Santiago 4

1¿Banti ya xjajch' awaiyic te ya acontroin abaique soc te ya atsac abaique? ¿Ma bal ja'uc te sbic'tal awo'tanic te spisil ora ya sujexe? 2Ya xbic'taj awo'tanic, pero teme ma'yuc bila ya ataic, ya awaiyic milaw yu'un. Soc ya xtil jajch'el slab awo'tanic yu'un, ja'uc me to, teme ma x'ataic te bila ya ac'anique, jich ya atsac abaic soc ya acontroin abaic yu'un. Ma x'ataic te bila ya ac'anique, te melel ma x'ac'anbeyic te Diose. 3Manchuc teme ya ac'anique, ja'uc me to, ma x'ac'botex, yu'un ma lecuc awo'tanic ta sc'anel. Melel ja' nax ya ac'anic yu'un te ya xbujts'naj awo'tanic yu'une. 4¡Jmulawil ants-winic! ¿Yu'un bal ma x'ana'ic te mach'atic jun yo'tan sba soc te balumilale ja' scontroinejic te Diose? Mach'auc a te jun yo'tan sba soc te balumilale, yu'un nanix ja' spasoj ta contro a te Diose. 5Ja' swentail te jich ts'ibubil jilel ta Sjun te Diose: “Te Espíritu te yac'oj snainbotic co'tantic te Diose, bayal sc'anoj ta yo'tan”, te xie. 6Bayal yutsil yo'tan cu'untic te Diose. Jich te bit'il ts'ibubil jilel ta Sjun te Diose: “Dios scontroinej te mach'atic stoyoj sbaique, yan te mach'atic peq'uel yac'oj sbaique ya xc'uxtay stuquel”, te xie. 7Jich yu'un, ac'a abaic ta sc'ab te Diose. Pasaic ta contro te pucuje, jich me ya yijq'uitayat jilel. 8Noptsajanic ta stojol te Diose, jich me ya xnoptsaj ta atojolic uuc. Jmulawiletic, poca ac'abic; ja'ex te cheb awo'tanique, ac'a abaic ta utstesel. 9Mela awo'tanic soc oq'uetaya abaic. Te atse'ejique ac'a c'atp'ujuc ta oq'uel; te sbujts' awo'tanique ac'a c'atp'ujuc ta mel-o'tan. 10Bic'tajanic me ta stojol te Cajwaltique, jich me ya stoyesbeyex ac'oplalic stuquel. 11Quermanotac, ma me amenuc xawalbey aba ac'oplalic soc te yantique. Te mach'a amen ya yalbey scoplal te yermanoe, soc te ya slebey smul te yermanoe, ja' la scontroc'optayix a te mandalile. Teme ja'at cajal ya awac' aba yu'un te mandalile, jich ma ba ya ach'uun spasel te bila ya yal te mandalile. Ja' nax acuyoj aba ta juez yu'un. 12Ja'uc me to, ja' nax stuquel te Diose te yac'oj te mandalile. Ya xju' yu'un te ya scoltayotique, soc ya xju' yu'un te ya yac'otic ta ch'ayele. Yan te ja'ate, ¿mach'a ya acuy aba a te ya alebey smul te yane? 13Nopa awaiyic ta lec te jich ya awalique: “Yo'tic soc pajel cha'wej ya xbootic ta bay in lum to. Ya me xjalajotic jun ja'wil tey a. Ya me caiytic chonbajel soc manbajel. Jich me ya jpastic ganar”, te xaexe. 14Ja'uc me to, ma x'ana'ic stojol te bila ya xc'ot ta pasel te pajele. ¿Jal bal c'aal ya awaiyic te ya xcuxinexe? Melel te jcuxlejaltique jich c'oem te bit'il sjab lumq'uinal te ajc' nax ya xchicnaj soc ya xch'ay bael ta orae. 15Ja' ya sc'an te jichuc ya awalique: “Teme jich ya sc'an te Cajwaltic, soc teme cuxulotic ae, jich me ya jpastic”, xaex ya sc'an. 16Yan te ja'exe, ja' nax ya atoy abaic soc te ac'opique. Spisil te toybaile, xujt' ma lecuc. 17Te mach'a ya sna' spasel te bila leque, teme ma jichuc la spase, ja' mulil abi.


Copyright
Learn More

will be added

X\