Santiago 5

1Aiya awaiyic stojol jc'ulejetic: Awunanic me ta oq'uel yu'un te woclajel ya xtal ta atojolique. 2C'a'emix te ac'ulejalique soc lajemix ta joch' te ac'u'-apaq'uique. 3Tsa'ec'ubenix te oro soc te plata awu'unique. Ja' me ya yaq'uex ta c'abal te stsa'ec'ul te ataq'uine, soc ya me slajinbeyex abaq'uetalic jich bit'il te c'ajq'ue. La atsobiquix ta q'uejel te ac'ulejalique, manchuc teme slajibalix c'aal ayotique. 4Aiya awaiy stojol, yac ta c'op ta atojolic te stojol sc'ab te j'at'eletic awu'unic te at'ejemic ta aq'uinalique. Ta scaj te la alo'layique jich ma la atojic. Te yoq'uel te j'at'eletic awu'unique, c'otix ta xchiquin te Cajwaltic te Spisil ya xju' yu'une. 5Li' nax ta balumilal te lec cuxulex ta q'uinale. Spisil ay awu'unic te bitic ya smulan te abaq'uetalique. Jich c'oemex te bit'il wacax te yac ta jujp'ele, te nopol sta sc'aalelal te ya yich' milele. 6La alebey smulic te mach'atic ma'yuc smulique soc la awaq'uix ta lajel, ja'uc me to, te mach'atic ma'yuc smulique ma ba la scoltay sbaic ta c'op stuquelic. 7Jich yu'un, quermanotac, junuc awo'tanic ts'ijc'uc awu'unic te awocolique, ja' to teme chicnaj tel te Cajwaltique. Jich bit'il te mach'a yat'elinej sc'altayel te q'uinale te ya smaliybey yutsil sit te sc'ale, ya sc'an te jun nax yo'tan ya smaliy te bi ora ya xtal te ja'ale. 8Jich uuc te ja'exe ts'ijc'uc me awu'unic. Ac'a me yip awo'tanic, yu'un nopol ya xtalix te Cajwaltique. 9Quermanotac, ma me talel jc'axeluc ya ale abaic ta c'op, swenta yu'un ma me x'ac'botex castigo yu'un Dios. Te juez ayix ta ti'nail. 10Quermanotac, ja'uc me te ejemplo ta atojolic te la sts'ic swocolic te namey q'uinal j'alwanejetic te c'opojic ta swenta te Cajwaltique. 11Jich ay ta co'tantic te bin nax me yutsilic te mach'atic ya sts'ijc' yu'unic te swocolique. Jich bit'il Job, te awaiyojbeyic stojol sc'oplal te bit'il ts'ijc' yu'un te swocole, soc ana'ojic te bit'il c'ot ta loq'uel yu'un Cajwaltic ta patile. Melel te Cajwaltique bayal xc'uxul yo'tan soc ya sna' yo'bolil jbajtic stuquel. 12Ja'uc me to, quermanotac, ay bayal sc'oplal in to: Ma me xawaq'uic ta testigo te ch'ulchane ni te balumilale, soc ma me ayuc yan te bila ya awaq'uic ta testigoe. Te c'alal ya xc'opojexe: “Yac”, xaex me teme jiche, “Ju'uc”, xaex me teme ma jichuque, swenta yu'un jich ma xyaq'uex ta castigo te Diose. 13Teme ay mach'a ay swocole, ja' me ac'a sc'opon te Diose. Soc teme ay mach'a ay sbujts' yo'tane, ja' me ac'a sc'ajintay te Diose. 14Teme ay mach'a ay ta chamele, ja' me ac'a yic' tel te ancianoetic yu'un te Iglesiae swenta yu'un ya xc'oponbot Dios. Soc ta swenta sbiil te Cajwaltique, ac'a yac'beyic aceite te jchamele. 15Teme ay xch'uunjel yo'tanic te c'alal ya sc'oponic te Diose, jich me ya xcol te jchamele. Ya me xjajch'esot yu'un te Cajwaltique, soc teme ay staoj smule ya me spasbot perdón yu'un. 16Jich yu'un albeya abaic ta jamal teme ay amul ataojique, soc c'oponbeya abaic Dios swenta yu'un jich me ya xlamaj te chamele. Te c'alal ya sc'opon Dios te mach'a toj yo'tane, bayal yip ya xc'ot. 17Jich bit'il te Elías te j'alwanej yu'un te Diose te pajal ch'ich'-baq'uetotic soque. Te c'alal la sc'opon Dios yu'un te ma ba ya xtal te ja'ale, jich ma ba tal ja'al oxeb ja'wil soc waqueb u. 18Ta patil la sc'opon xan te Diose, jich tal ja'al ta ch'ulchan. Jich sitin awal-ts'unubiletic ta lumq'uinal. 19Quermanotac, teme ay mach'a la yijq'uitayix ta yo'tan te smelelil c'ope, ayuc me mach'a ya scoltay te ya sujt'es yo'tan. 20Na'aic me, te mach'a ya scoltay sujt'el jtul jmulawil te jowejemix ta bee, la scoltaybeyix ta lajel te xch'ulele. Jich la yaq'uix ch'ayuc bayal ta jten mulil a.


Copyright
Learn More

will be added

X\