il ts'ibubil jilel ta Sjun te Diose: 15“Ma me xiwat, lum yu'un Sión. Ilawilic, talix te Muc' Ajwalil awu'unique. Ya me awil cajal ya xtal ta ch'in burro te ja' yal te me' burrae”, te xie. 16Ta xjajch'ibal te jnopojeletique ma ba la sna'beyic swentail te bila la yilic te c'ot ta pasele. Ja'uc me to, te c'alal ac'otix ta ilel yutsilal te Jesuse, jul ta yo'tanic te jich nix ts'ibubil jilel sc'oplale soc te jich nix c'ot ta pasel ta stojole. 17Te ants-winiquetic te sjoinejic Jesús a te c'alal la yic' loq'uel tel ta muquenal te Lázaroe soc te la xcha'cuxes tele, ja'ic nix te ba xcholbeyic sc'oplal ta lum te bila la yilique. 18Ja' swentail te loc' staic Jesús te ants-winiquetique, yu'un yaiyojiquix stojol te jchajp at'elil la spase. 19Jich te fariseoetique caj yalbey sbaic: —Ilawil, ma staq'uix ta comel. Melel spisil te lume bajt'iquix ta stojol te Jesuse —xiic. 20Ay griegoetic capal soc te mach'atic julemic ta Jerusalén ta slajinbel sbaic ta yorail te q'uine. 21Te griegoetique, noptsajic tel ta stojol te Felipe te ja' slumal te Betsaida te ay ta sq'uinal Galilea. La yalbeyic wocol ta stojol, jich la yal: —Tatic, ya jc'an quiltic te Jesuse —xiic. 22Te Felipe ba yalbey yaiy te Andrese. Jich bajt' xchebalic, ba yalbeyic yaiy te Jesuse. 23Te Jesús la yalbey yaiyic: —C'otix yorail te ya x'ac'ot ta ilel yutsilal te Nich'anile. 24Jamal ya calbeyex, jich te bit'il jp'ij sit trigo, teme ma xlaj tey a ta bay la yich' wajel jilel ta slumile, stuquel nax ay ta q'uinal te jichuque. Yan teme ya xlaje, bayal ya yac' sit yu'un. 25Ja' te mach'a ya xc'uxtay sbae, ya me xch'ay soc xcuxlejal. Yan te mach'a ma xc'uxtay sba te bit'il cuxul ta balumilale, sbajt'el q'uinal ya xcuxin stuquel. 26Teme ay mach'a ya sc'an ya yac' sba ta abat cu'une, ac'a me sts'aclinon bael. Melel te bay ya xc'oon te jo'one, tey me ya xc'ot uuc te cabate. Te mach'a ya yac' sba ta abatinel cu'une, ya me x'ac'bot yich' yutsilal yu'un te Jtate. 27“Ta ora to bayal ayon ta mel-o'tan. ¿Bi ya cal yu'un? ¿Ya bal cal: “Jtat, coltayawon te bila ya xc'ot ta pasel ta jtojole”, xoon bal? Ja'uc me to, ja' talemon yu'un. 28Jich yu'un, Jtat, ac'a me ta ich'el ta muc' te abiile —xi' te Jesuse. Ay mach'a c'opoj tel ta ch'ulchan. Jich la yal: —La cac'atix ta ich'el ta muc' soc ya me cac'at xan ta ich'el ta muc' —xi'. 29Te ants-winiquetic te yacalic ta yaiyel stojole, ay la scuyic ta chawuc te c'opoje. Soc ay la yalic: —Ch'ul abat c'oponot yu'un —xiic. 30Jesús la yalbey yaiyic: —Ma jo'ocon ta jcaj te c'opoj te Jtate. Ja'ex ta acajic atuquelic. 31Melel la staix yorail te ya x'ich'bot sc'op yu'un smulic te mach'atic ayic ta balumilale. Soc la staix yorail te ya xch'ojotix loq'uel uuc te ajwalil yu'un te balumilale. 32Te c'alal ya quich' jijp'anel ta balumilale, ya me quic' tel ta jtojol spisil ants-winiquetic —xi'. 33Ja' la yac' ta na'el stojol te bila lajel ya yaiye. 34La yal te ants-winiquetique: —Caiyojtic stojol te bit'il ya yal te mandalil cu'untic te stalel cuxul sbajt'el q'uinal te Cristoe. ¿Bit'il ay a te jich la awal te puersa ya xjijp'anot te Nich'anile. ¿Mach'a a te Nich'anil ya awale? —xiic. 35Te Jesús jich la yalbey yaiyic: —Ma ba jalix c'aal te ay saquil q'uinal ta atojolic. Jich yu'un ac'a me puersa te ya xbeenex ta bay te saquil q'uinal, swenta yu'un ma me ch'ayemuc atsaic ya staex te ijc' q'uinale. Melel te mach'a ya xbeen ta ijc' q'uinale, ma sna' te banti beil ya xbajt'e. 36Te bit'il ayex to ta bay te saquil q'uinal, ch'uunaic me, swenta yu'un ja' yal-snich'an ya xc'oex te saquil q'uinale —xi' te Jesuse. C'alal laj yo'tan ta yalel in to te Jesuse, ba snac' sba ta q'uejel. 37Manchuc teme bayal ta jchajp te señailetic la spas ta stojolic te Jesuse, ma ba c'ot ta yo'tanic te mach'a a, 38swenta yu'un jich ya xc'ot ta pasel te bila la sts'ibuy jilel te j'alwanej Isaiase: “Cajwal, ¿ay bal mach'a la xch'uunix te bila yaiyojix stojol cu'untique? ¿Ay bal mach'a ac'botix yilbey yu'el te Cajwaltique?”, te xie. 39Te Isaiase la sts'ibuy jilel te bi swentailuc te ma ju' yu'unic xch'uunel te banti jich la yale: 40“Dios la sc'atp'un ta ma'sit soc la yac' tulanajuc yo'tanic, swenta yu'un ma xyilic q'uinal ta sitic, ni ya xc'ot ta yo'tanic te bila ya x'albotique. ‘Ma ba ya sujt'es yo'tanic ta jtojol swenta ya jlamantes te xchamel’, xi' te Diose”, te xie. 41Jich la yal te Isaiase, yu'un yilojbey yutsilal te Jesuse, soc ja' nix te la xcholbey sc'oplale. 42Ay tsobol jwolwanejetic te la xch'uunic te Jesuse, ja'uc me to, ma la yal sbaic scaj te la xi'ic te fariseoetique, yu'un ma sc'anic te ya yich'ic loq'uesel ta sinagogae. 43Melel ja' bayal sc'oplal la yaiy ta yo'tanic te lec ya x'ilotic yu'un te ants-winiquetique, ma ja'uc ay sc'oplal ta yo'tanic teme lec ya x'ilotic yu'un te Diose. 44Te Jesús tulan c'opoj: —Te mach'a ya xch'uunone, ma jo'ocon nax te ya xch'uunone, ja' ya xch'uun uuc te Mach'a la sticunon tele. 45Te mach'a yilojonixe, ja' yilojix a te Mach'a la sticunon tele. 46Jo'on te sacuben q'uinal cu'un, talemon ta balumilal swenta yu'un spisil te mach'a ya xch'uunone ma x'ain ta ijc' q'uinal. 47Te mach'a ya yaiybon stojol te jc'ope, teme ma xyich' ta muq'ue, ma jo'ocon ya cal te bila castigo ya yich' yu'une. Melel ma ja'uc talemon yu'un ta yac'beyel castigo te mach'atic ayic ta balumilale, ja' talemon yu'un te ya jcoltaye. 48Te mach'a ya sp'ajone, soc teme ma xyich' ta muc' te jc'ope, ay mach'a ya x'ac'ot ta castigo yu'un. Ja' te jc'op ya cale, ja' ya x'ac'ot ta castigo yu'un ta slajibal c'aal. 49Yu'un ma jo'ocon jc'op te ya cale, ja' sc'op te Jtat te la sticunon tele. Ja' la yac'bon te mandalil te bila ya cale soc te bila ya cac' ta nopele. 50Jna'oj stojol te ya yac' cuxinel sbajt'el q'uinal te smandal te Jtate. Jich yu'un te bila ya cale, ja' ya cal te bila yalojbon te Jtate —xi' te Jesuse.


Copyright
Learn More

will be added

X\